ހޮޓެލް އޭޝިއާ އެގްޒިބިޝަން 2026: ޔޫރޯ މާކެޓިންގެ ސްޓޯލްތަކުން ބައިނަލްއަގުވާމީ ކާބޯތަކެތީގެ އުފެއްދުންތައް ތަޖުރިބާ ކުރުމުގެ ފުރުސަތު

ހުޅުމާލޭގެ ސިންތެޓިކް ޓްރެކްގައި މިހާރު ކުރިއަށްދާ ހޮޓެލް އޭޝިއާ އެގްޒިބިޝަން 2026 ގައި ޔޫރޯ މާކެޓިންގް އިން ބައިވެރިވެ، އެ ކުންފުނިން ރާއްޖެއަށް އެތެރެކުރާ ބައިނަލްއަގުވާމީ ކާބޯތަކެތީގެ އުފެއްދުންތައް ދައްކާލަން ފަށައިފި އެވެ.

މި ސެޕްޓެމްބަރު މަހުގެ 28 އިން 30 ގެ ނިޔަލަށް ކުރިއަށްދާ މި މައުރަޒަކީ ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި، ސިނާއީ ބައިވެރިން އެއްތަނަކުން ބައްދަލުވެ، އައު އުފެއްދުންތަކާއި ހިދުމަތްތައް ތައާރަފުކުރުމަށް ލިބޭ މުހިންމު ފުރުސަތެކެވެ.

މި މައުރަޒުގައި ޔޫރޯ މާކެޓިންގެ ސްޓޯލްތަކަށް ޒިޔާރަތްކުރާ ފަރާތްތަކަށް އެ ކުންފުނީގެ ބައިނަލްއަގުވާމީ ޕޯޓްފޯލިއޯގައި ހިމެނޭ ތަފާތު އުފެއްދުންތައް ބަލާލުމުގެ ފުރުސަތު ވަނީ ހުޅުވާލާފަ އެވެ. މީގެ އިތުރުން މައުރަޒު ކުރިއަށްދާ ވަގުތުތަކުގައި އެ ކުންފުނިން ގެންގުޅޭ ކާބޯތަކެތީގެ ރަހަ ބަލާލުމުގެ ހަރަކާތްތައް ވެސް ސްޓޯލްތަކުގައި ކުރިއަށްދާނެ އެވެ. މި ހަރަކާތްތަކުގެ ސަބަބުން ހޮސްޕިޓަލިޓީ އަދި ފުޑް ސަރވިސް ދާއިރާގައި މި އުފެއްދުންތައް ބޭނުންކުރެވިދާނެ ގޮތްތަކާ ބެހޭ މައުލޫމާތު ޒިޔާރަތްތެރިންނަށް ލިބިގެންދާނެ ކަމަށް އެ ކުންފުނިން ބުނެ އެވެ.

މި ފަހަރުގެ އެގްޒިބިޝަންގައި ޔޫރޯ މާކެޓިންގް އިން ވަނީ ރާއްޖޭގެ ބާޒާރުގައި މިހާރު ވެސް ލިބެން ހުރި އުފެއްދުންތަކުގެ އިތުރުން، މުޅިން އަލަށް ތައާރަފުކުރާ ބައެއް އުފެއްދުންތައް ވެސް ދައްކާލާފަ އެވެ. މިއީ އެ ކުންފުނީގެ މިހާރުގެ ކަސްޓަމަރުންނާއި ވިޔަފާރީގެ ބައިވެރިންނާ ގުޅުން ބަދަހިކޮށް، ދާއިރާގެ އައު ފަންނުވެރިންނާ ބައްދަލުކުރުމަށް ލިބޭ ވަރަށް ރަނގަޅު ފުރުސަތެއްގެ ގޮތުގައި އެ ކުންފުނިން ފާހަގަކުރެ އެވެ.

ޔޫރޯ މާކެޓިންގެ މާކެޓިންގް މެނޭޖަރު ނާއިޝް ޝާތިރު ވިދާޅުވީ، ހޮޓެލް އޭޝިއާ މައުރަޒަކީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާ ސީދާ ބައްދަލުކޮށް މުއާމަލާތް ކުރުމަށް ލިބޭ ވަރަށް ބޮޑު ފުރުސަތެއް ކަމަށެވެ. އަދި ބައިނަލްއަގުވާމީ އުފެއްދުންތައް ދައްކާލުމުގެ އިތުރުން، ބާޒާރަށް އަންނަމުންދާ ބަދަލުތަކާ ގުޅޭގޮތުން މަޝްވަރާކޮށް، އައު އުފެއްދުންތައް ތައާރަފުކުރުމަށް މިއީ ވަރަށް އެކަށީގެންވާ މާހައުލެއް ކަމަށް ވެސް އޭނާ ފާހަގަކުރެއްވި އެވެ.

ހޮޓެލް އޭޝިއާ 2026 ކުރިއަށްދާ ސިންތެޓިކް ޓްރެކްގައި ޔޫރޯ މާކެޓިންގެ އުފެއްދުންތައް ދައްކާލުމަށް ހަމަޖެހިފައިވަނީ އޭ081، އޭ080، އޭ058 އަދި އޭ059 ނަންބަރު ސްޓޯލްތަކުގަ އެވެ. ކޮންމެ ދުވަހެއްގެ ހެނދުނު 10:00 އިން ރޭގަނޑު 7:00 އަށް މައުރަޒު ހުޅުވިފައި ހުންނައިރު، ޒިޔާރަތްތެރިންނަށް އެ ކުންފުނީގެ ޓީމާ ބައްދަލުކޮށް އުފެއްދުންތަކާ ގުޅޭ މައުލޫމާތު ސާފުކުރުމުގެ ފުރުސަތު އޮންނާނެ އެވެ.