ޑަބްލިއުޓީއޭ ފައިނަލްސް: ހޭލެޕް އާއި ވޮޒްނިއާކީ މޮޅުވެއްޖެ

ސިންގަޕޫރުގައި މިހާރު ކުރިޔަށްދާ ޑަބްލިއުޓީއޭ ފައިނަލްސްގައި ކެރޮލައިން ވޮޒްނިއާކީ އާއި ސައިމޯނާ ހޭލެޕް ކުޅުނު މެޗުތަކުން އެ ދެ ކުޅުންތެރިން ވެސް މޮޅުވެއްޖެއެވެ.

ޑަބްލިއުޓީއޭ ޓެނިސް ރޭންކިންގެ ގަދަ އަށެއްގައި ހިމެނޭ ކުޅުންތެރިންގެ މެދުގައި ސިންގަޕޫރުގައި މިހާރު ކުރިޔަށްދާ ފައިނަލްސް މުބާރާތުގައި މިވަގުތު ދުނިޔޭގެ ރޭންކިންގެ އެއްވަނައިގައި އޮތް ރޯމޭނިއާގެ ސައިމޯނާ ހޭލެޕް ވަނީ ސީދާ ދެ ސެޓުން ފްރާންސްގެ ކެރޮލައިން ގާސިއާ ބަލިކޮށްފައެވެ. މި މެޗުގެ ސެޓުތަށް ހޭލެޕް ގެންގޮސްފައިވަނީ 6-4 އަދި 6-2 އަކުންނެވެ.

އޭނާގެ ކެރިއަރުގައި މިހާތަނަށް އެއްވެސް ގްރޭންޑް ސްލޭމް މުބާރާތެއް ކާމިޔާބުކޮށްފައި ނުވި ނަމަވެސް ހޭލެޕް މި މުބާރާތާ ކުރިމަތިލީ ސްޕެއިންގެ ގާބައިން މުގުރްޒާ ފަހަތަށް ޖައްސާލުމަށް ފަހު ދުނިޔޭގެ ރޭންކިންގެ އެއްވަނައިގައި އޮވެގެންނެވެ. ހަމައެހެންމެ ހޭލެޕް މި މުބާރާތް ކާމިޔާބު ކޮށްފިނަމަ އޭނާ މިއަހަރު ނިންމާލާނީ ދުނިޔޭގެ އެއް ނަމްބަރު ޓެނިސް ކުޅުންތެރިޔާގެ ގޮތުގައެވެ.

މީގެ ހަތް އަހަރު ކުރިން ޑަބްލިއުޓީއޭ ފައިނަލްސްގައި ވާދަކުރި ވޮޒްނިއާކީ ވަނީ އޭނާއަށް ވުރެ ދެ ދަރަޖަ މަތިން ރޭންކް ކުރެވިފައި އޮތް ޔޫކްރެއިންގެ އެލީނާ ސްވިޓްލޯނާ ސީދާ ދެ ސެޓުން ބަލިކޮށްފައެވެ. މި މެޗުގެ ސެޓުތަށް ވޮޒްނިއާކީ ގެންގޮސްފައިވަނީ 6-2 އަދި 6-0 އަކުންނެވެ.

މި މުބާރާތް ކުރިޔަށް ދަނީ އަށް ކުޅުންތެރިން ދެ ގްރޫޕަކަށް ބަހާލައިގެން ރައުންޑް ރޮބިން ފޯމެޓަށެވެ. އެގޮތުން ކޮންމެ ގްރޫޕެއްގައި ވެސް ހަތަރު ކުޅުންތެރިން ހިމެނޭއިރު ސެމީ ފައިނަލުން ޖާގަ ލިބޭނީ ކޮންމެ ގްރޫޕަކުން ވެސް އެންމެ ރަނގަޅު ނަތީޖާ ހޯދާ ދެ ކުޅުންތެރިންނަށެވެ. ޕްލިސްކޯވާ އަތުން ބަލިވި ވީނަސްއަކީ މި އަހަރުގެ މުބާރާތުގައި ވާދަކުރާ އެންމެ އުމުރުން ދުވަސްވީ ކުޅުންތެރިޔާއެވެ. އޭނާ ވަނީ 2008 ވަނަ އަހަރު މި މުބާރާތް ކާމިޔާބު ކޮށްފައެވެ.

މި މުބާރާތުގެ ފުރަތަމަ ގްރޫޕުގައި ހިމެނެނީ ރޯމޭނިއާގެ ސައިމޯނާ ހޭލެޕް އާއި ޔޫކްރެއިންގެ އެލީނާ ސްވިޓްލޯނާއާ ޑެންމާކުގެ ކެރޮލައިން ވޮޒްނިއާކީގެ އިތުރުން ފްރާންސްގެ ކެރޮލައިން ގާސިއާއެވެ. ދެވަނަ ގްރޫޕުގައި ހިމެނެނީ ސްޕެއިންގެ ގާބައިން މުގުރްޒާއާ ޗެކް ރިޕަބްލިކްގެ ކެރޮލައިން ޕްލިސްކޯވާއާ ލެޓްވިއާގެ ޖެލޭނާ އޮސްޓަޕެންކޯގެ އިތުރުން އެމެރިކާގެ ވީނަސް ވިލިއަމްސްއެވެ.