ރިޔާސީ އިންތިޚާބުގެ ކެމްޕެއިން ދުވަސްވަރު ޕީޕީއެމްއާ ގުޅިވަޑައިގަތް އަލްހާން ފަހުމީ މިއަދު އެ ޕާޓީއިން ވަކިވެވަޑައިގެންފި އެވެ.
އަލްހާން ޕީޕީއެމްއިން ވަކިވެވަޑައިގަތީ، އިންތިހާބުގައި ޕީޕީއެމްއަށް ނާކާމިޔާބީއާ ކުރިމަތިލާންޖެހިފައިވާ ދަނޑިވަޅެއްގައެވެ. އޭނާ ވަނީ ކެމްޕެއިން ޖަލްސާތަކުގައި އާއި ޓީވީ ސޯތަކުގައި ރައީސް އަބްދުﷲ ޔާމީނަށް ވަރަށް ބޮޑަށް ތައުރީފް ކުރައްވައި އަދި އިދިކޮޅު ޕާޓީތަކަށާއި ރައީސް މުހައްމަދު ނަޝީދަށް ފާޑު ވިދާޅުވެފަ އެވެ.
އަލްހާން ކުރިން ވިދާޅުވީ، ރައީސް އަބުދުﷲ ޔާމީން 60 ޕަސެންޓް ވޯޓުން އިންތިޚާބު ކާމިޔާބުކުރައްވާނެކަމަށެވެ. އަދި ޕީޕީއެމްގެ ވެރިކަން 500 އަހަރަށް ދެމެހެއްޓިދާނެކަމަށް ވެސް ވިދާޅުވަމުން ގެންދެވިއެވެ. ނަމަވެސް އިންތިޚާބުގެ ނާކާމިޔާބީއަށް ފަހު، އަލްހާން ގެންދަވަނީ އިންތިހާބީ ރައީސް އިބްރާހިމް މުހައްމަދު ސޯލިހު އަށް ތާއިދު ކުރައްވައި ވާހަކަ ދައްކަވަމުންނެވެ. އަލްހާން ވިދާޅުވާ ގޮތުގައި އިބޫއަކީ އޭނާގެ "ޑްރީމް ޕްރެސިޑެންޓް" އެވެ.
އަލްހާން ބުދަ ދުވަހު ރައީސް ޔާމީނަށް ފޮނުއްވި ސިޓީއެއްގައި ބުނެފައިވަނީ އޭނާއަށް ރައްޔިތުންނަށް އެންމެ ރަނގަޅަށް ހިދުމަތް ކުރެވޭނީ ރައްޔިތުންގެ ބޮޑު އަޣުލަބިއްޔަތެއް އޮތް އިދިކޮޅު އިއްތިހާދާއެކު ކަމަށް ގަބޫލުކުރާ ކަމަށެވެ. މިހާރު ޕީޕީއެމްގައި މަސައްކަތް ކުރަން ވެސް ހުރަސްތަކެއް ހުރުމުން ޕާޓީއިން ވަކިވާން ނިންމީ ކަމަށް ބުނެފައިވެ އެވެ.
އެމްޑީޕީގެ ކުރީގެ ނައިބު ރައީސް އަދި ރައްޔިތުންގެ މަޖިލީހުގެ ކުރީގެ މެންބަރުކަން ކުރެއްވި އަލްހާން އެންމެ ފުރަތަމަ ހަރަކާތްތެރިވީ ރައީސް މައުމޫންގެ އަރިހުގައި ޑީއާރްޕީގަ އެވެ. އޭގެފަހުން ކުލަގަދަ ޖަލްސާއެއްގައި އެމްޑީޕީއާ ގުޅިވަޑައިގަތެވެ. އެމްޑީޕީ ތެރެއިން ނިއު އެމްޑީޕީއެއް އުފައްދަން އުޅުއްވުމަށްފަހު ޖުމްހޫރީ ޕާޓީއާ ގުޅިވަޑައިގެތެވެ. އަނެއްކާ އެ ޕާޓީއިން ވެސް ވަކިވެ، އެމްޑީޕީއާ ގުޅުނެވެ. އެމްޑީޕީއިން އޭނާ އެ ފަހަރު ވަކިކުރީ އެވެ.
