ވީނަސް ވިލިއަމްސް ބަލިކޮށް، ސީޒަންގެ ފަހު މުބާރާތް ކަމަށްވާ ޑަބްލިއުޓީއޭ ފައިނަލްސް، ޑެންމާކްގެ ކެރޮލިން ވޮޒްނިއާކީ ކާމިޔާބުކޮށްފި އެވެ.
އުމުރުން 37 އަހަރުގެ ވީނަސް ވިލިއަމްސްގެ މައްޗަށް ސިންގަޕޫރުގައި ބޭއްވި ޑަބްލިއުޓީއޭ ފައިނަލްސްގައި ވޮޒްނިއާކީ ކުރިހޯދީ 6-4 އަދި 6-4 ންނެވެ. މިއީ ވޮޒްނިއާކީގެ ކެރިއަރުގައި ކާމިޔާބުކުރި އެންމެ ބޮޑު މުބާރާތެވެ.
ޑަބްލިއުޓީއޭ ފައިނަލްސްގައި ވާދަކުރި އެންމެ ދޮށީ ކުޅުންތެރިޔާގެ ގޮތުގައި ފައިނަލަށް ނުކުތް ވީނަސް ވިލިއަމްސް ފުރަތަމަ ހަތަރު ގޭމް ކާމިޔާބުކުރި އެވެ. އެހެންނަމަވެސް ވޮޒްނިއާކީގެ ދެވަނަ ޗެމްޕިއަންޝިޕް ޕޮއިންޓާއެކު އޭނާ ވަނީ ކެރިއަރުގައި ފުރަތަމަ ފަހަރަށް ވީނަސް ބަލިކޮށްފައެވެ. ފައިނަލްގެ ނާކާމިޔާބީ އާއެކު ވީނަސް މިސީޒަން ނިންމާލީ އެއްވެސް މުބާރާތެއް ކާމިޔާބު ނުކުރެވި، ހުސް އަތާއެވެ.
މިމެޗަށް މިދެކުޅުންތެރިން ނުކުތްއިރު، 2007 ވަނަ އަހަރުގެ ފަހުން ވޮޒްނިއާކީ އަދި ވީނަސް ހަތް ފަހަރެއްގެ މަތިން ބައްދަލުކޮށްފައިވާއިރު، އެ ހަތް ކުރިމަތިލުންވެސް ނިމިފައިވަނީ ވީނަސް ކޮޅަށް ބުރަވެގެންނެވެ. ވީނަސްގެ މައްޗަށް އެ ހަތް މެޗުގައި ވޮޒްނިއާކީ އަށް ކާމިޔާބު ކުރެވިފައިވަނީ އެންމެ ސެޓެކެވެ.
މެޗަށްފަހު ވާހަކަ ދައްކަމުން ވޮޒްނިއާކީ ބުނީ، ޑަބްލިއުޓީއޭ ފައިނަލްގެ ކާމިޔާބީ އާއެކު އުފާވެފައިވާ ކަމަށެވެ. ވޮޒްނިއާކީ ބުނީ، މިއަހަރަކީ ވަރަށް ކާމިޔާބު އަހަރެއް ކަމަށާއި، އަނިޔާގެ ސަބަބުން މިދިޔަ އަހަރަކީ ދަތި އަހަރަކަށްވީނަމަވެސް، އެނބުރި އައިސް މިއަހަރު ލިބުނު ކާމިޔާބީ އާއިމެދު ވަރަށް ބޮޑަށް ހިތްހަމަޖެހޭ ކަމަށެވެ.
މިދިޔަ އަހަރު ކުރިމަތިވި އަނިޔާގެ ސަބަބުން ގިނަ މުބާރާތްތަކެއް ގެއްލުނު ވޮޒްނިއާކީ، އެކަމުގެ ސަބަބުން ދުނިޔޭގެ ރޭންކިންގެ 74 ވަނަ އަށް ވެއްޓުނެވެ.
އެހެންނަމަވެސް އަނިޔާ އިން އެނބުރި އައިސް މިއަހަރު ދެއްކި މޮޅު ކުޅުމާއެކު އޭނާ ވަނީ ރޭންކިންގެ ފަސްވަނަ އަށް ޖެހިލާފައެވެ. މިއަހަރުގެ ތެރޭގައި އޭނާ ވަނީ އޮސްޓްރޭލިއަން އޯޕަން އަދި ވިމްބަލްޑަން މުބާރާތުގެ ފައިނަލްގައި ވާދަކޮށްފައެވެ.
މިމުބާރާތާއެކު މިއަހަރުގެ ސީޒަން ނިމިފައިވާއިރު، ރޭންކިންގެ އެއްވަނާގައިވަނީ ރުމޭނިއާގެ ސިމޯނާ ހަލެޕް އެވެ. ސިމޯނާ އަކީ، ދުނިޔޭގެ ރޭންކިންގެ އެއްވަނަ ހޯދި 13 ވަނަ އަންހެން ޓެނިސް ކުޅުންތެރިޔާ އެވެ. އޭނާ ރޭންކިންގެ އެއްވަނަ އަށް ޖެހިލީ އޮކްޓޫބަރު މަހުގެ ކުރީކޮޅު ބޭއްވި ޗައިނާ އޯޕަން މުބާރާތުގެ ކާމިޔާބީ އާއެކުއެވެ. އަދި އެމަގާމުގައި އޮވެ އަހަރު ސިމޯނާ އަށް ސީޒަން ނިންމާލެވުނީ، އެމަގާމަށް އެންމެ ވާދަކުރި ކެރޮލީނާ ޕްލިސްކޯވާ، ޑަބްލިއުޓީއޭ ފައިނަލްސް މުބާރާތުގެ ސެމީ ފައިނަލްގައި ހޮނިހިރު ދުވަހު ވޮޒްނިއާކީ އަތުން ބަލިވެގެންނެވެ.
