އުނަގަނޑުން ތިރި ވަނީ އައްސިވެފައި، ހިނގެނީ ކިރިޔާ: އަލީ ހަމީދު
ހައްޔަރު ކުރި ދުވަހު އަޅުގަނޑު ސިޑިން ވެއްޓުނު: އަލީ ހަމީދު
ކްރިމިނަލް ކޯޓުގެ ޝަރީއަތަކަށް އަލީ ހަމީދު މާލެ ގެންނަނީ
އުނަގަނޑުން ތިރި ވަނީ އައްސިވެފައި ކަމަށާއި ހިނގާބިނގާވެ އުޅެވެނީ ވަރަށް އުނދަގުލުން ކަމަށް ހައްޔަރުކޮށްފައިވާ ސުޕްރީމް ކޯޓުގެ ފަނޑިޔާރު އަލީ ހަމީދު ވިދާޅުވެއްޖެއެވެ.
އަލީ ހަމީދު އެހެން ވިދާޅުވީ އޭނާގެ މައްޗަށް އުފުލާފައިވާ ޓެރަރިޒަމްގެ އަމަލެއް ކުރަން އުޅުމުގެ ދައުވާގެ އިބްތިދާއީ އަޑުއެހުމުގައެވެ.
ގާޒީ އަހްމަދު ހައިލަމް ބައްލަވާ އެ މައްސަލައިގެ އަޑުއެހުމުގައި އަލީ ހަމީދު ވިދާޅުވީ އޭނާގެ އުނަގަނޑުން ތިރި އައްސިވެފައި ވަނީ ހައްޔަރު ކުރި ރޭ، މިދިޔަ ފެބްރުއަރީ މަހުގެ 6 ވަނަ ދުވަހުގެ ރޭ ސުޕްރީމް ކޯޓުގެ ސިޑިން އޭނާ ވެއްޓުމުން ކަމަށެވެ. ސިޑިން ވެއްޓި ލިބުނު އަނިޔާތަކާ ގުޅިގެން އުނަގަނޑަށް އަނިޔާވެފައިވާ ކަމަށާއި ހިނގާއުޅޭ އިރު "ބެލެންސް" ނުވާ ކަމަށް އަލީ ހަމީދު ވިދާޅުވިއެވެ.
އަލީ ހަމީދު އެހެން ވިދާޅުވުމުން ދައުލަތުގެ ވަކީލާ ވިދާޅުވީ އަލީ ހަމީދު ހައްޔަރު ކުރި ރޭ ސުޕްރީމް ކޯޓުގައި ހިނގައިދިޔަ ކަންތައްތައް ފުލުހުން ވީޑީއޯކޮށްފައިވާ ކަމަށާއި އެ ވީޑިއޯތަކުން އަލީ ހަމީދަށް އަނިޔާވިކަން އެނގެން ނެތް ކަމަށެވެ. ޝަރީއަތުން ބޭނުން ވެއްޖެ ނަމަ، އެ ވީޑީއޯ ޝަރީއަތަށް ހުށަހެޅިދާނެ ކަމަށް ވެސް ދައުލަތުގެ ވަކީލާ ވިދާޅުވިއެވެ.
ދައުލަތުގެ ވަކީލާ އެހެން ވިދާޅުވުމުން، ގާޒީ ހައިލަމް އެ ވީޑިއޯ ޝަރީއަތަށް ހުށަހެޅުމަށް އަންގަވާފައެއް ނުވެއެވެ.
އަލީ ހަމީދު ވިދާޅުވީ އޭނާއަކީ ލޭ މައްޗަށްދާ މީހެއް ކަމަށާއި ހިތުގެ މައްސަލަ ވެސް ހުންނަ މީހެއް ކަމަށެވެ. އަދި ފަރުވާ ލިބެންޖެހޭ ވަރަށް ކަރެކްޝަނަލް ސާވިސްއިން އޭނާއަށް ފަހިކޮށްދޭންޖެހޭ ކަންތައްތައް ފަހިކޮށްދީފައި ނުވާ ކަމަށް އަލީ ހަމީދު ވިދާޅުވިއެވެ.
ގާޒީ ވިދާޅުވީ ހައްޔަރުކޮށްފައިވާ އެހެން ފަރާތްތަކާ ހިލާފަށް އަލީ ހަމީދަކީ ހާއްސަ އިމްތިޔާޒުތަކެއް ދެއްވާފައިވާ ބޭފުޅެއް ކަމަށާއި ބަންދުކޮށްފައި ހުންނަ ކޮންމެ ދުވަހަކު ނަރުހަކު އޭނާގެ ސިއްހީ ހާލަތު ބައްލަވަންޖެހޭނެ ކަމަށެވެ. އަދި އެކަންކަން ބަރާބަރަށް ކުރަމުންދޭތޯ ދެން އޮންނަ ޝަރީއަތަކަށް ސާފުކޮށްދެއްވުމަށް ދައުލަތުގެ ވަކީލާ އަރިހުން ގާޒީ އެދިވަޑައިގެންނެވިއެވެ.
ހޯމަ ދުވަހު ބޭއްވި އިބްތިދާއީ އަޑުއެހުމުގައި އަލީ ހަމީދުގެ މައްޗަށް ކޮށްފައިވާ ޓެރަރިޒަމްގެ އަމަލެއް ކުރަން އުޅުމުގެ ދައުވާ އިއްވަމުން ދައުލަތުގެ ވަކީލު އަހުމަދު ނައުޝާދު ވިދާޅުވީ 2013 ވަނަ އަހަރުން ފެށިގެން އަލީ ހަމީދު ރިޝްވަތުގެ ފައިސާގައި ހިއްޕަވައި ވަކި ބަޔަކަށް މަންފާވާ ގޮތަށް ހުކުމްތައް ކުރައްވާފައިވާ ކަމަށެވެ. އަދި މުއައްސަސާތަކުގެ މަސައްކަތަށް ބުރޫ އަރުވައި ފަނޑިޔާރުންނަށް ނުފޫޒު ފޯރުވާފައިވާ ކަމަށް ވެސް އޭނާގެ މައްޗަށް ދައުލަތުން ވަނީ ތުހުމަތުކޮށްފައެވެ.
ވަކި ގޮތަކަށް ކޯޓުން ހުކުމްތައް ނެރެ، ގާނޫނާ ހިލާފަށް ސަރުކާރު ބަދަލުކުރަން ފުލުހުންނާ ގުޅިގެން މަސައްކަތް ކުރި ކަމަށް ވެސް އަލީ ހަމީދުގެ މައްޗަށް ކުރި ދައުވާ އިއްވަމުން ދައުލަތުގެ ވަކީލު ވިދާޅުވިއެވެ.
އަލީ ހަމީދުގެ ދައުވާއާ ގުޅޭ ހުރިހާ ލިޔެކިޔުމެއް ލިބިފައިވޭތޯ ގާޒީ ސުވާލު ކުރެއްވުމުން އަލީ ހަމީދު ވިދާޅުވީ ލިޔެކިޔުންތައް ލިބިފައިވާ ކަމަށެވެ.
އޭނާ ވިދާޅުވީ އެ ދައުވާއާއެކު ކުރިއަށްދާން ބޭނުންވަނީ ވަކީލަކާއެކުގައި ކަމަށާއި ވަކީލަކު އައްޔަން ކުރުމަށް 15 ދުވަސް ދެއްވުމަށެވެ. ގާޒީ ހައިލަމް ވިދާޅުވީ ވަކީލަކު އައްޔަން ކުރުމަށް 15 ދުވަސް ދިނުމަކީ ޖިނާއީ އިޖުރާއަތުގެ ގާނޫނުގައި ބުނާ މުއްދަތަށް ވުރެ ދިގު މުއްދަތެއް ކަމަށާއި އެހެކަމުން އެ މުއްދަތު ނުދެވޭނެ ކަމަށެވެ.
ވަކީލަކު އައްޔަން ކުރުމަށް އަލީ ހަމީދަށް ކޯޓުން ދެއްވަފައި ވަނީ ދެ ދުވަހުގެ މުއްދަތެކެވެ.
އަލީ ހަމީދުގެ ބަލި ހާލަތުގެ ވާހަކަ ޝަރީއަތުގެ މަޖިލީހުގައި އޭނާ ކިޔައި ދެއްވިއިރު، ގާޒީ ވިދާޅުވީ ގޮނޑީގައި އިށީންދެވަޑައިގެން އިންނަވައިގެން، ވާހަކަފުޅު ދެއްކެވުމަށެވެ. އަލީ ހަމީދުގެ ބަލި ހާލަތު ހުރި ގޮތުން ކޯޓުގައި އޭނާ ވާހަކަފުޅު ދެއްކެވީ ވަރަށް މަޑުންނެވެ. ގާޒީ ހައިލަމް ކުރެއްވި ސުވާލުތަކަށް ޖަވާބު ދެއްވިއިރު، އަލީ ހަމީދު ވިދާޅުވި ބައެއް ބަސްފުޅުތައް ވެސް ސާފެއް ވެސް ނުވެއެވެ.
