ވެށިފަހި މާލެ ޕްރޮގްރާމުގެ ދަށުން ދައުލަތަށް މިލްކުވެފައިވާ 103 ބިން ވިއްކަން އިއުލާނުކޮށްފި

ވެށިފަހި މާލެ ޕްރޮގްރާމުގެ ދަށުން ދައުލަތަށް މިލްކުވެފައިވާ ބިންތައް ވިއްކުމަށް އިއުލާނު ކޮށްފިއެވެ.

އެގޮތުން މާލޭގެ ހަތަރު އަވަށާއި، ވިލިމާލެއާ އެކު 103 ބިމެއް ވިއްކާލުމަށް ވަނީ ނިންމާފައެވެ. އެންމެ ގިނަ ބިން ވިއްކާލުމަށް އިއުލާނު ކޮށްފައި ވަނީ މާފަންނުންނެވެ. އެގޮތުން 41 ބިމެއް ވިއްކުމަށް އިއުލާނުކޮށްފައިވާ އިރު މައްޗަންގޯޅިން 23 ބިމެއް ވިއްކާލުމަށް ވަނީ ނިންމާފައެވެ. މީގެ އިތުރުން ގަލޮޅާއި ހެންވޭރުން 14 ބިމެއް ވިއްކާލުމަށް އިއުލާނުކޮށްފައިވާއިރު ވިލިމާލެއިން 11 ބިމެއް ވިއްކާލުމަށް ވަނީ އިއުލާނުކޮށްފައެވެ.

މި ބިންތައް ދިނުމުގައި އެބިންތައް ހިމެނޭ ގޯތިތަކުގެ ބެހެނިވެރިންނަށާއި އެ ބިންތަކާއި އިންވެގެންވާ ގޯތިތަކުގެ ވެރިންނަށް ވެސް ފުރުސަތު ލިބިގެންދާނެއެވެ. ބިން ގަންނަން ޝައުގުވެރިވާ ފަރާތްތަކުން ވެށިފަހި މާލެ ޕްރޮގްރާމްގެ ދަށުން ދައުލަތަށް މިލްކުވެފައިވާ ބިންތައް ވިއްކުމާ ބެހޭ އުސޫލުގައިވާ ފޯމު ފުރިހަމަކޮށް، އެފަރާތެއްގެ ދިވެހިރައްޔިތެއްކަން އަންގައިދޭ ކާޑުގެ އަސްލާ އެއްގޮތް ކަމަށް ތައްގަނޑު ޖަހާފައިވާ ކޮޕީއާއި، ވެށިފަހި މާލެ ޕްރޮގްރާމުގެ ދަށުން ދައުލަތަށް މިލްކުވެފައިވާ ބިންތައް ވިއްކުމާބެހޭ އުސޫލުގައިވާ ފޯމުގައި ހުށަހަޅަންޖެހޭނެކަމަށް ބަޔާންކޮށްފައިވާ ލިޔެކިއުންތައް 21 އޮކްޓޯބަރުގެ ނިޔަލަށް ފޯމު ހުށަހެޅުމަށް އެދޭ ކަމަށް އެމިނިސްޓްރީން ބުނެއެވެ.

ބިން ވިއްކުމަށް ކަނޑައަޅާފައިވަނީ އަކަފޫޓެއް 2000ރ. އަށެވެ.