މަސީހުގެ މައްސަލަ އަދިވެސް ބާތިލެއް ނުވޭ : އިދިކޮޅު ކޯލިޝަން
30 ޖުލައި 2017 | އާދީއްތަ 13:59މަސީހުގެ އިތުބާރުނެތްކަމުގެ މައްސަލައިގެ ހުށަހެޅުމަކީ ދެމި އޮތް ސައްޙަ ހުށަހެޅުމެއް
ކުނޫޒްގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރައްޔިތުން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ އަދި ވެސް ބާޠިލު ނުވާ ކަމަށް އިދިކޮޅު ކޯލިޝަނުން ބުނެފިއެވެ.
އާދިއްތަ ދުވަހު މ. ކުނޫޒްގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން ވިދާޅުވީ ރައްޔިތުން މަޖިލީހުގެ ރައީސް މަސީހުގެ އިތުބާރު ނެތްކަމުގެ މައްސަލައިގެ ހުށަހެޅުމަކީ ދެމި އޮތް ސައްޙަ ހުށަހެޅުމެއް ކަމަށާއި އަދިވެސް އެ މައްސަލަ ޤާނޫނީ ބާރުގައި ދެމި އޮންނާނެ ކަމަށް ޤަބޫލުފުޅު ކުރައްވާ ކަމަށެވެ.
މަޖިލީހުގެ ރައީސް މަސީހުގެ އިތުބާރު ނެތް ކަމުގެ މައްސަލަ މަޖިލީހުން ވަނީ ބޭރުކޮށްލާފައެވެ. މިގޮތަށް ކަނޑައަޅާފައި ވަނީ އިސްދޫ ދާއިރާގެ މެންބަރުގެ ސޮއި އަނބުރާ ގެންދަވައި، އެ މައްސަލަ މަޖިލީހަށް ހުށަހަޅާފައިވާ 45 މެންބަރުންގެ ތެރެއިން އިތުރު ހަތަރު މެންބަރުން ، މެންބަރު ކަމުގެ މަޤާމު ގެއްލިފައިވާ ކަމަށް އިލެކްޝަންކޮމިޝަނުން ބުނުމާއެކު މައްސަލަ ހުށަހެޅުމަށް ބޭނުންވާ 42 މެންބަރުންގެ ސޮއި ސައްހަ ނުވާނެ ކަމަށް ބުނެއެވެ.
ރައްޔިތުންގެ މަޖިލީހުގެ ނައިބު ރައީސް މޫސާ މަނިކު ސޮއި ކުރައްވާފައިވާ ސިޓީގައިވަނީ 45 މެންބަރުން ސޮއިކުރައްވާ މަޖިލީހަށް ހުށަހަޅާފައިވާ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ މައްޗަށް ހުށަހަޅާފައިވާ އިތުބާރު ނެތްކަމުގެ މައްސަލަ ހުށަހެޅިފަހުން ސުޕްރީމް ކޯޓުން ނެރުނު ހުކުމްގައިވާގޮތުގެ މައްޗަށް ރިޔާއަތް ކުރާ އިރު މަޑުއްވަރީ ދާއިރާގެ މެންބަރު މުހައްމަދު އަމީތާއި، ދިއްދޫ ދާއިރާގެ މެންބަރު އަބްދުއްލަތީފު މުހައްމަދާއި ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމްގެ އިތުރުން ވިލިނގިލި ދާއިރާގެ މެންބަރު ސައުދު ހުސައިންގެ ގޮޑިއާ އެކު 4 މެންބަރުންގެ ގޮޑި ޖުލައި މަހުގެ 18 ވަނަ ދުވަހު ހުސްވެފައިވާކަން ޔަގީންވެފައިވާ ކަމަށެވެ.
އަލީހުސެއިން އިތުރަށް ވިދާޅުވީ ގޮނޑިގެއްލިފައިވާ ކަމަށް ބުނާ 4 މެމްބަރުން މާދަމާ މަޖިލީހަށް ހާޒިރުކުރެވެން ޖެހޭނެކަމަށާއި ރައްޔިތުން މަޖިލީހުގެ ޤާނޫނޫގެ 205 ވަނަ މާއްދާގައި ރައްޔިތުން މަޖިލީހުގެ މެމްބަރަކު ހައްޔަރުގައި ހުއްޓަސް މަޖިލީސްގެ ޖަލްސާތަކާއި ކޮމެޓީ ބައްދަލުވުންތަކަށް ހާޒިރުކުރަން ލާޒިމްވާނެ ކަމަށެވެ.
"އަޅުގަނޑު ޤަބޫލުކުރާ ގޮތުގައި އެ ހަތަރު މެމްބަރުން ރައްޔިތުން މަޖިލީހަށް ގެނެސްދެއްވަން ޖެހޭނެ. އެއީ އެބޭފުޅުންގެ ހައްޤެއް. އެބޭފުޅުންނަކަށް އަމިއްލައަކަށް ވަޑައެއް ނުގެންނެވޭނެ. އެބޭފުޅުން އެތިބީ ތަނެއްގައި ބަންދުވެފައި. އެބޭފުޅުން ގެނައުމަކީ ރައްޔިތުން މަޖިލީހުގެ ރައީސް ކުރައްވަން ޖެހޭނެކަމެއް. ފުލުހުންގެ މައްޗަށް އަމުރުވެސް ކުރައްވަން ޖެހޭނެ އެ ބޭފުޅުން ގެނައުމަށް. "އަލީ ހުސެއިން ވިދާޅުވިއެވެ.
އިދިކޮޅި ކޯލިޝަނުން ހަތަރު މެމްބަރުން މާދަމާ މަޖިލީހަށް ހާޒިރުނުކޮށްފިނަމަ މަޖިލީހުގެ ތަޅުމުގައި އިހުތިޖާޖް ކުރައްވާނެ ކަމަށްވެސް އިދިކޮޅު ކޯލިޝަނުން ވަނީ ބުނެފައެވެ.
