ޤުދުސްއަށް އެމެރިކާ އެމްބަސީ ބަދަލުކުރުމާއި ދެކޮޅަށް އިހުތިޖާޖުކުރި ފަލަސްތީނުގެ ރައްޔިތުންނާއި ދެކޮޅަށް އިސްރާއީލް ސިފައިން ހިންގި ޖަރީމާތަކަށް އަޅާނުލުމުގެ ސަބަބުން އދ މިހާރު "ނިމިފައި" ވާކަމަށާއި، އެޖަމާޢަތުގެ ބޭނުމެއް ނެތްކަމަށް ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެއެވެ.

އިސްރާއީލުގެ އަމަލުތައް ކުށްވެރިކުރައްވައި އުރުދުޣާން ވިދާޅުވީ އިސްރާއީލުގެ އަނިޔާވެރި އަމަލުތައް ކުށްވެރި ކުރުމަށް ބައިނަލްއަޤްވާމީ މުޖްތަމައު ނުކުޅެދިފައި ވާކަމަށެވެ. 

ހޯމަ ދުވަހު އިސްރާއީލް ސިފައިން ޣައްޒާ-އިސްރާއީލް ސަރަހައްދީ ރޮނގުގައި ދިން ހަމަލާތަކުގައި ފަލަސްތީނުގެ 60 މީހަކު ޝަހީދުވެފައިވެއެވެ. އަދި އިސްރާއީލް ސިފައިން ބަޑިޖެހުމުގެ ސަބަބުންނާއި ކަރުނަ ގޭސް ބޭނުން ކުރުމުގެ ސަބަބުން 2700 އަށްވުރެ ގިނަ މީހުންނަށް އަނިޔާވެފައިވެއެވެ. 

އުރުދުޣާން ވަނީ އިސްރާއީލުގެ ހަމަލާތަކުގެ ސަބަބުން އަނިޔާވާ މީހުންނަށް ފަރުވާ ދިނުމަށް ތުރުކީވިލާތަށް ގެންނަވާނެ ކަމަށް ވައުދުވެވަޑައިގެންފައެވެ. 

އިސްރާއީލުގެ ހަމަލާތައް ކުށްވެރިކުރުމަށް މުސްލިމް ގިނަ ޤައުމުތައް ނުކުޅެދިފައިވާއިރު، ރަޝިޔާއިން ވަނީ އިސްރާއީލުގެ އަމަލުތައް ކުށްވެރިކޮށްފައެވެ. އިސްރާއީލުގެ ހަމަލާތަކުގައި ކުޑަކުދިންނާއި އަންހެނުން ޝަހީދުވިއިރު، ސުލްހަވެރިކަމާއިއެކު އިހްތިޖާޖް ކުރި ފަރާތްތަކަކީ ޓެރަރިސްޓުންގެ ގޮތުގައި އިސްރާއީލުން ސިފަކުރުމަކީ ބަލައިގަނެވޭނެކަމެއް ނޫންކަމަށް ރަޝިޔާގެ ޚާރިޖީ ވަޒީރު ސަރްގޭ ލަވްރޯފް ވިދާޅުވިއެވެ. އަދި އެމެރިކާގެ ރިޕަބްލިކަން ޕާޓީގެ ބައެއް ސެނެޓަރުންނާއި އިދިކޮޅު ޑިމޮކްރެޓިކް ޕާޓީއިން ވަނީ އިސްރާއީލުގެ އަމަލުތައް ކުށްވެރިކޮށްފައެވެ. މީގެ އިތުރުން ޔަހޫދީންގެ ބައެއް މީހުންވެސް އިސްރާއީލް އަސްކަރިއްޔާގެ އަމަލުތައް ކުށްވެރިކުރިއެވެ.

މިދިޔަ މަހުން ފެށިގެން އިސްރާއީލް ސިފައިން ދިން ޙަމަލާތަކުގައި ފަލަސްތީނުގެ 111 މީހަކު ޝަހީދުވެފައިވާއިރު، 12،000 އަށްވުރެ ގިނަ މީހުން ވަނީ ޒަޚަމްވެފައެވެ.