މާފަންނު ރެސްޓޯރެންޓެއްގައި މާރާމާރީ ހިންގި ޒުވާނަކު ހައްޔަރުކޮށްފި
23 އޯގަސްޓު 2026 | އާދީއްތަ 05:32މި މައްސަލައިގެ ތުހުމަތުގައި ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 19 އަހަރުގެ ދިވެހި ފިރިހެނެއް. އޭނާ ހައްޔަރުކޮށް، މި ހާދިސާ ހިނގަން މެދުވެރިވި ސަބަބާއި މާރާމާރީއާ ގުޅޭ އިތުރު ތަފްސީލު ހޯދުމަށް ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުން
ފުލުހުން ކުރިއަށް ގެންދިޔަ ޚާއްސަ އޮޕަރޭޝަނެއްގެ ތެރެއިން | މޯލްޑިވްސް ޕޮލިސް
މާލޭގެ މާފަންނުގައި ހުންނަ ރެސްޓޯރެންޓެއްގެ ތެރޭގައި އަންހެނަކަށް ހަމަލާދީ މާރާމާރީ ހިންގި މައްސަލައަކާ ގުޅިގެން ޒުވާނަކު ފުލުހުންގެ ބެލުމުގެ ދަށަށް ގެންގޮސްފި އެވެ.
މި ހާދިސާ ހިނގާފައިވަނީ 2026 އޮގަސްޓް 22 ވީ ހޮނިހިރު ދުވަހުގެ ރޭގަނޑުގެ ވަގުތެއްގަ އެވެ.
ފުލުހުން މައުލޫމާތު ދީފައިވާ ގޮތުގައި މާފަންނު ރެސްޓޯރެންޓެއްގައި މާރާމާރީއެއް ހިންގަމުންދާ ކަމުގެ ރިޕޯޓް ފުލުހުންނަށް ލިބިފައިވަނީ އެ ރޭ 23:00 އެހައިކަންހާއިރު އެވެ.
މި ހާދިސާ ހިނގަން މެދުވެރިވީ ރެސްޓޯރެންޓް ތެރޭގައި އިން އަންހެނަކަށް ފިރިހެނަކު ހަމަލާދިނުމާ ގުޅިގެން ކަމަށް މިހާތަނަށް ބެލި ބެލުމުން އެނގިފައިވާ ކަމަށް ފުލުހުން ބުނެ އެވެ.
މި ހަމަނުޖެހުން ހިނގި ވަގުތު އެތަނުގައި ތިބި ބަޔަކު ވަނީ އެކަން ހުއްޓުވަން މަސައްކަތް ކޮށްފަ އެވެ. ނަމަވެސް، މާރާމާރީ ހިންގި މީހާ ވަނީ އެކަން ހުއްޓުވަން އުޅުނު މީހުންނަށް ވެސް ހަމަލާދީފައެވެ.
މީގެ އިތުރުން، މި ހަމަނުޖެހުމުގެ ތެރޭގައި އެ ރެސްޓޯރެންޓްގެ ދޮރަށް ހަމަލާދީ ބޮޑެތި ގެއްލުންތަކެއް ދީފައިވާ ކަމަށް ވެސް ފުލުހުން މައުލޫމާތުދެ އެވެ.
މި މާރާމާރީގައި އެ ރެސްޓޯރެންޓްގައި މަސައްކަތް ކުރާ އަންހެން މުވައްޒަފަކަށް ވެސް ވަނީ އަނިޔާވެފަ އެވެ. ފުލުހުން ބުނި ގޮތުގައި އެ އަންހެން މުވައްޒަފުގެ ބޮލަށް ހަމަލާދިނުމުގެ ސަބަބުން ބޯ ދުޅަވެ، އެކި ވަރުގެ އަނިޔާތައް ވަނީ ލިބިފަ އެވެ.
މި މައްސަލައިގެ ތުހުމަތުގައި ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 19 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށް، މި ހާދިސާ ހިނގަން މެދުވެރިވި ސަބަބާއި މާރާމާރީއާ ގުޅޭ އިތުރު ތަފްސީލު ހޯދުމަށް ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.
