ކުޓީނިއޯ ހޯދުމަށް ހުށަހެޅި ބިޑުގެ އަގު ބޮޑުކުރަން ބާސާ އިން ނިންމައިފި

ލިވަޕޫލް އަށް ކުޅެމުން އަންނަ ފިލިޕޭ ކުޓީނިއޯ ހޯދުމަށް ހުށަހެޅި ބިޑު ބޮޑުކުރަން ބާސެލޯނާއިން ނިންމައިފި ކަމަށް ރިޕޯޓްތައް ބުނެފިއެވެ.

"މުންޑޯ ޑިޕޯޓިވޯ" އިން ބުނީ ކުރިޔަށް އޮތް ޖެނުއަރީ ޓްރާންސްފާއާ އަމާޒުކޮށް ކުޓީނިއޯ ގެންނަން ބާސާ އިން މަސައްކަތްކުރަމުން އަންނަ ކަމަށާއި، އެގޮތުން އޭނާ ހޯދުމަށް ބާސާ އިން ހުށަހެޅި ބިޑު 145 މިލިއަން ޔޫރޯ އަށް ބޮޑުކުރަން ނިންމާފައިވާ ކަމަށެވެ.

ބާސާ އިން ވަނީ އެކި ފަހަރު މަތިން ކުޓީނިއޯ ހޯދުމަށް ބިޑްކޮށްފައެވެ. އެހެން ނަމަވެސް ލިވަޕޫލް އިން ވަނީ އެ ހުރިހާ ބިޑެއް ވެސް ރިޖެކްޓް ކޮށްފައެވެ.

ރިޕޯޓްތައް ބުނާ ގޮތުން ކުޓީނިއޯގެ މުސާރަ ހަމަޖެއްސުމަށް ތިން ކުޅުންތެރިޔަކު ވިއްކާލަން ނިންމާފައި ވެއެވެ. އޭގެ ތެރޭގައި އަރްދާ ޓުރާން ވެސް ހިމެނޭ ކަމަށް ރިޕޯޓްތައް ބުނެއެވެ.

ބާސާގެ އިތުރުން ގިނަ ކްލަބްތަކުން އަންނަނީ ކުޓީނިއޯ ހޯދުމަށް މަސައްކަތް ކުރަމުންނެވެ. އޭގެ ތެރޭގައި އިންލޭންޑް، ސްޕެއިން، ޖަރުމަން އަދި ފްރާންސްގެ ކްލަބްތައް ވެސް ހިމެނެއެވެ.

މި ސީޒަނުގެ ކުރީކޮޅު އަނިޔާގެ ސަބަބުން ލިވަޕޫލްގެ ޓީމުން ކުޓީނިއޯއަށް ފުރުސަތު ގެއްލުނު ނަމަވެސް އަނިޔާއިން އެނބުރި އައިސް އޭނާ އަންނަނީ ލިވަޕޫލްގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ޓީމަށް މި ސީޒަނުގެ މިހާތަނަށް ކުޅުނު 14 މެޗުގައި ހަ ލަނޑު ޖަހާފައެވެ.

ލިވަޕޫލްއާ އެކު 2022 ވަނަ އަހަރާ ހަމަޔަށް ކޮންޓްރެކްޓް ހަދާފައިވާ ކުޓީނިއޯ އެ ޓީމަށް ބަދަލުވެފައި ވަނީ 2012 ވަނަ އަހަރުއެވެ. އޭނާ ވަނީ އެ ޓީމަށް ބަދަލުވި ފަހުން މިހާތަނަށް އެ ޓީމަށް ކުޅެދިން 195 މެޗުގައި 51 ލަނޑު ޖަހައިދީފައެވެ.

ލިވަޕޫލްގައި އޭނާ މޮޅު ކުޅުމެއް ދައްކަމުން އައި ނަމަވެސް ފުޓްބޯޅައިގެ ދުނިޔޭގެ ނަން މަޝްހޫރު އެތަކެއް ފަރާތްތަކުން އަންނަނީ އޭނާ އެހެން ޓީމަކަށް ބަދަލުވުމަށް ގޮވާލަމުންނެވެ.