ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަދި މޯލްޑިވްސް ފުޓްބޯލް ގުޅިގެން ބޭއްވި މޯލްޑިވްސް ފުޓްބޯލް އެވޯޑްސްގެ އެންމެ މޮޅު ކުޅުންތެރިޔާގެ އެވޯޑު ޖެހިޖެހިގެން ދެވަނަ ފަހަރަށް ނިއު ރޭޑިއަންޓް ސްޕޯޓްސް ކްލަބްގެ ފޯވާޑް އަލީ ފާސިރް (ސެންޓޭ) ހޯދައިފިއެވެ.

ސެންޓޭ މި މަގާމު ދިފާއުކުރިއިރު އޭނާ ވަނީ އެންމެ ގިނަ ލަނޑު ޖެހި ކުޅުންތެރިޔާއަށް ދޭ ރަން ބޫޓު ވެސް ޖެހިޖެހިގެން ދެވަނަ ފަހަރަށް ހޯދާފައެވެ. ސެންޓޭ މިފަހަރުގެ ރަން ބޫޓު ގެންދިޔައީ މި ސީޒަނުގައި 24 ލަނޑު ޖަހައިގެންނެވެ. ސެންޓޭ މި ދެ މަގާމު ދިފާއުކުރިއިރު އޭނާވަނީ ނިއުއިން މި ސީޒަނުގައި ތިން ތަށި ހޯދިއިރު އެ ޓީމުގައި މުހިންމު ރޯލެއް އަދާކޮށްފައެވެ.

ނިއުއަށް ޕްރެޒިޑެންޓްސް ކަޕްއާއި އެފްއޭ ކަޕްގެ އިތުރުން އުރީދޫ ދިވެހި ޕްރިމިއާ ލީގު ހޯދައިދިން ސްޕެއިންގެ ކޯޗު އޮސްކާ ބްރޫޒޯންއަށް އަހަރުގެ އެންމެ މޮޅު ކޯޗުގެ މަގާމު ލިބުނުއިރު މި ސީޒަނުގައި ފެނިގެންދިޔަ އެންމެ މޮޅު ބިދޭސީ ކުޅުންތެރިޔަކަށް ހޮވިފައިވަނީ ނިއުއަށް ކުޅުނު ސްޕެއިންގެ ފޯވާޑް އެޑްރިއަން ގަލާޑޯއެވެ.

މި ސީޒަނުގައި އަލަށް ތައާރަފް ކުރެވިގެންދިޔަ 'ޖޫލޭ އެވޯޑު' ނުވަތަ އެންމެ މޮޅު ގޯލް ޖެހި ކުޅުންތެރިޔަކަށް ދޭ އެވޯޑު ލިބިފައިވަނީ ޓީސީ ސްޕޯޓްސްގެ ފޯވާޑް އިބްރާހިމް މަހުދީ ހުސައިން (ފޭދޫ އިއްބެ) އަށެވެ. އޭނާ ވަނީ މި ސީޒަނުގައި މޮޅު ކުޅުމެއް ދައްކައި 17 ލަނޑު ޖަހާފައެވެ. މި ސީޒަނުގައި އޭނާގެ ފަރާތުން ފެނިގެންދިޔަ ކުޅުމުގެ ސަބަބުން ގައުމީ ޓީމުން ވެސް އޭނާވަނީ ޖާގަ ހޯދާފައެވެ.

އެންމެ މޮޅު ގޯލްކީޕަރުގެ މަގާމު ނިއުގެ ކީޕަރު އިމްރާން މުހައްމަދު (އިންމަ) ހޯދިއިރު، އެންމެ އުއްމީދީ ކުޅުންތެރިޔަކަށް ހޮވިފައިވަނީ ޓީސީ ސްޕޯޓްސް ކްލަބްގެ ފޯވާޑް ނާއިޒް ހަސަން (ދާދު) އެވެ. އެންމެ ވަރުގަދަ ސަޕޯޓެއް ދޭ ޓީމަކަށް ދޭ ސަޕޯޓާސް އެވޯޑު ލިބިފައިވަނީ އއ. މާޅޮސް ޓީމަށެވެ.  

މި އެވޯޑު ހަފްލާގެ ހާއްސަ މެހުމާނެއްގެ ގޮތުން ބާސެލޯނާ އަދި ސްޕެއިންގެ ކުރީގެ ޑިފެންޑަރު ކާލެސް ޕުޔޯލް ވަނީ ބައިވެރިވެފައެވެ.