ރަށް ދޫކޮށް އެހެން ރަށަކަށް ބަދަލުވާން މަޖުބޫރެއް ނުކުރާނަން: ފައިސަލް
31 ޖުލައި 2018 | އަންގާރަ 22:28ގޯތީގެ މައްސަލައަށް ހައްލެއް ހޯދަދޭނަން
އދ އަތޮޅުގެ ރަށްތަކަށް ފައިސަލް ކުރެއްވި ކެމްޕޭން ދަތުރުގެ ތެރެއިން
ކުދި ރަށްތަކުގައި ދިރިއުޅޭ ރައްޔިތުން އެހެން ރަށަކަށް ބަދަލުކުރަން ގުޅިފައިވާ ޕާޓީތަކުގެ ވެރިކަމެއްގައި މަޖުބޫރު ނުކުރާނެކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ރަނިންގމޭޓް ފައިސަލް ނަސީމް ވިދާޅުވެއްޖެއެވެ.
އދ އަތޮޅަށް ކުރެއްވި ދެ ދުވަހުގެ ކެމްޕެއިން ދަތުރުފުޅުގެ ތެރެއިން ރާއްޖެއެމްވީއަށް މައުލޫމާތު ދެއްވަމުން ފައިސަލް ވިދާޅުވީ ގުޅިފައިވާ ޕާޓީތަކުގެ ވެރިކަމެއްގައި ކުދި ރަށްތަކުގައި ދިރިއުޅޭ ރައްޔިތުން ވަކި ރަށަކަށް "ހިޖުރަކުރަން" މަޖުބޫރު ނުކުރާނެ ކަމަށެވެ. ގުޅިފައިވާ ޕާޓީތަކެއްގެ ވެރިކަމުގައި އަބަދުވެސް ވިސްނުން ގެންގުޅޭނީ ރައްޔިތުން ބޭނުންވާ ކަންކަން ހާސިލްކޮށްދީގެން އެ ރަށެއްގައި ރައްޔިތުންނަން ހަމަޖެހިގެން ދިރިއުޅެވޭނެ މަގު ފަހި ކޮށްދިނުމަށް ކަމަށް އެމަނިކުފާނު ވިދާޅުވިއެވެ.
"އަޅުގަނޑުމެންގެ ސަރުކާރަކުން، އަޅުގަނޑުމެން މަޖުބޫރެއް ނުކުރުވާނަން، ހިޖުރަކުރުމަކީ ރަށްދޫކޮށް އެހެންތަނަކަށް ޖަމާވާން ގޮވާލުމަކީ ނުވަތަ އެގޮތަށް ބާރު އެޅުމަކީ އަޅުގަނޑުމެން ކުރާނެ ކަމެއް ނޫން، އަޅުގަނޑުމެންގެ ސަރުކާރެއްގައި ކޯލިޝަނުން އަބަދުވެސް ވިސްނަމުންދާނީ ރަށުގައި ރައްޔިތުންނަން އުޅެވޭނެ ގޮތެއް،" ރާއްޖެއެމްވީއަށް މައުލޫމާތު ދެއްވަމުން ކާށިދޫ ދާއިރާގެ މެމްބަރުކަން ވެސް ކުރައްވަމުން ގެންދަވާ ފައިސަލް ވިދާޅުވިއެވެ.
އދ އަތޮޅުގެ ރަށްތަކަށް ފައިސަލް ކުރެއްވި ދެ ދުވަހުގެ ދަތުރުގެ ތެރެއިން
އދ ގެ އަތޮޅަށް ކުރެއްވި ދަތުރުފުޅުގައި އެންމެ ބޮޑަށް ފާހަގަކުރެއްވުނު ކަމަކީ ކައުންސިލްތަކުގެ ބާރުވެރިކަން ރައީސް ޔާމީންގެ ސަރުކާރުން ނިގުޅައިގެންފައިވުމުން ރައްޔިތުން އެދޭ ކަންކަން ކައުންސިލްތަކަށް ކޮށްދިނުމަށް ނުކުޅެދިފައިވާ ކަން ކަމަށެވެ. އެގޮތުން ދިރިއުޅުމަށްޓަކައި ދޫކުރާ ބަންޑާރަ ގޯތި ދޫކުރުން ކައުންސިލްތަކުގެ ބާރުވެރިކަމުން ނިގުޅައިގަތުމަކީ ރައްޔިތުންގެ ކަންބޮޑުވެއް ކަމަށް ރައީސް ޔާމީންގެ ސަރުކާރުން އދ އަތޮޅުގެ ރަށްތަކުން ގޯތި ދޫކުރުން ހިފަހައްޓާފައިވުންކަން ފާހަގަކުރައްވަމުން ފައިސަލް ވިދާޅުވިއެވެ.
"ވޭތެވެދިޔަ ހަތަރުވަކަށް އަހަރު، މި ރަށުގެ (ދިގުރަށުގެ) ޒުވާނުންނަން ގޯތި އިނޣޭތޯ، މި ރަށައް ބަލާލާފިނަމަ ގާތްގަނޑަކަށް 40 އަކަށް ގޯއްޗަށް ރައްޔިތުން ވަނީ އެދިފައި، އަޅުގަނޑުމެންނަން މައުލޫމާތު ލިބޭ ގޮތުގައި ގާތްގަނޑަކަށް ހަތަރުވަކަށް އަހަރުވީ، ހަމަ އެކަނި ދޫކޮށްލާށޭ ބުނުން އޮތީ، ދޫކޮށްލާށޭ ބުނުން ފިޔަވާ އެހެން އެއްވެސް ކަމެއް ކުރާކަން ނުޖެހޭ،" ގޯތީގެ މައްސަލައަށް އަލިއަޅުވާލައްވައި ވާހަކަފުޅު ދައްކަވަމުން ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ ކޯލިޝަން ސަރުކާރެއްގައި މިފަދަ މައްސަލަތަކަށް ހައްލު ލިބިގެންދާނެ ކަމަށެވެ. ލާމަރުކަޒީ ނިޒާމު ޖަރުދަނާކޮށް، ކައުންސިލްތަކަށް ގާނޫނީ ގޮތުން ލިބެން ޖެހޭ ބާރުވެރިކަން ހޯދަނޭނެ ކަމަށެވެ. އަދި ރައީސް ޔާމީންގެ ސަރުކާރުން ބައެއް ކައުންސިލް ތަކުގެ ކައުންސިލަރުން ސަސްޕެންޑުކުރިނަމަވެސް، އެފަދަ ކަންކަން ހުއްޓާލަން މިހާރުވެސް ޖެހޭ ކަމަށެވެ. އެއީ ގުޅިފައިވާ ޕާޓީތަކުގެ ވެރިކަމުގައި ގެންގުޅޭނެ ވިސްނުމެއް ނޫން ކަމަށް އެމަނިކުފާނު ވިދާޅުވިއެވެ.
އދ އަތޮޅުގެ ރަށްތަކަށް ފައިސަލް ކުރެއްވި ދެ ދުވަހުގެ ދަތުރުގެ ތެރެއިން
އދ އަތޮޅަށް ކުރެއްވި ކެމްޕެއިން ދަތުރުފުޅުގައި ފައިސަލް ވަނީ އެ އަތޮޅުގެ ހުރިހާ ރަކަށް ވަޑައިގެން ކައުންސިލްތަކާއި ބައްދަލުކުރައްވައި، ރަށުގެ މުހިއްމު ތަންތަން ބައްލަވާފައެވެ. މިދަތުރުގައި ގުޅިފައިވާ ޕާޓީޓަކުގެ އިސްވެރިން ބައިވެރިވަޑައިގަންނަވާއިރު، އދ އަތޮޅުން ފައިސަލަށް ވަނީ ހޫނު މަރުޙަބާއެއް ދަންނަވާފައެވެ.
