ބަރަހަނާ ވެބްސައިޓުތައް ބްލޮކް ކުރާނަންތޯ ސުވާލު ކުރުމުން، ޝަހީމް ޖަވާބެއް ނުދެއްވި!
7 އޯގަސްޓު 2018 | އަންގާރަ 07:52ޝަހީމް ވިދާލުވީ މެލޭޝިއާ ދަތުރާ ގުޅޭ ސުވާލުތައް ކުރުމަށް
މެލޭޝިއާއަށް ކުރެއްވި ހަތަރު ދުވަހުގެ ދަތުރުފުޅަށްފަހު، މީޑިއާތަކަށް މައުލުމާތު ދެއްވަނީ
ބަރަހަނާ ވެބްސައިޓުތަކަށް ރާއްޖެއިން ނުވަދެވޭ ގޮތަށް ބްލޮކް ކުރާނަންތޯ ޕީޕީއެމްގެ ރިޔާސީ ކެންޑިޑޭޓުގެ ރަނިންމޭޓް ޑރ. މުހައްމަދު ޝަހީމް އަލީ ސައީދާ ސުވާލު ކުރުމުން، އޭނާ އެ ސުވާލަށް ޖަވާބު ދެއްވަން ފަސްޖެހިވަޑައިގެންފިއެވެ.
މެލޭޝިއާއަށް ކުރެއްވި ޕީޕީއެމް ކެމްޕެއިން ދަތުރުފުޅަށްފަހު އެނބުރި މާލެ ވަޑައިގެންނެވުމުން، "ރާއްޖެއެމްވީ"ން އެ ސުވާލު ޝަހީމާ ކުރެއްވުމުން އޭނާ ވިދާޅުވީ މެލޭޝިއާއަށް ކުރެއްވި ދަތުރާ ގުޅޭ ގޮތުން ސުވާލު ކުރުމެވެ.
ނަމަވެސް ދަތުރާ ނުގުޅޭ ބައެއް އެހެން ސުވާލުތައް "ރާއްޖެއެމްވީ" ކުރުމުން ޝަހީމް ވަނީ ޖަވާބު ދެއްވާފައެވެ. އެގޮތުން ޕީޕީއެމްގެ ރިޔާސީ ކެންޑިޑޭޓުގެ ގޮތުގައި ރައީސް އަބްދުﷲ ޔާމީން ކެންޑިޑޭސީ ހުށަހެޅުއްވުން ލަސްވެގެންދަނީ ކީއްވެގެންތޯ ސުވާލު ކުރުމުން ޝަހީމް ވިދާޅުވީ ކަނޑައެޅިފައިވާ ދުވަހަށް އެކަން ޕާޓީން ކުރާނެ ކަމަށެވެ.
ޝަހީމް އެގޮތަށް ވިދާޅުވެފައި ވަނީ، އިސްލާމް ދީން ސިޔާސީ ހަތިޔާރަކަށް ނަގައިގެން މަސައްކަތް ކުރާ ޕީޕީއެމްގެ ސަރުކާރުން ބަރަހަނާ ވެބްސައިޓުތައް ރާއްޖެއިން ނުވެދެވޭ ގޮތަށް ބްލޮކްކޮށްފައި ނުވާތީ ސަރުކާރަށް ފާޑުކިޔުން އަމާޒުވެފައި ވަނިކޮށެވެ.
ޕްރޮސެކިއުޓާ ޖެނަރަލް (ޕީޖީ)ގެ މަގާމުގައި މުހުތާޒު މުހުސިން ހުންނެވިއިރު، ބަރަހަނާ ވެބްސައިޓުތައް ރާއްޖެއިން ބްލޮކް ކުރުމަށް މި ސަރުކާރުގެ އިދާރާތަކަށް އެންގުމުން އެކަމަށް ސަރުކާރުން އަމަލުކޮށްފައެއް ނުވެއެވެ.
