ހަރަދު ކުޑަ ކުރަން، މެންބަރުންނަށް ލިބޭ އިންޝުއަރެންސް ހުރިހާ ދިވެހިންނަށް ދިނުމަށް ގޮވާލާ ޕެޓިޝަނެއް ހުށަހަޅައިފި
22 އޮކްޓޯބަރު 2026 | ބުރާސްފަތި 21:10މަޖިލިސް މެންބަރުންގެ އިންޝުއަރެންސް ޕެކޭޖަކީ އާސަންދައަށްވުރެ ދައުލަތަށް ފައިދާހުރި ނިޒާމެއް ކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވުމާ ގުޅިގެން، އެ ޕެކޭޖު ހުރިހާ ރައްޔިތުންނަށް ދިނުމަށް ގޮވާލާ ޕެޓިޝަނެއް ހުށަހަޅައިފި. މި ޕެޓިޝަންގައި ވަނީ ދައުލަތުގެ ހަރަދު ކުޑަކުރުމަށްޓަކައި މެންބަރުންނަށް ލިބޭ ފަދަ ގެއްލުން ކުޑަ އިންޝުއަރެންސް ނިޒާމެއް އާންމުންނަށް ގާއިމުކޮށްދިނުމަށް އެދިފައި
ރައްޔިތުންގެ މަޖިލިސް | ރައްޔިތުންގެ މަޖިލިސް
ހަރަދު ކުޑަ ކުރަން، ރައްޔިތުންގެ މަޖިލީހުގެ މެންބަރުންނަށް ލިބޭ ހެލްތް އިންޝުއަރެންސް ހުރިހާ ދިވެހިންނަށް ދިނުމަށް ގޮވާލާ ޕެޓިޝަނެއް ހުށަހަޅައިފި އެވެ.
މި ޕެޓިޝަން ހުށަހަޅާފައިވަނީ ސޯޝަލް މީޑިއާ އެކްޓިވިސްޓް މިދުއާމް ސައުދު އެވެ. އެގޮތުން މި ޕެޓިޝަންގައި ވަނީ ދައުލަތާއި ރައްޔިތުންނަށް ފައިދާ ބޮޑު ގޮތެއް އޮއްވާ، ދައުލަތާއި ރައްޔިތުންނަށް ގެއްލުން ބޮޑު އާސަންދާ އާންމު ރައްޔިތުންނަށް ދިނުމަކީ ސަބަބުވެރި ގޮތެއް ނޫން ކަމަށާއި ކޮށްގެން ވާނެ ކަމެއް ވެސް ނޫން ކަމަށް ބުނެފައި އެވެ. އަދި ދައުލަތުގެ ހަރަދު ކުޑަކޮށް، ގެއްލުން ވީހާވެސް ކުޑަކޮށް، ފައިދާ ވީހާވެސް ބޮޑުވާނެ ގޮތަކަށް ހެލްތް އިންޝުއަރެންސް ސްކީމުތައް ހިންގުމަކީ ސަރުކާރުގެ ގާނޫނީ ޒިންމާއެއް ކަން މި ޕެޓިޝަންގައި ފާހަގަކޮށްފައިވެ އެވެ.
މި ޕެޓިޝަންއަކީ އާންމު ރައްޔިތުންނަށް ނުލިބޭ، މަޖިލިސް މެންބަރުންނަށް ލިބޭ އަގު ބޮޑު ހެލްތް އިންޝުއަރެންސް ކަނޑާލުމަށް ގޮވާލާ 7000 އަށް ވުރެ ގިނަ އާންމުން ހުށަހެޅި ޕެޓިޝަނަށް ބަހުސް ކުރައްވަމުން، މަޖިލިސް މެންބަރުންނަށް މިހާރު ލިބޭ އިންޝުއަރެންސް އިން ދައުލަތަށް ވަނީ ފައިދާ ކަމަށާއި، އާންމުންނަށް ދޭ އާސަންދާއިން ވަނީ ގެއްލުން ކަމަށް އިނގުރައިދޫ ދާއިރާގެ މެންބަރު އަދި ވެރިކަން ކުރާ ޕާޓީ ޕީއެންސީގެ ޕާލިމަންޓްރީ ގްރޫޕް ލީޑަރު އިބްރާހިމް ފަލާހު ވަނީ 19 އޮކްޓޫބަރުގައި ބޭއްވުނު މަޖިލިސް ޖަލްސާގައި ވިދާޅުވުމާއި ގުޅިގެން ހުށަހެޅުނު ޕެޓިޝަން އެކެވެ.
ހަމައެއާއެކު، ރައްޔިތުން މަޖިލީހުގެ މެންބަރުންނަށް މިހާރު ލިބޭ ހެލްތު އިންޝުއަރެންސް އަކީ އާސަންދާ އަަށްވުރެ ގެއްލުން ކުޑަ، ރައްޔިތުންނާއި ދައުލަތަށްވެސް މާ ފައިދާ ބޮޑު ހެލްތް އިންޝުއަރެންސް ޕެކޭޖެއް ކަމަށް މެންބަރު ފަލާހު ވަނީ ތަފްސީލާއެކު މަޖިލިސް ތަޅުމުގައި ވިދާޅުވެ ދެއްވަވާފައި އެވެ.
އެހެންމަ އޭގެ މާނައަކީ ރައްޔިތުންގެ މަޖިލީހުގެ މެންބަރަކަށް 24،000 ރުފިޔާ އަހަރަކު ދައްކާފަ، އޭގެ އިތުރުން މެންބަރަކު ކިތަންމެ ބޮޑު ހަރަދެއް ކުރިއަސް، އެއީކީ ދައުލަތުގެ ބަޖެޓުން ކުރާ ހަރަދެއް ނޫން. އެހެންނަމަވެސް މީގަ އަނެއްކޮޅަށް ބަލައިފިކަމަށް ވަންޏާމު އާސަންދަ ނިޒާމުގަ އަޅުގަނޑަށްވެސް، ދިވެހި ކޮންމެ ރައްޔިތަކަށްވެސް، މިހަރަދު ކުރަނީ، މިވަގުތު އެނިޒާމު އޮތްގޮތުން، ހަމަ ސީދާ ދައުލަތުގެ ބަޖެޓުން އެބަ ހަރަދުވޭ، މިސާލަކަށް ބޮޑު ބައްޔެއް މީހަކަށް ދިމާވީ، ދިވެހި ރައްޔިތަކަށް، މިސާލަކަށް ކެންސާރ ނުވަތަ މިފަދަ ބޮޑު ނުރައްކާ ބައްޔެއް ދިމާވީ، ހިނގައިދާނެ އަހަރަކު ހަ މިލިއަން ރުފިޔާވެސް، ހުސްނުވާ އާސަންދަ މިއޮތީ، އެ ހަމިލިއަންވެސް، ހަތް މިލިއަންވެސް، ދިހަ މިލިއަންވެސް، ހަރަދުވާނީ ހަމަ ދައުލަތުގެ ބަޖެޓުން، އާސަންދަ ނިޒާމުގަ، އެހެންވީމަ ބަލާލަން އެބަޖެހޭ ކޮން ނިޒާމެއްގައިތޯ ދައުލަތަށް ގެއްލުން ކުޑަވެގެން މިދަނީ. މިސާލަކަށް އަޅުގަނޑުމެން މި ޕެކޭޖު ރައްޔިތުންގެ މަޖިލީހު މެންބަރަކު ނަގާފަ މިއޮންނަނީ، ނަގާފަ އޮންނަ އިރު ހަގީގަތުގައި ދައުލަތަށޭ މީގެ ފައިދާ ބޮޑީ، ރައްޔިތުންނަށް ފައިދާ ބޮޑީ، އޭގެ މާނައަކީ އަހަރު އަޅުގަނޑުމެންނަށް އާސަންދަ އެ އޮންނަ، ދައުލަތުން ހަރަދު ކުރާ އާސަންދަ ތެރެއިން އަޅުގަނޑުމެންނެއް، ހަރަދު ކުރާކަށް ނުޖެހޭ 1،3500،000 ރުފިޔާ އާއި ހަމަޔަށް އަޅުގަނޑުމެން އަހަރަކު ހަރަދު ކުރާއިރުއިބްރާހިމް ފަލާހު
އެހެންކަމުން، މެންބަރު ފަލާހު އިރުޝާދު ދެއްވެވި ގޮތަށް، ދައުލަތާއި ރައްޔިތުންނަށް ލިބޭ ގެއްލުން ކުޑަކޮށް، ހަރަދު ކުޑަ ކުރުމުގެ ގޮތުން، ރައްޔިތުންގެ މަޖިލީހުގެ މެންބަރުންނަށް ލިބިލައްވަވާ، އާސިއާން، ޔޫރަޕް އަދި މެދުއިރުމަތީގެ 19 ވަރަކަށް ގައުމު ހިމެނޭ، ދައުލަތަށް ގެއްލުން ކުޑަ، އާސްނަދާއަށް ވުރެ ފައިދާ ބޮޑު، އިންޝުއަރެންސް ޕެކޭޖު ހުރިހާ ދިވެހި ރައްޔިތުންނަށް ވެސް ވީހާ ވެސް އަވަހަކަށް ދިނުމަށް ގޮވާލާ ވަނީ ޕެޓިޝަން ހުށަހަޅާފައި އެވެ.
