ރިލްވާން ގެއްލުވާލި މައްސަލައިގެ ދެ ފުށްފެންނަ ތަޙްގީޣެއް ހިންގާނަން: އިބޫ
ރިލްވާން ވީނުވީއެއް ނޭންގި ގެއްލިފައިވަނީ 2014 ވަނަ އަހަރުގެ އޯގަސްޓް 08 ވަނަ ދުވަހުން ފެށިގެން
އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ)
ނޫސްވެރިޔާ އަހުމަދު ރިލްވާން އަބްދުﷲ ވަގަށް ނެގި މައްސަލައިގެ ދެފުށް ފެންނަ ތަހްގީގެއް ގުޅިފައިވާ ޕާޓީތަކުގެ ވެރިކަމެއްގައި ހިންގާ އިންސާފު ހޯދައި ދެއްވާނެ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.
މެލޭޝިއާ އާއި ސިންގަޕޫރަށް ކުރެއްވި ދެ ދުވަހުގެ ކެމްޕެއިން ދަތުރުފުޅު ނިންމާލެއްވުމަށް ފަހު ބުރާސްފަތި ދުވަހު މާލެ ވަޑައިގެން ރިލްވާން ގަދަކަމުން ފޮރުވި ކަމަށް ބުނެ ދެ މީހެއްގެ މައްޗަށް އުފުލި ޓެރަރިޒަމްގެ ދައުވާ ސާބިތުނުވާ ކަމަށް ހުކުމް ކުރުމުން އެކަމަށް އިޝާރަތް ކުރައްވާ ވާހަކަފުޅު ދައްކަވަމުން އިބޫ ވިދާޅުވީ ރިލްވާން ގެއްލުވާލި މައްސަލާގައި އިންސާފުލިބިފައި ނުވާތީ ހިތާމަ ކުރައްވާ ކަމަށެވެ. ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ރިލްވާން ގެއްލުވާލި މައްސަލާގައި ދެފުށް ފެންނަ މިނިވަން އިންސާފުވެރި ތަޙްގީގެއް ހިންގާނެ ކަމަށް އިބޫ ވިދާޅުވިއެވެ.
"އިރާދަކުރެއްވިއްޔާ އަޅުގަނޑުމެންގެ ވެރިކަމެއްގައި ދެ ފުށް ފެންނަ ހާމަކަން ބޮޑު ތަޙްގީގެއް އެކަމުގައި ކޮށް، އިރާދަކުރެއްވިއްޔާ އެކަމުގައި އިންސާފު ހޯދައި ދޭނަން އެކަމުގައި" ރިލްވާން ގެއްލުވާލި މައްސަލައިގެ ތަޙްގީގް ކުރިއަށް ދިޔައީ އިންސާފުން ނޫން ކަމަށް އިޝާރަތް ކުރައްވާ ވާހަކަ ދައްކަވަމުން އިބޫ ވިދާޅުވިއެވެ.
ނޫސްވެރިޔާ ރިލްވާން ގަދަކަމުން ފޮރުވި ކަމަށް ބުނެ ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށް އުފުލި ޓެރަރިޒަމްގެ ދައުވާ ސާބިތުނުވާ ކަމަށް ބުރާސްފަތި ދުވަހު ކްރިމިނަލް ކޯޓުން ވަނީ ހުކުމް ކޮށްފަ އެވެ.
ރިލްވާން ގެއްލުވާލި މައްސަލައިގެ ތަޙްގީގް ކުރިއަށް ދިޔައީ ރަނގަޅަށް ނޫން ކަމަށް އޭރުވެސް ގުޅިފައިވާ ޕާޓީތަކުން ފާހަގަކޮށް، ހާމަކަން ބޮޑު ތަހްގީގްގެއް ކުރުމަށް ފުލުހުންގެ ކިނބައިން އެދިވަޑައިގެންފައިވާނެ ކަމަށް އިބޫ ފާހަގަކުރެއްވިއެވެ،
"ނޫސްވެރިޔާ ރިލްވާން ގެއްލިގެން ދިޔަ ދިއުމާއި ގުޅޭގޮތުން ކުރެވުނު ތަޙްގީގެއްގެ މައްޗަށް ބިނާކޮށް ޝަރީއަތުން ގޮތެއް ނިމިގެން އެދިޔައީ، އަޅުގަނޑު މިއަދު ހިތާމަ ކުރަން އެކަމަށް އިންސާފު ލިބިފައި ނުވާތީ، އަޅުގަނޑުމެން އޭރު ވެސް ބުނަމުން އައީ، ތަޙްގީގްތައް ދަނީ ރަނގަޅަށް ނޫން ކަމަށް، ހާމަކަން ބޮޑު ގޮތެއްގައި އެކަން ނުދާ ވާހަކަ އަޅުގަނޑުމެން އޭރު ވެސް ހާމަކޮށްފައިވާނެ" އިބޫ ވިދާޅުވިއެވެ.
ހުޅުމާލޭގައި ދިރިއުޅެމުންދިޔަ ރިލްވާން 2014 ވަނަ އަހަރުގެ އޮގަސްޓް 8 ވަނަ ދުވަހުގެ ރޭ ގަދަކަމުން ކާރަކަށް ލައިގެން ގެންގޮސް ފޮރުވި ކަމަށް ބުނެ ދައުލަތުން ކޮށްފައިވާ ދައުވާ އިން ދެ މީހުން ސަލާމަތްވީ އެ އަމަލު ހިންގުމުގައި ބައިވެރިވި ކަން އެނގޭނެ އެއްވެސް ހެއްކެއް ގަރީނާއެއް ދައުލަތަށް ދެއްކިފައިނުވާތީ އެވެ.
ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ ކެނޑިޑޭޓަކަށް އިބޫ ކަނޑައެޅުމުން، އެމަނިކުފާނު ވަނީ ރިލްވާންގެ އާއިލާއާއި ނިމިދިޔަ މަސް ތެރޭގައި ބައްދަލު ކުރައްވާފައެވެ.
