ޝާހްގެ "ޑޮން 3" ގެ ޝޫޓިން ފަށާނީ އަންނަ އަހަރު!
މިހާރު ކުރަމުން އަންނަ މަސައްކަތަކީ ފިލްމުގެ ސްކްރިޕްޓް ލިޔުން
ބޮލީވޫޑްގެ ފިލްމް "ޑޮން" ގެ ޕޯސްޓަރެއް
ބެލުންތެރިންގެ ބޮޑު ތަރުހީބެއް ލިބިގެންދިޔަ ބޮލީވުޑްގެ ފިލްމު "ޑޮން" އެންމެ ފުރަތަމަ ސިނަމާތަކަށް އައިސްފައި ވަނީ 2006 ވަނަ އަހަރުއެވެ. އެ އަށް ފަހު "ޑޮން"ގެ ދެވަނަ ފްރަންޗައިޒް "ޑޮން 2" ސިނަމާތަކަށް އައިސްފައި ވަނީ 2011 ވަނަ އަހަރުގައެވެ.
ޝާހުރުކް ޚާން ލީޑް ރޯލުން ފެނިގެންދާ "ޑޮން" ފްރަންޗައިޒްގެ ތިންވަނަ ފިލްމު "ޑޮން 3" ގެ ޝޫޓިން އަންނަ އަހަރު ފެށުމަށް ތައްޔާރުވަމުން އަންނަ ކަމަށް މި ފިލްމުގެ ޕްރޮޑިއުސަރު ރިތޭޝް ސިދުވާނީ ވަނީ ހާމަކޮށްފައެވެ.
އޭނާ ބުނީ "ޑޮން 3" އުފެއްދުމަށް މަސައްކަތް ފަށާފައިވާ ކަމަށާއި ޝޫޓިން ފެށޭނީ އަންނަ އަހަރު ކަމަށެވެ. އޭނާއަކީ "ޑޮން" ފްރަންޗައިޒްގެ ހުރިހާ ފިލްމެއް ޕްރޮޑިއުސްކޮށްފައިވާ ޕްރޮޑިއުސަރެވެ. ރިތޭޝް ބުނީ "ޑޮން 3" ވެގެން ދާނީ ކުރިން ނެރުނު ދެ ފިލްމަށް ވުރެ ހުރިހާ ގޮތަކުން ވެސް ފުރިހަމަވާނެ އަދި ކާމިޔާބު ވާނެ ފިލްމަކަށް ކަމަށެވެ.
ރިތޭޝް މި ފިލްމުގެ މިހާރު ކުރަމުން އަންނަ މަސައްކަތަކީ "ޑޮން 3" ފިލްމުގެ ސްކްރިޕްޓް ލިޔުމެވެ.
ރިތޭޝް ބުނީ "ޑޮން 2" އަކާއި "ޑޮން"އާ ދޭތެރޭ ހަ އަހަރު ވީކަމުގައި ވިއަސް "ޑޮން 3" ނެރުމަށް ފަހު ހަތަރު ވަނަ ފިލްމު ނެރުމަށް މާގިނަ ދުވަހެއް ނުނަގާނެ ކަމަށެވެ.
"ޑޮން" ސިލްސިލާ ފިލްމުތަކަކީ 1978 ވަނަ އަހަރު އަމީތާބް ބައްޗަން ލީޑު ރޯލުން ފެނިގެން ދިޔަ ފިލްމު "ޑޮން" ގެ ރީމޭކިން ފިލްމަކުން ފެށި ސިލްސިލާއެކެވެ.
ދެހާސް ހަވަނަ އަހަރާއި 2011 ވަނަ އަހަރުގައި ނިކުތް "ޑޮން"ގެ ލީޑް ރޯލުތަކުން ފެނިގެން ގޮސްފައި ވަނީ ޝާހުރުކް ޚާންގެ އިތުރުން ޕްރިޔަންކާ ޗޯޕްޅާއެވެ. "ޑޮން 3" އިން ޕްރިޔަންކާ ނުފެންނާނެ ކަމަށް އަޑުތައް ވަނީ ފެތުރިފައެވެ. ޚަބަރުތައް ބުނާ ގޮތުން މިފަހަރު "ޑޮން 3" އިން ޝާހުރުކް ޚާނާ އެކު ފެނިގެން ދާނީ ދީޕިކާ ޕަދުކޯންއެވެ.
"ޑޮން" ފްރަންޗައިޒް ފިލްމު އުފައްދާ ޕްރޮޑަކްޝަން ކޮންޕެނީ އެކްސެލް އެންޓަޓައިންމަންޓުން މި ފިލްމުގެ ޝޫޓިން ފަށާނެ ދުވަހެއް އިއުލާން ކުރާނެ ކަމަށް ރިތޭޝް ވަނީ ބުނެފައެވެ.
