ވިލާތުގެ އިއްތިޙާދުން ރައީސް އަބްދުﷲ ޔާމީންގެ ސަރުކާރުގެ އިސްވެރިންނާއި، އެމަނިކުފާނުގެ އަރިސް ބޭފުޅުން ހިމެނޭ ގޮތަށް 41 ބޭފުޅަކާއި ދެކޮޅަށް ދަތިކުރުމުގެ ފިޔަވަޅު އަޅަން ލިސްޓެއް ތައްޔާރުކޮށްފައި ނެތްކަމަށާއި، ތައްޔާރުކޮށްފައި އޮތްނަމަ، އެލިސްޓެއް އެމަނިކުފާނަށް އެނގިވަޑައިގަންނަވާނެކަމަށް ރާއްޖެއިން ވިލާތުގެ އިއްތިޙާދަށް ކަނޑައަޅާފައި ހުންނަވާ ސަފީރު އަހުމަދު ޝިޔާން ވިދާޅުވެއްޖެއެވެ. 

ފިޔަވަޅު އަޅާ 41 ފަރާތެއްގެ ނަން ހިމެނޭ ލިސްޓެއް އެބައޮތްކަމަށް ވިލާތުގެ އިއްތިޙާދުގެ ޤާނޫނު ހަދާ މަޖިލީހު (ޔޫރަޕިއަން ޕާލަމެންޓް)ގެ މެމްބަރުންތަކެއް ވިދާޅުވުމާއި ގުޅިގެން ރާއްޖެ.އެމްވީ އާއި ވާހަކަ ދައްކަވަމުން ޝިޔާން ވިދާޅުވީ ޔޫރަޕިއަން ޕާލަމެންޓް މެމްބަރުންނަށް އެފަދަ ލިސްޓެއް އޮތަސް ނުލިބޭނެކަމަށެވެ. އަދި ދަތިކުރުމުގެ ފިޔަވަޅުތައް އެޅޭނީ އެކަމަށްޓަކައި އެކުލަވާލާފައިވާ އޮނިގަނޑުގެ އެނެކްސްއަށް ނަންތައް އިތުރުކޮށްގެންކަމަށާއި، އެ އެނެކްސްއަށް ނަންތައް އިތުރުކުރާނަމަ އެކަން ކުރާނީ ޔޫރަޕިއަން އެކްސްޓާރނަލް އެކްޝަން ސަރވިސަސްގެ ފިޔަވަޅު އަޅާ ޓީމުން، ވަރަށް ސިއްރިޔާތުގައިކަމަށެވެ. އީޔޫ ޕާލަމެންޓް މެމްބަރުން އެވިދާޅުވާ ލިސްޓެއް ނޯންނާނެކަމަށް ތަކުރާރުކޮށް ވިދާޅުވަމުން ޝިޔާން ވިދާޅުވީ އެފަދަ ލިސްޓެއް އެކުލަވާލާނަމަ އެކަން އެމަނިކުފާނަށް އެނގިވަޑައިގަންނަވާނެކަމަށާއި، އެމަނިކުފާނަށް އަންގާނެކަމަށެވެ.

މީގެ އިތުރުން ޝިޔާން ވިދާޅުވީ ފިޔަވަޅު އަޅާ ފަރާތްތަކުގެ ލިސްޓެއް އެކުލަވާލާނީ އީޔޫ ކައުންސިލުން ބައްދަލުވުމެއް ބޭއްވުމަށްފަހުކަމަށާއި، މިވަގުތު އީޔޫގެ އެޖެންޑާގައި ރާއްޖޭގެ ވާހަކައެއް ނެތްކަމަށެވެ.

ފިޔަވަޅު އަޅާ ފަރާތްތަކުގެ ލިސްޓެއް އެބައޮތްކަމަށް ވިލާތުގެ އީޔޫ ޕާލަމެންޓް މެމްބަރުން ވިދާޅުވުމާއި ގުޅިގެން ދިވެހި ސަރުކާރުންވެސް ވަނީ އެކަން ދޮގުކޮށްފައެވެ. ސަރުކާރުގެ ފަރާތުން ވިލާތުގެ އިއްތިޙާދުގައި ލޮބީކުރައްވާ އެންމެ އިސް ވަޒީރު، ފިޝަރީޒް މިނިސްޓަރ ޑރ. މުހައްމަދު ޝައިނީ ރާއްޖެ.އެމްވީ އާއި ވާހަކަ ދައްކަވަމުން ވިދާޅުވީ، އެވާހަކައަކީ ކުރިއަށް އޮތް ރިޔާސީ އިންތިޚާބަށް ނުފޫޒު ފޯރުވުމަށް ދައްކާ ވާހަކަތަަކެއް ކަމަށެވެ. އަދި ވިލާތުގެ އިއްތިޙާދުން އެކުލަވާލި ފްރޭމްވަރކްގެ ފަހުން ފިޔަވަޅުތަކާއި ބެހޭ ގޮތުން އިތުރު މަސައްކަތެއް ކުރެވިފައި ނުވާކަމަށް ޝައިނީ ވިދާޅުވިއެވެ.

ޔޫރަޕިއަން ޕާލަމެންޓްގެ މެމްބަރު ތޯމަސް ޒެޗޮވްސްކީ ޔޫރަޕިއަން ޕާލިމެންޓްގެ މެމްބަރުންގެ ހަބަރުތައް ގެނެސްދޭ ވެބްސައިޓެއް ކަމަށްވާ އީޕީ ޓުޑޭއަށް ދެއްވި އިންޓަވިއުއެއްގައި ވިދާޅުވީ ރާއްޖޭގެ ވަކިވަކި ފަރުދުންނާ ދެކޮޅަށް ފިޔަވަޅު އެޅުމަށް ނިންމައި، ތައްޔާރުކޮށްފައިވާ ލިސްޓް ފެނިފައިވާ ކަމަށާއި އެ ލިސްޓްގައި 41 ނަމެއް އޮތްކަން އެނގޭ ކަމަށެވެ. އެއީ ވަކިވަކި ފަރުދުންނާ ދެކޮޅަށް އެޅުމަށް ނިންމާފައިވާ ފިޔަވަޅުތަކެއް ކަމަށާއި މިއީ އެކަން ތަންފީޒުކުރަންވީ ވަގުތު ކަމަށް ވެސް އޭނާ ވިދާޅުވިއެވެ. ހަމައެހެންމެ އެއީ ވަރަށް ސާފު ސީދާކޮށް ނިންމާފައިވާ ނިންމުމެއް ކަމަށް ވެސް އޭނާ ވިދާޅުވިއެވެ.

މިކަމާއި ގުޅިގެން ރާއްޖޭގެ ސީނިއަރ ޑިޕްލޮމެޓެއް ވިދާޅުވީ ފިޔަވަޅު އަޅާ ފަރާތްތަކުގެ ރަސްމީ ލިސްޓެއް ނެތަސް، ފިޔަވަޅު އެޅުމުގެ ފްރޭމްވަރކް އެކުލަވާލާއިރު ނުރަސްމީ ލިސްޓެއް ގެންގުޅުމަކީ ގާތްކަމެއްކަމަށެވެ. އަދި އެފަދަ ނުރަސްމީ ލިސްޓެއް ދިވެހި ސަރުކާރަށް ނުވަތަ ދިވެހި ސަރުކާރު ތަމްސީލްކުރާ ފަރާތަކަށް ނުދައްކާނެކަމަށާއި، އެދައްކައިފިނަމަ ފިޔަވަޅުތަކުގެ އަސަރުކުޑަ ވެދާނެކަމަށް އޭނާ ވިދާޅުވިއެވެ. އަދި ރަސްމީކޮށް ދަތިކުރުމުގެ ފިޔަވަޅުތަކުގެ ފްރޭމްވަރކްގެ އެނެކްސްގައި އެނަންތައް ނުހިމެނުމަކީ އެފަދަ ނުރަސްމީ ލިސްޓެއް ނެތްކަމަށް ދެއްކޭނެ ހުއްޖަތެއް ނޫންކަމަށް އޭނާ ވިދާޅުވިއެވެ. އެހެންކަމުން ސަރުކާރުން އެފަދަ ލިސްޓެއް ނެތްކަމަށް ވާހަކަ ދެއްކިޔަސް، ލިސްޓެއް އޮތުމުގެ ފުރުސަތު އެބައޮތްކަމަށާއި، ދިވެހި ސަރުކާރަށްވުރެ ބޮޑަށް އެކަން އެނގޭނީ ޔޫރަޕިއަން ޕާލަމެންޓް މެމްބަރުންނަށްކަމަށްވެސް އޭނާ ވިދާޅުވިއެވެ.