އޮޅުވާލައިގެން ރީ ރެޖިސްޓްރޭޝަން ފޯމު ފުރުުވާކަމުގެ ޝަކުވާ ދަނީ ލިބެމުން: އިލެކްޝަންސް
25 ޖުލައި 2018 | ބުދަ 16:48ރީ ރަޖިސްޓްރީ ކުރުމުގައި އޮޅުވާލައިގެން ފޯމު ފުރުވައިފާނެތީ ރައްޔިތުން ސަމާލުވުމަށް ކޮމިޝަނުން އެދޭ
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއް
ރީ ރަޖިސްޓަރީ ކޮށްދިނުމުގެ ނަމުގައި ބައެއް ފަރާތްތަކުން އޮޅުވާލައިގެން ފޯމު ފުރަމުންދާކަމުގެ ޝަކުވާ ލިބެމުންދާކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން ބުދަ ދުވަހުގެރޭ ނެރުނު ބަޔާނެއްގައި ބުނެފައި ވަނީ އެފަދަ ކަންކަން ހިނގާކަމުގެ ޝަކުވާ ލިބެމުންދާތީ އެފަދަ ކަންކަމަށް ހުރިހާ ރައްޔިތުން ވެސް ސަމާލުުވުމަށް އެދޭކަމަށެވެ.
އަދި ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށް ރަޖިސްޓަރީވުމުގެ ފުރުޞަތު ވީހާ ވެސް ގިނަ ރައްޔިތުންނަށް ހޯދައި ދިނުމަށްޓަކައި އިލެކްޝަނުން ކުރާ މަސައްކަތުގައި، ސިޔާސީ ޕާޓީތަކުންނާއި ދައުލަތުގެ އިދާރާތަކުން ކޮށްދޭ މަސައްކަތްތައް ފާހަގަކުރާކަމަށް އެ ކޮމިޝަނުން ބުންޏެވެ.
އިލެކްޝަން ކޮމިޝަނުން މިހެން ބުނެފައިވާއިރު، ރިޔާސީ އިންތިހާބުގައި ރަށްވެހިވެފައިވާ ތަން ނޫން އެހެން ތަނެއްގައި ވޯޓްލުމަށް ރީ ރަޖިސްޓްރީ ވާ ފަރާތްތަކަށް ހާއްސަކޮށް އިލެކްޝަން ކޮމިޝަނުން ތައްޔާރުކޮށްފައިވާ ފޯމުގެ ބަދުލުގައި އެހެން ފޯމެއް ބޭނުންކޮށްގެން ޕީޕީއެމް އިން މީހުން ރީ ރަޖިސްޓްރީކުރުވަން އުޅޭކަމަށް ގުޅިފައިވާ އިދިކޮޅު ފަރާތްތަކުގެ ރިޔާސީ ކެންޑިޑޭޓުގެ ތަރުޖަމާނު މާރިޔާ އަހުމަދު ދީދީ ވެސް ވަނީ ވިދާޅުވެފައެވެ. މާރިޔާ ވިދާޅުވީ ރިޔާސީ އިންތިހާބަށް ރީ ރެޖިސްޓްރީ ކުރުމަށް ޕީޕީއެމުން ގޭގެއަށް ހިފައިގެން ދަނީ މުޅިން ތަފާތު ފޯމެއްކަން ގުޅިފައިވާ ޕާޓީތަކުން ޑޯ ޓު ޑޯ ހަރަކާތް ހިންގަމުން ދިޔައިރު ފާހަގަކުރެވިފައިވާ ކަމަށެވެ.
ރަށްވެހިވެފައިވާ ރަށް ނޫން ތަނެއްގައި ވޯޓްލުމަށް ރީ ރަޖިސްޓަރީ ކުރުމުގެ ފުރުސަތު އަންނަ އޯގަސްޓްމަހުގެ 11 ވަނަ ދުވަހާއި ހަމައަށް ވަނީ ހުޅުވާލައިފައެވެ.
