އެމްޑީީޕީގެ އެތެރޭގެ އިންތިޚާބަށް ކުރިމަތިލުމަށް އަންގާރަ ދުވަހު ހުޅުވާލާނަން: ހަސަން ލަތީފް

އެމްޑީީޕީގެ އެތެރޭގެ އިންތިޚާބަށް ކުރިމަތިލުމަށް އަންގާރަ ދުވަހު (މިއަދު) ހުޅުވާލާނެކަަމަށް އެމްޑީޕީގެ ޗެއަރ ޕާރސަން ހަސަން ލަތީފް ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ހަސަން ލަތީފް ވިދާޅުވީ، މޭމަހުގެ 15 ވަނަ ދުވަހަކީ އެ ފުރުސަތު ހުޅުވާލެވިގެންދާނެ ދުވަސް ކަމަށެވެ. އަދި ޕްރައިމަރީގެ ވޯޓްލުން މި މޭމަހުގެ 30 ވަނަ ދުވަހު ބާއްވާނޭކަަމަށް އޭނާ ވިދާޅުވިއެވެ.

Advertisement

ހަސަން ލަތިފް ވިދާޅުވީ، އެމްޑީޕީ ރާއްޖޭގައި އޮތް އެންމެ މެންބަރުން ގިނަ ޕާޓީކަމަށްވާއިރު، އިލެކްޝަންސް ކޮމިޝަނުގައި އޮތް ދަފުތަރުގައި އެޕާޓީގެ މެންބަރުންގެ އަދަދުގެ ގޮތުގައި އޮތީ ހަގީގީ އަދަދަށް ވުރެ އެތަށް ގުނައެއް މަދުކޮށްކަމަށެވެ.

އޭނާ ވިދާޅުވީ، ކަނޑައެޅިގެން އެޕާޓީގެ މެންބަރުންގެ ގޮތުގައި ތިބި މީހުން އިލެކްޝަންސް ކޮމިޝަނުން ޕާޓީގެ ދަފުތަރުން އެ މެންބަރުން ވަކިކޮށްފައިވާކަމަށެވެ. އަދި ހަގީގީ މެންބަރުންގެ އަދަދު އީސީން އޮތީ އޮޅުވާލާފައި ކަމަށް އޭނާ ތުހުމަތު ކުރެއްވިއެވެ.

"އެބޭފުޅުން އެކަން ކުރައްވާ ސަބަބު ރައްޔިތުންނަށް އޮޅިފައެއް ނެތް. އެމްޑިޕީ މެންބަރުނަކަށްވެސް އެކަމެއް ނޯޅޭނެ" ހަސަން ލަތީފު ވިދާޅުވިގޮތުގައި އިލެކްޝަންސް އިން މެންބަރުންގެ އަދަދު މަދުކަމަށް ދައްކަނީ، ދައުލަތުން އެޕާޓީއަށް ދޭން ޖެހޭ ފައިސާގެ އަދަދު މަދުކުރުމަށާއި، އެމްޑީޕީ އަކީ ރާއްޖޭގައި އޮތް އެންމެ ބޮޑު ޕާޓީ ނޫންކަމަށް ދެއްކުން ކަމަށެވެ. އެކަމަކު ހަގީގަތް އޮޅުވާ ނުލެވޭނެކަަަމަށް ހަސަން ލަތީފް ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީގެ ވޯޓްލުމާއި ގުޅޭ ގޮތުން އިތުރަށް ތަފްސީލް ދެއްވަމުން ހަސަން ލަތީފް ވިދާޅުވީ ރިޔާސީ ޕްރައިމަރީގެ ވޯޓްލުން ރާއްޖޭގެ ހުރިހާ ރަށެއްގައި ކުރިއަށް ގެންދާނެކަމަށެވެ. އޭގެ އިތުރުރުން ރާއްޖޭން ބޭރުގައިވެސް ވޯޓް ފޮށި ބަހައްޓާނެކަމަށް އޭނާ ވިދާޅުވިއެވެ. އެގޮތުން ސްރީލަންކާގެ ކޮލަމްބޯ އާއި ކެންޑީ ގައި ވޯޓް ފޮށި ބަހައްޓާނެކަމަށް ވިދާޅުވިއެވެ. އަދި އިންޑިއާގެ ޓްރިވެންޑްރަމްއާއި ބެންގަލޫރާއި، މެލޭޝިއާގެ ކުއަލަލަންޕޫރުގެ އިތުރުން ލަންޑަންގައިވެސް ވޯޓް ފޮއްޓެއް ބަހައްޓާނެކަމަށް ހަސަން ވިދާޅުވިއެވެ.

އެމްޑީޕީން އެޕާޓީެގ ރިޔާސީ ކެނޑިޑޭޓަކު ހޮވުމަށް ބާއްވާ ޕްރައިމަރީއަށް ތައްޔާރުވަމުން އަންނައިރު، ޕްރައިމަރީގައި ވާދަކުރައްވާނެކަމަށް މިހާތަނަށް އިއުލާންކޮށް ކެމްޕެއިން ފޯރިއާއެކު މިހާރުވެސް ކުރިއަށް ގެންދަވަނީ ކުރީގެ ރައީސް މުހައްމަދު ނަޝީދެވެ. އެމަނިކުފާނު ވާދަކުރައްވާނަމަ އެމަނިކުފާނާ ވަަދަކުރައްވާނެ އެހެން ބޭފުޅަކު ނުހުންނާނެ ކަމުގައި ދެން ތިއްބެވި އެ ޕާޓީގެ އިސްބޭފުޅުން ވިދާޅުވަމުން ގެންދަވައެވެ. އެހެންނަމަވެސް ރައީސް ނަޝީދަކީ މިވަގުތުވެސް ޖަލު ހުކުމެއް ތަންފީޒު ކުރައްވަމުން ގެންދަވާ ބޭފުޅަކަށް ވާއިރު ރިޔާސީ އިންތިޚާބުގައި ވާދަކުރުމުގެ ފުރުސަތު އެމަނިކުފާނަށް ލިބިވަޑައިގަންނަވާނެތޯ އަދި ވަނީ ސުވާލުމާކެއްގެ ތެރޭގައެވެ. އެކަމަކު ރައީސް މުހައްމަދު ނަޝީދު ވިދާޅުވަމުން ގެންދަވަނީ ރިޔާސީ އިންތިޚާބް ގެ ވޯޓްކަރުދާސްކޮޅުގައި އެމަނިކުފާނުގެ ނަންފުޅު އޮންނާނޭކަމަށެވެ.