ރިލްވާން މަރުވެފައިވާ ކަމަށް ވިދާޅުވިތާ މާގިނަ އިރެއް ނުވަނީސް ރައީސް މައާފަށް އެދިވަޑައިގެންފި!
7 އޯގަސްޓު 2018 | އަންގާރަ 14:02ރައީސް ފަހުން ވިދާޅުވީ އިރާދަކުރެއްވިއްޔާ ރިލްވާން އަދި ފެންނާނެ ކަމަށް
ރިލްވާން އޭނާގެ މަންމައާ އެކު
މިނިވަން ނޫހުގެ ނޫސްވެރިޔާ އަހުމަދުރިލްވާން މަރުވެފައިވާ ކަމަށް ވިދާޅުވިތާ މާގިނަ އިރެއް ނުވަނީސް އެހެން ވިދާޅުވެވުނީތީ ރައީސް އަބްދުﷲ ޔާމީން މައާފަށް އެދިވަޑައިގެންފިއެވެ.
ރިލްވާން ހޯދަން ވަޒީރުންގެ މަޖިލީހުގެ ފެންވަރުގައި ކުރަމުން ދިޔަ މަސައްކަތްތައް ހުއްޓުވާލީ ރައީސް އަބްދުﷲ ޔާމީން ކަމަށް ކުރީގެ ނާއިބު ރައީސް އަހުމަދު އަދީބު ވިދާޅުވުމާ ގުޅިގެން އެއަށް ރައްދު ދެއްވައި ގދ. މަޑަވެލީގައި ވާހަކަ ދައްކަވަމުން ރައީސް ޔާމީން ވިދާޅުވީ ރިލްވާން މަރުވެފައިވާ ކަމަށް ޝައްކު ނުކުރައްވާ ކަމަށެވެ. ނަމަވެސް އެ އަތޮޅު ފަރެސްމާތޮޑާ އަށް ވަޑައިގެން ރައީސް ވަނީ އެ ވާހަކަތަކަށް މައާފަށް އެދިވަޑައިގެންފައެވެ. އަދި އިރާދަކުރެއްވިއްޔާ ރިލްވާން ފެންނާނެ ކަމަށް ރައީސް ވިދާޅުވިއެވެ.
ގދ. އާއި ގއ. އަތޮޅަށް ކުރައްވަމުން ގެންދަވާ ދަތުރުފުޅުގައި ފަރެސްމާތޮޑާ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ މަޑަވެލީގައި އެ މަނިކުފާނު ދެއްކެވި ވާހަކަ ރައްޔިތުންނަށް އޮޅޭ ގޮތަށް ނޫސްތަކުން ޚަބަރު ފަތުރާފައިވާ ކަމަށެވެ. އެގޮތުން، އެ މަނިކުފާނު ދެއްކެވި ވާހަކަ އޮޅޭ ގޮތަށް ތަރުޖަމާ ކުރަމުންދާ ކަމަށް ވިދާޅުވި އެވެ.
ރައީސް ވިދާޅުވީ މަޑަވެލީގައި އެ މަނިކުފާނު ވިދާޅުވި ވާހަކަފުޅަކީ ރިލްވާންގެ މައްސަލައިގައި ކުރީގެ ނައިބު ރައީސް އަހުމަދު އަދީބު ދެއްކެވި ވާހަކައަކީ ދޮގުކަން ހާމަ ކޮށްދިނުމަށް ވިދާޅުވި ވާހަކަތަކެއް ކަމަށެވެ. އެ ވާހަކަފުޅު ދެއްކެވީ ރިލްވާން މަރު ސާބިތު ކުރުން ނޫން ކަމަށް ރައީސް ވިދާޅުވި އެވެ.
""އަޅުގަނޑު މިއީކީ ޝަރުއީ ގޮތުން މީހަކު މަރުވިތޯ ނޫންތޯ ނިންމާ މީހާއެއް ނޫން،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ރިލްވާން ހޯދުމަށް ކެބިނެޓުގައި މަސައްކަތް ކުރެއްވި ކަމަށް އަދީބު ހާމަކުރެއްވިޔަސް، އެއީ ހަގީގަތެއް އެކުލެވޭ ވާހަކައެއް ނޫން ކަމަށެވެ. އަދި އިރާދަ ކުރެއްވިއްޔާ ރިލްވާން މަރެއް ނުވާނެ ކަމަށާއި އޭނާ ހޯދޭނެ ކަމަށް ރައީސް ވިދާޅުވިއެވެ. އަދި އެހެން ވިދާޅުވެވުނީތީ މާއާފަށް އެދިވަޑައިގަތެވެ.
"ﷲގެ ރަހުމަތުން، އިރާދަކުރެއްވިއްޔާ ރިލްވާން މަރެއް ނުވާނެ. އަޅުގަނޑުމެންނަށް އޭނަ ހޯދޭނެ ވެސްމެ" ރައީސް ޔާމީން ވިދާޅުވިއެވެ.
އޮގަސްޓް، 2014 ގައި ވީނުވީއެއް ނޭނގި ގެއްލިފައިވާ ރިލްވާން ގަދަކަމުން ފޮރުވި ކަމަށް ބުނެ ދައުލަތުން ޓެރަރިޒަމްގެ ދައުވާކުރި ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށް ކުރި ދައުވާ ސާބިތު ނުވާ ކަމަށް ކްރިމިނަލް ކޯޓުން މިދިޔަ ހަފުތާގައި ވަނީ ހުކުމްކޮށްފަ އެވެ. ދައުލަތުން ތުހުމަތު ކުރަނީ ރިލްވާން ގަދަކަމުން ފޮރުވީ އާލިފް ގެންގުޅުނު ރަތް ކުލައިގެ ކާރަށް ރިލްވާން ގަދަކަމުން އަރުވައިގެން ގެންގޮސް ކަމަށެވެ. އެކަމަކު، އެ ދައުވާ އެ ދެ މީހުންގެ މައްޗަށް ސާބިތެއް ނުވެ އެވެ.
