ސީލައިފް ބަލިކޮށް ތިންވަނަ ޑިވިޝަންގެ ޗެމްޕިއަންކަން ސިފައިން ހޯދައިފި

ޕެނަލްޓީ ޖަހައިގެން ސީލައިފް ސްޕޯޓްސް ކްލަބް ބަލިކޮށް ތިންވަނަ ޑިވިޝަން ފުޓުބޯޅަ މުބާރާތުގެ ޗެމްޕިއަންކަން ދިވެހި ސިފައިންގެ ކްލަބް ހޯދައިފިއެވެ.

އާދީއްތަ ދުވަހު ހަވީރު ކުޅުނު މެޗުގެ ފުރިހަމަ ވަގުތު ހަމަވިއިރު، ސީލައިފް އަދި ސިފައިން ވަނީ 1-1 ގެ ނަތީޖާއިން އެއްވަރުވެފައެވެ. އެގޮތުން ނަތީޖާ ނެރުމަށް ޖެހި ޕެނަލްޓީ 2-3 ގެ ނަތީޖާއަކުން ސިފައިން ވަނީ ކާމިޔާބު ކޮށްފައެވެ.

ގަލޮޅު ރަސްމީ ދަނޑުގައި ކުޅުނު މި މެޗުގެ ފުރަތަމަ ހާފްގައި ދެޓީމުން ކުރެ ޓީމަކަށް ވެސް ލަނޑެއް ޖެހިފައެއް ނުވެއެވެ. އެހެން ނަމަވެސް ލަނޑު ޖަހަން ރަނގަޅު ފުރުސަތު ދެޓީމަށް ވެސް ވަނީ ލިބި ބޭކާރުވެފައެވެ.

ދެވަނަ ހާފް ފެށިގެން ދެޓީމުގެ ފަރާތުން ވެސް ވާދަވެރި ކުޅުމެއް ފެނިގެންގޮސްފައިވާއިރު، ލަނޑު ޖަހަން ވެސް ހުސް ފުރުސަތުތަކެއް ވަނީ ލިބިފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ސިފައިންނެވެ. މި ލަނޑު 80 ވަނަ މިނެޓުގައި އެޓީމަށް ކާމިޔާބު ކޮށްދިނީ ނަދީފް އިބްރާހިމްއެވެ. އެހެން ނަމަވެސް މެޗު ނިމެން ތިން މިނެޓަށްވެފައި ވަނިކޮށް ސީލައިފްގެ އަޑޭޔަންޖޫ ރަޝީދް ވަނީ އެޓީމަށް ނަތީޖާ ހަމަހަމަ ކޮށްދީފައިވެއެވެ.

މެޗުގެ ފުރިހަމަ ވަގުތު ހަމަވިއިރު ނަތީޖާ އަށް ބަދަލު ނައުމުން ޖެހި ޕެނަލްޓީ 2-3 ގެ ނަތީޖާއަކުން ކާމިޔާބުކުރީ ސިފައިންނެވެ. ސިފައިންގެ ޕެނަލްޓީތައް ކާމިޔާބުކޮށްދިނީ ހުސެއިން ފަވާޒް އާއި ނަދީފް އިބްރާހިމްގެ އިތުރުން އަލީ އިހްސާންއެވެ. ސީލައިފްގެ ޕެނަލްޓީތައް ކާމިޔާބުކޮށްދިނީ މުހައްމަދު އަޔާޒް އަދި ސިމްޕްސޮން ކެއިތީއެވެ.

މުބާރާތުގެ އެންމެ މޮޅު ގޯލް ކީޕަރަކަށް ބުރު ސްޕޯޓްސް ކްލަބްގެ އަބްދުﷲ އަރުޝަމް ހޮވުނުއިރު، އެންމެ މޮޅު ކުޅުންތެރިޔަކަށް ހޮވިފައިވަނީ ސީލައިފްގެ އަޑޭޔަންޖޫ ރަޝީދްއެވެ.