ޕާކިސްތާނު ފަޅިން ކަޝްމީރުގެ އިންޑިއާ ފަޅިއަށް ދިން ބަޑީގެ ޙަމަލާތަކެއްގައި އާއްމުންގެ 2 މީހަކާއި، އިންޑިއާ ސިފައިންގެ އެކަކު މަރުވެއްޖެކަމަށް އިންޑިއާއިން ހުކުރު ދުވަހު ބުނެފިއެވެ.

ކަޝްމީރުގެ ސްޓޭޓް ފުލުހުންގެ ވެރިޔާ ޝެޝް ޕައުލް ވާއިދު މީޑިއާތަކަށް މައުލޫމާތު ދެއްވަމުން ވިދާޅުވީ ހުކުރު ދުވަހު ޕާކިސްތާނު ފަޅިން ދިން ޙަމަލާތަކެއްގައި ކަޝްމީރުގެ އިންޑިއާ ފަޅީގައި ހުރި 52 އަހަރުގެ އަންހެނަކު މަރުވެފައިވާކަމަށެވެ. މީގެ އިތުރުން އިންޑިއާގެ ސަރަހައްދީ ރޮނގުގެ ސަލާމަތީ ކަންކަން ބަލަހައްޓާ ލަޝްކަރުކަމަށްވާ ބޯޑަރ ސެކިއުރިޓީ ފޯސްގެ އޮފިސަރަކުވެސް މި ޙަމަލާތަކުގައި މަރުވިއެވެ. އަދި ބުރާސްފަތި ދުވަހުވެސް މިފަދަ ޙަމަލާތަކެއްގައި އުމުރުން 17 އަހަރުގެ އަންހެން ކުއްޖަކު މަރުވިއެވެ.

މިއީ ކަޝްމީރުގެ ޕާކިސްތާނު ފަޅިން ދިން ޙަމަލާތާކުގައި އިންޑިއާ ފަޅިން 24 ގަޑިއިރު ތެރޭ މަރުވި 5 ވަނަ މީހާއެވެ.

2003ވަނަ އަހަރުން ފެށިގެން ޙަމަލާ ބަދަލުކުރުން ހުއްޓާލުމުގެ އެއްބަސްވުމެއް ޤާއިމްކޮށްފައިވީނަމަވެސް ދޭތެރެ ދޭތެރެއިން ދެޤައުމުގެ ސިފައިން ބަޑީގެ ޙަމަލާތައް ބަދަލުކުރެއެވެ. އަދި ޕާކިސްތާނުގައި ޙަރަކާތްތެރިވާ ހަނގުރާމަވެރިންވެސް ޕާކިސްތާނު ފަޅިން އިންޑިއާއަށް ޙަމަލާދޭކަމަށާއި، މިޙަމަލާތަކަށް ޕާކިސްތާނުގެ އަސްކަރިއްޔާއިން އެހީތެރިވާކަމަށް އިންޑިއާއިން ތުހުމަތުކުރެއެވެ. އެހެން ނަމަވެސް އިންޑިއާގެ މިތުހުމަތުތައް ޕާކިސްތާނުން ދޮގުކުރެއެވެ.

ހުކުރު ދުވަހުގެ ހެނދުނުން ފަށައިގެން ދެޤައުމުގެ ސިފައިން ގެންދަނީ ވަރުގަދަޔަށް ސަރަހައްދީ ރޮނގު ހުރަސްކޮށް ޙަމަލާ ބަދަލުކުރަމުންނެވެ. އިންޑިއާއިން ތުހުމަތުކުރަނީ މިފަހަރުވެސް ޙަމަލާތައް ފެށީ ޕާކިސްތާނުންކަމަށެވެ.

ނިމިގެންދިޔަ ހަފްތާގެ މެދުތެރެއިން ފެށިގެން ޕާކިސްތާނާއި އިންޑިއާގެ ސިފައިން ގެންދަނީ ކަޝްމީރުގައި ހަމަލާ ބަދަލުކުރަމުންނެވެ.

ކަޝްމީރުގެ ފުރިހަމަ ކޮންޓްރޯލަށް ޕާކިސްތާނާއި އިންޑިއާއިން ދައުވާކުރަމުންދާއިރު، އެސްޓޭޓް އޮތީ މިހާރު ދެޤައުމުގެ މެދުގައި ބަހާލެވިފައެވެ. 1947 ވަނަ އަހަރު އިންޑިއާގެ ކިބައިން ޕާކިސްތާނަށް މިނިވަންކަން ލިބުނުފަހުން ނިއުކްލިއަރ ހަތިޔާރުގެ ޤާބިލްކަން ލިބިގެންވާ މިދެޤައުމުން 3 ހަނގުރާމަކޮށްފައިވެއެވެ. އޭގެ ތެރެއިން 2 ހަނގުރާމަކޮށްފައިވަނީ ކަޝްމީރުގެ މައްސަލައިގައެވެ. 2003ވަނަ އަހަރު ދެޤައުމުގެ މެދުގައި ޙަމަލާ ބަދަލުކުރުން ހުއްޓާލުމުގެ ވަގުތީ އެއްބަސްވުމެއް އެކުލަވާލިނަމަވެސް ކޮންމެ އަހަރަކުވެސް ޙަމަލާ ބަދަލުކުރުމުގެ އެތައް ސަތޭކަ ޙާދިސާއެއް ސަރަހައްދީ ރޮނގުގައި ހިނގައެވެ.

1989ވަނަ އަހަރުން ފެށިގެން ހަތިޔާރު އެޅި ޖަމާޢަތްތަކުން ގެންދަނީ ކަޝްމީރަކީ މިނިވަން ސަރަހައްދަކަށް ނުވަތަ ޕާކިސްތާނުގެ ފުރިހަމަ ކޮންޓްރޯލް ހިނގާ ސަރަހައްދަކަށް ހެދުމަށް މަސައްކަތްކުރަމުންނެވެ. ކަޝްމީރުގެ މައްސަލައިގައި މިހާތަނަށް 70 ހާހެއްހާ މީހުން މަރުވެފައިވާއިރު، އެސަރަހައްދުގައި އިންޑިއާގެ ބައި މިލިއަނެއްހާ ސިފައިން ދާއިމީކޮށް ޤާއިމްވެގެން ތިބެއެވެ.