މެޑަމް ފާތުންއާ ދެކޮޅަށް ތުޅާދޫއިން ގިނަ ބަޔަކު ނުކުމެ އަޑު އުފުލައިފި
15 އޯގަސްޓު 2018 | ބުދަ 19:48އެކަމަނާއާއި މަރުހަބާ ކިއުމަށް ނުކުތް މީހުންނަށް ވުރެ ގިނައީ ދެކޮޅަށް އަޑުއުފުލުމަށް ނުކުތް މީހުން
ތުޅާދޫގެ ގިނަ ބަޔަކު މެޑަމް ފާތުން އާ ދެކޮޅަށް ނުކުތް
ރިޔާސީ ދެ ވަނަ ދައުރަކަށް ރައީސް އަބްދުﷲ ޔާމީން ހޮއްވެވުމަށް ތާއިދު ހޯއްދެވުމަށްޓަކައި، އެ މަނިކުފާނުގެ އަނބިކަނބަލުން ފާތުމަތު އިބްރާހިމް ދީދީ ބ. ތުޅާދޫއަށް ވަޑައިގަތުމުން، އެރަށުގެ ގިނަ އަދަދެއްގެ ބަޔަކު ނުކުމެ، އެކަމާއާ ދެކޮޅަށް އަޑު އުފުލައިފި އެވެ.
އެމްޑީޕީގެ ބޮޑު އަޣުލަބިއްޔަތެއް އޮންނަ ތުޅާދޫ އަށް ބުދަ ދުވަހު ހަވީރު ފާތުމަތު އިބްރާހިމް ވަޑައިގެންނެވިއިރު، އެކަމަނާ އަށް މަރުހަބާ ކިޔުމަށް ޕީޕީއެމްގެ ސަޕޯޓަރުން ބަނދަރު ސަރަހައްދަށް ނިކުމެ ތިއްބެ އެވެ. އޭރު، އެކަމަނާއާ ދެކޮޅަށް އަޑު އުފުލުމަށް ވެސް ގިނަ އަދަދެއްގެ ބަޔަކު ބަނދަރު ސަރަހައްދަށް ޖަމާވެފައި ވެއެވެ.
ފާތުމަތު އިބުރާހިމް ތުޅާދޫއަށް ފައިބައިވަޑައިގަތުމާއެކު، އެކަމަނާއާ ދެކޮޅަށް އެއްވެފައި ތިބި މީހުން ރައީސް ޔާމީން އިސްތިއުފާ އަށް ގޮވަމުން ދިޔަ އެވެ. އަދި ފާތުމަތު އިބްރާހިމް އަށް ނިސްބަތްކުރައްވައި އެކިއެކި ޝުއޫރުތައް ފާޅުކަރަމުން ދިޔަ އެވެ.
"ރައީސް ޔާމީން އިސްތިއުފާ" އަށް ގޮވަމުންދިޔަ އަޑު ފަޑުކުރުމަށްޓަކައި، ޕީޕީއެމްގެ ސަޕޯޓަރުން ދިޔައީ "ރައީސް ޔާމީން 2018" ގޮވަމުންނެވެ. ނަމަވެސް މަރުހަބާ ކިޔަން ތިބި މީހުންނާ ސަލާމްކުރުމުގައި ގިނަ އިރުތަކެއް ނުވަނީސް ސެކިއުރިޓީ އޮފިސަރުން ފާތުމަތު އިބްރާހިމް ދުރަށް ގެންދެވި މަންޒަރު ޓީވީން ފެނިގެން ދިޔަ އެވެ.
ދަތުރުފުޅު ނިންމާލެއްވުމަށް ފަހު ބަނދަރު މައްޗަށް ފާތުމަތު އިބްރާހިމް ދީދީ ވަޑައިގަތީ އެ ރަށުގެ ސިއްހީ މަރުކަޒުގެ އެމްބިއުލާންސްގަ އެވެ. އެކަމާ ގިނަ ބަޔަކު ދަނީ ސޯޝަލް މީޑިއާގައި ފާޑުކިޔަމުންނެވެ.
