މިސަރުކާރުގެ ތަރައްގީ ސިޔާސަތުގެ ތެރެއިން އަތޮޅުތެރޭގެ ރައްޔިތުން ބޭނުން ކުރަން ޖެހެނީ ނަޖިސް ފެން: އަލީ ހުސެއިން
އަތޮޅުތެރޭގެ ރަށްތަށް ތަރައްގީ ކުރުމަށް މިސަރުކާރު ވަނީ ފެއިލްވެފައި
ކެންދޫ ދާއިރާގެ މެންބަރު އަލީ ހުސެއިން
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ތަރައްގީގެ ސިޔާސަތުގެ ތެރެއިން އަތޮޅުތެރޭގެ ރަށްރަށުގެ މީހުން ބޭނުން ކުރަން ޖެހެނީ ނަޖިސް ފެން ކަމަށް ރައްޔިތުން މަޖިލީހުގެ ކެންދޫ ދާއިރާގެ މެންބަރު އަލީ ހުސެއިން ވިދާޅުވެއްޖެ އެވެ.
މިސަރުކާރުގެ ތަރައްގީ ސިޔާސަތަށް ވަރަށް ބޮޑަށް ފާޑުވިދާޅުވެ މެންބަރު އަލީ ހުސެއިން ކުރެއްވި ޓްވީޓެއްގައި ވިދާޅުވީ މާލޭގައި ހުރި އަސާރީ މިސްކިތް ނެތިކޮށްލުމަށްފަހު ހެދީ ވިންޓަރ ޕާކެއް ކަމަށެވެ. ފެންވަރުގެ ޕާކުތައް މާލޭގައި ތަރައްގީ ކުރަމުންދާއިރު، ގިނަ ރަށްރަށުގައި ތިބި ކުޑަކުދިންގެ ބޮލަށް އަޅަންޖެހެނީ ނަޖިސް ފެން ކަމަށެވެ. އަދި އިސްކަންދޭ ތަރުތީބު ވަނީ އޮޅުން ބޮޅުން ވެފައި ކަމަށާއި، އަތޮޅުތެރޭގެ ރަށްތަށް ތަރައްގީ ކުރުމަށް މިސަރުކާރު ވަނީ ފެއިލްވެފައި ކަމަށް އަލީ ހުސައިން ވިދާޅުވިއެވެ.
މާލޭގައި ދިރިއުޅެން މަޖުބޫރު ކުރުވާފައިވާކަން ފާހަގަކުރައްވައި އަލީ ހުސެއިން ވިދާޅުވީ ގުޅިފައިވާ ޕާޓީތަކުގެ ސަރުކާރެއްގައި މާލޭގެ ތޮށްޖެހުން ނިމުމަކަށް ގެނެސް، ހިތްގައިމު ރަށްވެހި ކަމުގެ ރާއްޖެއެއް ހޯދާނެ ކަމަށެވެ. އަދި ބޯހިޔާވަހިކަމަށް ގޯތިގެދޮރަށް ސަލާން ޖަހަން ނުޖެހޭނެ ކަމަށް ވެސް އަލީ ހުސެއިން ވިދާޅުވި އެވެ.
ހުޅުމާލޭގެ ދެވަނަ ފިޔަވަހި ތަރައްގީ ކުރަމުންދާތީ މާލެ ސިޓީއަށް ދިރިއުޅުން ބަދަލުކުރުމަށް ރައީސް ޔާމިން ވަނީ ގޮވާލައްވާފަ އެވެ. މިހާރު ވެސް ތޮށްޖެހިފައިވާ މާލެއަށް އިތުރަށް ތޮށްޖައްސުވަނީ ކަމަށް ބުނެ ގިނަ ބައެއް ފާޑު ކިޔުން މިސަރުކާރަށް ވަނީ އަމާޒުވެފަ އެވެ.
އަތޮޅު ތެރޭގެ ރައްޔިތުންނަށް ބޭނުންވާ އެންމެ އަސާސީ ޚިދުމަތްތައް ފޯރުކޮށްނުދީ މާލޭގައި ތަރައްގީގެ މަޝްރޫއުތައް ނުއަގުގައި ހިންގަމުންދާ ކަމަށް ބުނެ، އިދިކޮޅު ފަރާތްތަކުން އަބަދު ވެސް ދަނީ ކަންބޮޑުވުން ފާޅުކުރަމުންނެވެ.
