ދިވެހި ޕްރިމިއާ ލީގު: ޓީސީއަށް މިފަހަރުވެސް ދެވަނަ، ތިނަދޫއަށް ގަދަ ހަތަރެއްގެ ޖާގައެއް

އުރީދޫ ދިވެހި ޕްރިމިއާ ލީގުގެ ދެވަނައިގައި ޖެހިޖެހިގެން ތިންވަނަ ފަހަރަށް ޓީސީ ސްޕޯޓްސް ކްލަބް ނިންމާލިއިރު، ތިނަދޫ ގަދަ ހަތަރެއްގެ ޖާގައެއް ކަށަވަރު ކޮށްފިއެވެ.

ލީގުގެ ދެވަނަ ޓީސީ ކަށަވަރުކުރީ އާދީއްތަ ދުވަހު ހަވީރު ކްލަބް ގްރީން ސްޓްރީޓްއާ ވާދަކޮށް 1-4 ގެ ނަތީޖާއިން މެޗު ކާމިޔާބު ކޮށްގެންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. މެޗުގައި ފުރަތަމަ ލަނޑު ޖަހާ ލީޑު ނެގީ ގްރިންއެވެ. މި ލަނޑު 14 ވަނަ މިނެޓުގައި އެޓީމަށް ކާމިޔާބުކޮށްދިނީ އަހުމަދު ހަސަންއެވެ.

މި ލަނޑާއެކު ޓީސީން ވަނީ އެޓީމުގެ ކުޅުން ރަނގަޅު ކޮށްފައެވެ. އެގޮތުން އެޓީމުން ވަނީ 31 ވަނަ މިނެޓުގައި ނަޝާހް އަހުމަދު ކާމިޔާބުކުރި ލަނޑުން މެޗުގެ ނަތީޖާ ހަމަހަމަ ކޮށްފައެވެ.

މި ލަނޑަށްފަހު ވެސް ޓީސީ އަށް ވަނީ ލަނޑު ޖެހުމަށް ހުސް ގިނަ ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ޓީސީ ވަނީ ފުރަތަމަ ފަހަރަށް މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ ސްޓެވާޓްއެވެ. މި ލަނޑަށްފަހު ވެސް ޓީސީން ދިޔައީ ގްރީންގެ ގޯލަށް ނުރައްކާކޮށް ހަމަލާތަކެއް އުފައްދަމުންނެވެ.

ޓީސީގެ ޖެހި ތިންވަނަ ލަނޑު 58 ވަނަ މިނެޓުގައި ނަޝާހް އަހުމަދު ކާމިޔާބު ކޮށްދިންއިރު، ހަތަރުވަނަ ލަނޑު 69 ވަނަ މިނެޓުގައި އެޓީމަށް ކާމިޔާބު ކޮށްދިނީ މުހައްމަދު އަޖުފާންއެވެ.

މި ލަނޑުތަކަށްފަހު ވެސް ޓީސީ އަށް ވަނީ ފުލުފުލުގައި ލަނޑު ޖަހަން ހުސް ގިނަ ފުރުސަތުތަކެއް ލިބި ބޭކާރުވެފައެވެ. އެގޮތުން އިބްރާހިމް މުހުދީ (ކުދުއިއްބެ) އަށް ލިބުނު ފުރުސަތުތައް ހިމެނެއެވެ.

މި ނަތީޖާއާއެކު ޓީސީ ވަނީ 32 ޕޮއިންޓް ހަމަކޮށް ޕޮއިންޓް ތާވަލުގެ ދެވަނަ ކަށަވަރު ކޮށްފައެވެ. މެޗުން ބަލިވި ގްރީން އަށް ފަސް ވަނަ ކަށަވަރުވީ 16 ޕޮއިންޓާއެކުގައެވެ. ތިނަދޫ އަށް ހަތަރުވަނަ ކަށަވަރުވީ 18 ޕޮއިންޓާއެކުގައެވެ.

ލީގުގައި ކުޅޭ ފަހު މެޗުގައި މާޒިޔާ ސްޕޯޓްސް އެންޑް ރެކްރިއޭޝަން ނިކުންނާނީ ނިއުރޭޑިއަންޓް ސްޕޯޓްސް ކްލަބާ ދެކޮޅަށެވެ.