ކޯލިޝަން ސަރުކާރެއްގައި ފަނޑިޔާރުގެއަށް އަތެއް ނުބާނާނަން: ފައިސަލް
3 އޯގަސްޓު 2018 | ހުކުރު 19:33ގުޅިފައިވާ ޕާޓީތަކުން ތަފާތުކުރުމެއް ނެތި އިންސާފުގާއިމްކޮށްދޭނަން
ކާށިދޫ ދާއިރާގެ ރައްޔިތުންގެ މަޖިލީހުގެ މެމްބަރު އަދި ކޯލިޝަންގެ ރަނިންގމޭޓް ފައިސަލް ނަސީމް
ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ފަނޑިޔާރުގެއަށް އަތް ނުބާނާނެ ކަމަށް އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގެ ރަނިންގމޭޓް ފައިސަލް ނަސީމް ވިދާޅުވެއްޖެއެވެ.
ޖުމްހޫރީ ޕާޓީގެ 10 ވަނަ އަހަރީ ދުވަސް ފާހަގަކުރުމަށް ހުކުރު ދުވަހުގެ ރޭ މ.ކުނޫޒްގައި ބޭއްވި ޖަލްސާގައި ވާހަކަފުޅު ދައްކަވަމުން ފައިސަލް ވިދާޅުވީ ދިވެހި ރައްޔިތުން އެދި ގޮވަމުން ދަނީ އިންސާފު ގާއިމްކޮށްދިނުމަށް ކަމަށެވެ. ގުޅިފައިވާ ޕާޓީތަކުން އިންސާފު ގާއިމްކޮށްދޭނެ ކަމުގެ ޔަގީންކަން ދިވެހި ރައްޔިތުންނަށް އަރުވާކަމަށް ފާހަގަކުރައްވާ ފައިސަލް ވިދާޅުވީ ވަކި ގޮތަކަށް މައްސަލަ ނިންމަން ފަނޑިޔާރުގެއަށް އަތް ނުބާނާނެ ކަމަށެވެ.
"ކޯލިޝަން ސަރުކާރަކީ ދުވަހަކު ވެސް ފަނޑިޔާރުގެ ތެރެއަށް އަތްބާނާ އިންސާފާ ކުޅޭނެ ސަރުކާރެއް ނޫން" ފައިސަލް ވިދާޅުވިއެވެ.
ކޯލިޝަންގެ ސަރުކާރެއްގައި މިނިވަން މުއައްސަސާތަކުގެ ވެރިންނަން މިނިވަންކަމާއި އެކު މަސައްކަތް ކުރުމުގެ ފުރުސަތު އޮންނާނެ ކަމަށް ފައިސަލް ވިދާޅުވިއެވެ. ގުޅިފައިވާ ޕާޓީތަކުން މިއަދު މަސައްކަތް ކުރަނީ ސިޔާސީ ފިކުރު އެއްކިބާ ކޮށްފައިވާ ގައުމީ މަސައްކަތެއްގެ ގޮތުގައި ކަމަށާއި އެހެންކަމުން ގުޅިފައިވާ ޕާޓީތަކުގެ ވެރިކަމެއްގައި ތަފާތު ކުރުމެއް ނުގެންގުޅޭނެ ކަމަށް ފައިސަލް ވިދާޅުވިއެވެ. އަދި އެކަން ތަރައްގީގެ މަޝްރޫއުތައް ހިންގާއިރު ވެސް ފެނިގެންދާނެ ކަން ފާހަގަކުރައްވަމުން ފައިސަލް ވިދާޅުވީ ތަރައްގީގެ މަޝްރޫއުތައް ކުރިއަށް ގެންދަން ވަކި ރަށެއް ތަފާތެއް ނުކުރާނެ ކަމަށެވެ.
މީގެ އިތުރުން އިންތިހާބުގެ ރީރަޖިސްޓްރޭޝަންގެ ކަންކަން ކުރިއަށްދާއިރު، ވަކި ގޮތަކަށް ނަތީޖާ ނެރެފާނެ ކަމުގެ އަޑުތައް އަރުވާ ސަރުކާރުން ބިރުދައްކަމުންދާ ކަމަށް ފައިސަލް ވިދާޅުވިއެވެ. އެހެންނަމަވެސް މިއަދު ދިވެހި ގައުމުގެ އެންމެހާ ރައްޔިތުން ތިބީ ވަކި ކަމަކަށް ބޭނުންވެގެން ކަމަށާއި، އެކަންކަން ބަދަލުކުރެވޭނެ ބަޔަކު ނެތް ކަމަށް ފައިސަލް ވިދާޅުވިއެވެ.
