އޭއެފްސީ 19 އަހަރުން ދަށުގެ މުބާރާތް: ފަހުވަގުތު ސްރީލަންކާ އަތުން ރާއްޖެ އެއްވަރުވެއްޖެ
31 އޮކްޓޯބަރު 2017 | އަންގާރަ 15:08ރާއްޖެ ދެން ނިކުންނާނީ ބަންގްލަދޭޝްއާ ދެކޮޅަށް
ރާއްޖެ އަދި ސްރީލަންކާ ބައްދަލުކުރި މެޗުގެ ތެރެއިން
އޭއެފްސީ 19 އަހަރުން ދަށުގެ މުބާރާތުގެ ކޮލިފައިންގައި ފަހުވަގުތު ސްރީލަންކާ އަތުން ރާއްޖެ އެއްވަރުވެއްޖެއެވެ.
ތަޖިކިސްތާންގައި ކުޅުނު މި މެޗް ފެށިގެން ފުރަތަމަ ލަނޑު ޖަހާ ލީޑު ނެގީ ރާއްޖެއިންނެވެ. މި ލަނޑު 15 ވަނަ މިނެޓުގައި ރާއްޖެއަށް ކާމިޔާބު ކޮށްދިނީ ރިޝްވާން އިސްމާއިލްއެވެ.
މި ލަނޑަށް ފަހު ވެސް ރާއްޖެއިން ދިޔައީ ރަނގަޅަށް ކުޅެމުންނެވެ. އެހެން ނަމަވެސް ފުރަތަމަ ހާފް ނިމެން މިނެޓަކަށްވެފައި ވަނިކޮށް ސްރީލަންކާއިން ވަނީ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ރަޒޫނިޔާ މުހައްމަދު ޝަބީރްއެވެ.
ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.
ދެވަނަ ހާފް ފެށިގެން މާގިނައިރުތަކެއް ނުވަނީސް ރާއްޖެއިން ވަނީ އަނބުރާ މެޗުގެ ލީޑު ނަގާފައެވެ. މި ލަނޑު ރާއްޖެއަށް ކާމިޔާބު ކޮށްދިނީ ބަދަލު ކުޅުންތެރިޔާ މުސަނިފް މުހައްމަދު އެވެ.
އެހެން ނަމަވެސް މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ދެ މިނެޓު ތެރޭގައި ސްރީލަންކާ އިން ވަނީ ނަތީޖާ ހަމަހަމަ ކޮށްފައެވެ. މި ލަނޑު ސްރީލަންކާއަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން އެރި މަލްޝަންއެވެ.
ކޮލިފައިންގައި ރާއްޖެ ހިމެނޭ ގްރޫޕް ބީގައި ބަންގްލަދޭޝް އަދި ތަޖިކިސްތާން ބައްދަލުކުރި މެޗު ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.
ކޮލިފައިންގައި ހޮނިހިރު ދުވަހު ބަންގްލަދޭޝްއާ ދެކޮޅަށް ރާއްޖެ ނިކުންނައިރު، ސްރީލަންކާ ނިކުންނާނީ އުޒްބަކިސްތާންއާ ދެކޮޅަށެވެ.
