ދެ ދުވަހުން ރޭސް 3 ގެ ޓްރެއިލަރ އަށް 31 މިލިއަން ވިއުޒް

ރިލީޒް ކުރުމަށް ތައްޔާރުވެފައިވާ ސަލްމާން ޚާންގެ ފިލްމު، ރޭސް 3 ގެ ޓްރެއިލަރއަށް ބޮޑު ތަރުޙީބެއް ލިބިއްޖެއެވެ.

ރޭސް 3 ގެ ޓްރެއިލަރ އާންމުކުރިތާ 48 ގަޑިއިރު ވީއިރު އެކިއެކި ސޯޝަލް މީޑިއާ ޕްލެޓްފޯމްތަކުގައި މި ޓްރެލަރއަށް ވަނީ ބޮޑު ތަރުޙީބެއް ލިބިގެން ގޮސްފައިއެވެ. އެގޮތުން ސޯޝަލް މީޑިއާގައި މި ޓްރެއިލަރއަށް ޖުމްލަ 31 މިލިއަން ވިއުޒް ލިބިފައިވާއިރު ހަމައެކަނި ޔޫޓިއުބްގައިވެސް މި ޓްރެއިލަރއަށް ވަނީ 19 މިލިއަން ވިއުޒް ލިބިފައެވެ.

އެހެން ފިލްމުތަކުގެ ޓްރެއިލަރ ތަކެކޭ އެއްގޮތަށް، ހަމައެކަނި އެޗްޑީކޮށް ރިލީޒްކުރުމުގެ އިތުރުން، މި ފިލްމުގެ ޓްރެއިލަރ ވަނީ 3D ކޮށްވެސް ރިލީޒްކޮށްފައެވެ.

ޓްރެއިލަރގައި މައި އެކްޓަރެއްގެ ގޮތުގައި ސަލްމާން ޚާން ފެނިގެންދާއިރު، ސަލްމާންގެ އިތުރުން، އަނިލް ކަޕޫރް، ޖެކުއަލިން ފެނާންޑޭޒް، ޑެއިޒީ ޝާޙް އަދި ސާޤިބް ސަލީމާއި، ބޮބީ ޑިއޯލްވެސް މި ފިލްމުން ފެނިގެންދާނެއެވެ.

މި ފިލްމުގެ ބޮޑު ބައި ނަގާފައިވަނީ ތައިލޭންޑާއި، އަބޫ ދާބީގެ އިތުރުން މުމްބާއީގައެވެ.

ރޭސް 3 އަކީ ކުރިން ސައިފް އަލީ ޚާން އާއި ބިޕާޝާ ބާސޫ ފަދަ ތަރިން ފެނިގެންދިޔަ ފްރެންޗައިޒްގެ އެންމެ ފަހުގެ ފިލްމެވެ.