ހިމާޔަތް ކޮށްފައިވާ ހިތާދޫއަށް ގެއްލުންދިނުމުން 300،000 ރުފިޔާއިން ޖޫރިމަނާކޮށްފި
26 މާރިޗު 2018 | ހޯމަ 04:08ހިތާދޫއަށް ގެއްލުން ދިނީ ފަތުރުވެރިންތަކެއް
ގއ. ހިތާދޫ
ހިމާޔަތްކޮށްފައިވާ ގއ. ހިތާދޫއަށް ފަތުރުވެރިންތަކެއް އަރައި، އެ ރަށުގެ މާހައުލަށް ގެއްލުންދިން މައްސަލާގައި، އެކަމުގައި އިހުމާލުވި ކުންފުނި 300،000 ރުފިޔާއިން ޖޫރިމަނާކޮށްފި އެވެ.
ގއ. ހިތާދޫއަކީ މަސް އައިނުމަތީ، އެންމެ ބޮޑު ދޫނި، ހޯރައަށް މަޝްހޫރު ރަށެކެވެ. ބިޔަ ޅޮސްގަތަކުން ހެދިފައިވާ އެ ރަށުގެ ތިމާވެށީގެ ނާޒުކުކަމާ ގުޅިގެން ވަނީ ހިމާޔަތްކޮށްފަ އެވެ.
ސަފާރީއެއްގައި ދިޔަ ބަޔަކު އެ ރަށަށް އަރައި، ހޯރަތަކުގެ މާހައުލަށް ގެއްލުންވާ ގޮތަށް އަމަލުކޮށްފައި ވަނީ މިދިޔަ އަހަރުގެ ޖެނުއަރީ މަހުގެ އެވެ. އެ ރަށަށް އެރި ފަތުރުވެރިން ވަނީ އެ ރަށުގެ ފަރަށް ނަގިލި ލައި، ރަށުގެ ގަސް ގަހަށް ވެސް ގެއްލުންދީފަ އެވެ. މީގެ އިތުރުން އެރަށުގެ ގޮނޑުދޮށުގައި ބާބަކިއު ހަދާފައިވެ އެވެ.
ހިމާޔަތްކޮށްފައިވާ ރަށްރަށަށް ހުއްދަ ނުހޯދައި އެރުމަކީ މަނާ ކަމެކެވެ. އަދި އެފަދަ ރަށްރަށުގެ ފަރަށް ނަގިލި ލައި ގަސްގަހާ ގެއްސަށް ގެއްލުން ދިނުމަކީ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން މަނާ ކަމެކެވެ.
އެންވަޔަމަންޓް ޕްރޮޓެކްޝަން އެޖެންސީ (އީޕީއޭ)އިން ބުނީ ފަތުރުވެރިން އެ ރަށަށް އަރުވައި، ތިމާވެއްޓަށް ގެއްލުންދީފައިވާތީ އެކަމުގައި ޝާމިލުވާ ކުންފުނި ޖޫރިމަނާ ކުރީ މިއަހަރުގެ ކުރީކޮޅު ކަމަށެވެ. ޖޫރިމަނާ ކުރި ކުންފުނީގެ ނަމެއް އީޕީއޭއަކުން ހާމައެއް ނުކުރެއެވެ.
ހުވަދު އަތޮޅަކީ ރާއްޖޭގައި އެންމެ ގިނަ ފަޅުރަށްތައް ހިމެނޭ އަތޮޅެވެ. އެ އަތޮޅުގައި އެކަނި ވެސް 199 ރަށް އޮވެއެވެ. ފަޅުރަޅު ރަށްތަކުގެ އަދަދު 181 އަރައެވެ. ހިތާދޫގެ އިތުރުން، އެހެން ބައެއް ފަޅުރަށްތައް ވެސް އެ އަތޮޅުގައި ވަނީ ހިމާޔަތްކޮށްފައެވެ.
