ދިވެހި ޕްރިމިއާ ލީގު: މިލަންދޫ އިން ޓީސީ ހިފަހައްޓައިފި

އުރީދޫ ދިވެހި ޕްރިމިއާ ލީގުގައި މިލަންދޫ އިން ޓީސީ ސްޕޯޓްސް ކްލަބް ހިފަހައްޓައިފިއެވެ.

އަންގާރަ ދުވަހުގެ ރޭ މިލަންދޫ އަދި ޓީސީ ބައްދަލުކުރި މެޗު އެއްވަރުވީ 0-0 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެމުންދިޔައީ ޓީސީންނެވެ. އެގޮތުން އެޓީމަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފްގައި ޓީސީގެ ބިދޭސީ ފޯވާޑް ސްޓެވާޓް އަދި އިބްރާހިމް މަހުދީ (ކުދު އިއްބެ) އަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބިފައެވެ. އެހެންނަނަމވެސް މިލަންދޫ އިން ވަނީ ޓީސީ ހިފެހެއްޓުމަށް ފުރަތަމަ ހާފްގައިވެސް ބުރަ މަސައްކަތްކޮށްފައެވެ.

ދެވަނަ ހާފްގައި ޓީސީން އެޓީމުގެ އެޓޭކްތައް ވަރުގަދަކޮށްފައިވާއިރު، ފުލުފުލުގައި ލަނޑު ޖެހުމަށް އެޓީމުންދިޔައީ ފުރުސަތު ހޯދަމުންނެވެ. އެހެންނަމަވެސް ދެވަނަ ހާފްގައިވެސް މިލަންދޫގެ ޑިފެންސް ފޫއަޅުވާލުމަށްފަހު ލަނޑެއް ޖެހުމަށް ޓީސީ ވަނީ ނުކުޅެދިފައެވެ.

މެޗުގެ ފަހުވަގުތުކޮޅު ތެރޭގައި މިލަންދޫގެ ފަރާތުން ލަސް ކުޅުމެއް ފެނިގެންދިޔައިރު، ރެފްރީ ވަނީ މެޗުގެ އިތުރުވަގުތުގެ ގޮތުގައި 8 މިނެޓު ދައްކާފައެވެ. އެހެންނަމަވެސް އެ 8 މިނެޓު ތެރޭގައިވެސް ހިނގައިދިޔަ ކަންތައްތައްތަކާއެކު 10 މިނެޓު ވަންދެން ކުޅުން ވަނީ ކުރިޔަށް ގެންގޮސްފައެވެ.

މެޗަށްފަހު ދެޓީމުގެ ކުޅުންތެރިން އަދި ސަޕޯޓަރުން ދެމެދުގައިވެސް ވަނީ ހަމަނުޖެހުންތަކެއް ހިނގާފައެވެ. އެހެންނަމަވެސް ފުލުހުން ވަނީ މާގިނައިރުތަކެއް ނުވެ ސަޕޯޓަރުން އަދި އޮފިޝަލުން ކޮންޓްރޯލްކޮށްފައެވެ.

މެޗަށްފަހު ވާހަކަދައްކަމުން ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނީ އަދިވެސް ޓީސީ އަށް ލީގު ނުގެއްލޭ ކަމަށާއި، މިފަހަރު ޓީސީ އަށް ލީގު ކާމިޔާބުކުރެވެން އަދިވެސް އުންމީދު އެބައޮތްކަމަށެވެ.

މިލަންދޫގެ ކޯޗު ނަސީރު ބުނީ ޓީސީފަދަ ޓީމެއް އަތުން ޕޮއިންޓެއް ލިބުމުން ވަރަށް އުފާވާ ކަމަށާއި، މިއީ ކުޅުންތެރިން ކުރި މަސައްކަތުން ލިބުނު ޕޮއިންޓެއް ކަމަށެވެ. އެގޮތުން އޭނާ ވަނީ ކުޅުންތެރިންގެ މަސައްކަތަށް ޝުކުރު އަދާކޮށްފައެވެ.

މި ނަތީޖާއާއެކު ޓީސީ އޮތީ ކުޅުނު 11 މެޗުން ލިބުނު 26 ޕޮއިންޓާއެކު، ޕޮއިންޓް ތާވަލުގެ ދެވަނައިގައެވެ. އެއްވަނައިގައި އޮތީ ޓީސީއަށްވުރެ ހަތަރު ޕޮއިންޓް އިތުރަށް ހޯދައިގެން ނިއުރޭޑިއަންޓެވެ.