ދިރާގުން ބޮޑު އީދަށް ބޮޑު ޑޭޓާ ޕެކް ތަކެއް!

ދިވެހިރާއްޖޭގައި މުއާސަލާތީ ހިދުމަތް އެންމެ ފުޅާކޮށް ފޯރުކޮށްދޭ ކުންފުނި ކަމަށްވާ ދިރާގުން ބޮޑު އީދާ ދިމާކޮށް ޑޭޓާ ޕެކްތަކެއް ތައާރަފް ކޮށްފިއެވެ.

އެގޮތުން ދިރާގުން އީދަށް މުޅިން އާ ދެ ޕެކޭޖެއް ވަނީ ތައާރަފް ކޮށްފައެވެ. އަދި އެ ޕެކޭޖްތަކުގެ އަގު ވަނީ ވަރަށް ބޮޑަށް ހެޔޮކޮށްފައެވެ. އެގޮތުން ދިރާގުގެ ފުރަތަމަ ޕެކޭޖްއި 250 ރުފިޔާއަށް 5 ޖީބީގެ ޑޭޓާ ލިބޭއިރު ދެވަނަ ޕެކޭޖްއިން 350 ރުފިޔާއަށް 10 ޖީބީގެ ޑޭޓާ ލިބެއެވެ.

އެ ޑޭޓާ ޕެކް ތައް ބައްލަވައިގަތުމަށް ދިރާގު އެޕް ބޭނުން ކުރެވޭނެއެވެ. އަދި #*123*6*5 އަށް ގުޅައިގެން ނުވަތަ ADD (space) Keyword ޖެއްސެވުމަށް ފަހު 343 އަށް އެސް އެމް އެސް ކުރައްވައިގެންވެސް އެ ޑޭޓާ ޕެކްތައް ގަނެވޭނެއެވެ. ފަސް ޖީބީގެ ޑޭޓާ ގަތުމަށް ބޭނުންކުރާ ކީވޯޑަކީ "EID 5GB" އަދި 10 ޖީބީގެ ޑޭޓާ ގަތުމަށް ބޭނުންކުރާ ކީވޯޑަކީ "EID 10GB" އެވެ.

އެ ޑޭޓާ ޕެކްތައް ދިރާގު މޯބައިލް ޕޯސްޓްޕެއިޑް ހުރިހާ ކަސްޓަމަރުންނަށް އަދި ދިރާގު އައު ޕްރީޕެއިޑް ގެންގުޅުއްވާ ކަސްޓަމަރުންގެ އިތުރުން ޝޭރާ (ބަންގްލަދޭޝް) ސިމްކާޑު ގެންގުޅޭ ފަރާތްތަކަށް 17 އޮގަސްޓްއިން ފެށިގެން 20 އޮގަސްޓްގެ ނިޔަލަށް އެކްޓިވޭޓް ކުރެވޭނެ ކަމަށް ދިރާގުން ބުނެއެވެ.

ދިރާގު ޕޯސްޓް ޕެއިޑް ކަސްޓަމަރުންނަށް އެ ޑޭޓާ ޕެކްތައް 30 އޮގަސްޓް 2018ގެ ނިޔަލަށް ބޭނުން ކުރެވޭނެއެވެ. އަދި ދިރާގު ޕްރީޕެއިޑް ކަސްޓަމަރުންނަށް ޑޭޓާ ޕެކް އެކްޓިވޭޓް ކުރައްވާ ދުވަހުން ފެށިގެން 10 ދުވަސް ވަންދެން ބޭނުން ކުރެވޭނެއެވެ.