އުރީދޫ ދިވެހި ޕްރިމިއާ ލީގުގައި ގދ. ތިނަދޫއާ ދެކޮޅަށް ކުޅުނު މެޗު ކާމިޔާބުކޮށް ނިއު ރޭޑިއަންޓް ސްޕޯޓްސް ކްލަބްއިން އެއްވަނައިގައި ހަމަޖެހިލައިފިއެވެ.

ހޯމަ ދުވަހުގެ ރޭ ގަލޮޅު ދަނޑުގައި ތިނަދޫއާ ދެކޮޅަށް ކުޅުނު މެޗު ނިއު އިން ކާމިޔާބު ކޮށްފައިވަނީ 3-1 ގެ ނަތީޖާ އަކުންނެވެ. މި މެޗުގައި ވެސް ނިއުއިން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. އެ ޓީމުން ވަނީ މި މެޗުގައި ވެސް މޮޅު އެޓޭކިން ފުޓްބޯޅައެއް ކުޅެ ތިނަދޫގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލާފައެވެ.

އެގޮތުން މެޗުގެ 20 ވަނަ މިނެޓުގައި ނިއުއަށް ލީޑު ލިބިގެން ދިޔައީ އަލީ ފާސިރް (ސެންޓޭ) ނަގައިދިން ކޯނަރަކުން އެ ޓީމުގެ މިޑްފީލްޑާ ކަންޑޭލާ ބޮލުން ގޯލުގެ ތެރެއަށް ބޯޅަ ފޮނުވާލައިގެން ލަނޑެއް ކާމިޔާބު ކޮށްދީގެންނެވެ. މެޗުގެ 40 ވަނަ މިނެޓުގައި ނިއުގެ ދެވަނަ ލަނޑު އެ ޓީމަށް ޖަހައިދިނީ އަލީ އަޝްފާގް (ދަގަނޑޭ) އެވެ. މި ލަނޑަކީ އެ ޓީމުގެ ބިދޭސީ ފޯވާޑް ގަލާޑޯ ތަނަވަސް ކޮށްދިން ފުރުސަތަކުން ދަގަނޑޭ ކާމިޔާބުކުރި ލަނޑެކެވެ.

ފުރަތަމަ ހާފު 2-0 ގެ ނަތީޖާއަކުން ނިއު ކުރީގައި އޮވެގެން ނިމުނުއިރު ތިނަދޫއިން ވަނީ ދެވަނަ ހާފުގައި އެ ޓީމުގެ ކުޅުން ރަނގަޅުކޮށް ލަނޑު ޖެހުމަށް ފުރުސަތު ތަނަވަސް ކުރުމަށް މަސައްކަތް ކޮށްފައެވެ. އެގޮތުން މެޗުގެ 65 ވަނަ މިނެޓުގައި އެ ޓީމުގެ ވިންގާ އަހުމަދު ރިޒުވާން (ރިޒޭ) ތަނަވަސް ކޮށްދިން ފުރުސަތެއްގައި އެ ޓީމުގެ ބިދޭސީ ކުޅުންތެރިޔާ ހޯސޭ އެލެކްސެންޑާ އަވީލާ ވަނީ ލަނޑެއް ޖަހާ ތިނަދޫއަށް ނަތީޖާގެ ފަރަގު ކުޑަ ކޮށްދީފައެވެ. ތިނަދޫއިން ލަނޑު ޖެހިތާ ފަސް މިނެޓުގެ ތެރޭގައި ކަންޑޭލާ ނަގައިދިން ކޯނަރަކުން ގަލާޑޯ ވަނީ ލަނޑެއް ޖަހާ އެ ޓީމުގެ ލީޑު އަނެއްކާ ވެސް ފުޅާ ކޮށްދީފައެވެ.

މި މޮޅާއެކު ނިއުވަނީ ޕޮއިންޓް ތަވާލުގެ ކުރީގައި އެ ޓީމަށް ލިބިފައިވާ ލީޑު ފުޅާ ކޮށްފައެވެ. އެގޮތުން ކުޅުނު 11 މެޗުން އެ ޓީމު 30 ޕޮއިންޓް ހަމަކޮށްފައިވާއިރު ދެވަނައިގައި އޮތް ޓީސީއަށް 10 މެޗުން ލިބިފައިވަނީ 25 ޕޮއިންޓްއެވެ. އަދި ތިން ވަނައިގައި އޮތް މާޒިޔާއަށް 10 މެޗުން 20 ޕޮއިންޓް ލިބޭއިރު ނިއު އަތުން ބަލިވި ތިނަދޫ އޮތީ ކުޅުނު 11 މެޗުން ލިބުނު 12 ޕޮއިންޓާއެކު ތާވަލުގެ ފަސް ވަނައިގައެވެ.