މަޝްހޫރުތަރި ސަންޑްރާ ބުލޮކްގެ ބައިވެރިޔާ ރެންޑަލްއަށް ޖެހުނު ނާރުގެ ބަލި - އޭއެލްއެސް އާ ދެކޮޅަށް ކުރި އުނދަގޫ ހަނގުރާމައިގެ ވާހަކަތައް ހިއްސާކޮށްފި

ސަންޑްރާ ބުލޮކްގެ ބައިވެރިޔާ ބްރަޔަން ރެންޑަލް، ނާރުގެ ބައްޔެއް ކަމަށްވާ އޭއެލްއެސްއާ ދެކޮޅަށް ކުރި އުނދަގޫ ހަނގުރާމައާއި، އޭނާ ވަކިވެދިޔުމުން ކުރެވުނު އިހުސާސްތައް ބުލޮކް ފުރަތަމަ ފަހަރަށް ހިއްސާކޮށްފި އެވެ.

ބްރަޔަން ރެންޑަލްގެ ބަލީގެ ވާހަކަ ދައްކަމުން ބުލޮކް ބުނީ، އެ ބައްޔާ ބެހޭގޮތުން ވާހަކަދެއްކުމުގެ ހުއްދަ އޭނާއަށް އޮތީ ނުދީފައި ކަމަށެވެ. ޖޭސަން ބޭޓްމަން، ވިލް އާނެޓް އަދި ސޯން ހޭސް ހުށަހަޅައިދޭ "ސްމާޓްލެސް" ޕޮޑްކާސްޓްގެ މި ހަފުތާގައި ނެރުނު އެޕިސޯޑެއްގައި ވާހަކަދައްކަމުން ބުލޮކް ބުނީ، އެއީ ރެންޑަލްގެ އެދުމެއް ކަމަށާއި، އޭނާ އެ އެދުމަށް ފުރިހަމައަށް އިހުތިރާމްކުރި ކަމަށެވެ.

ބްރަޔަން ރެންޑަލް މަރުވީ 2023 ވަނަ އަހަރު، އުމުރުން 57 އަހަރުގަ އެވެ.

އޭއެލްއެސް ނުވަތަ "ލޫ ގެރިގްސް ޑިޒީޒް" ގެ ނަމުން މަޝްހޫރުވެފައިވާ "އެމިއޯޓްރޮފިކް ލެޓަރަލް ސްކްލެރޯސިސް" އަކީ ސިކުނޑިއާއި މައިބަދައިގެ ނާރުތަކަށް ޖެހޭ ބައްޔެކެވެ. މި ބަލީގެ ސަބަބުން ހަށިގަނޑުގެ މަތީ ބަޔާއި ތިރީ ބައިގެ މަސްތައް މަސައްކަތްކުރުމަށް ބޭނުންވާ ނާރުތަކަށް އަސަރުކުރެ އެވެ.

މި ބަލި ތަހައްމަލުކުރާ މީހުންގެ މަސްތަކުގެ ކޮންޓްރޯލް ގެއްލި، ކެއުމާއި، ވާހަކަދެއްކުމާއި، ހިނގުމުގެ ގާބިލުކަން ނެތިގޮސް، އެންމެ ފަހުން ނޭވާލުމަށްވެސް ނުކުޅެދެ އެވެ.

ބަލީގެ ވާހަކަ ސިއްރުކުރުމަށް ރެންޑަލް އެދުނު ސަބަބު އެނގޭ ކަމަށް ބުލޮކް ބުންޏެވެ. އަދި ވަކިން ހާއްސަކޮށް ކޮވިޑް-19 ގެ ބަލިމަޑުކަމުގެ ދުވަސްވަރު މި ބަލީގެ ހަގީގަތް އެކަނި އުފުލަން ޖެހުމުން، އެކަމުގެ ސަބަބުން އޭނާ މުޖުތަމައާ އެކަހެރިވި ކަމަށް ބުލޮކް ކިޔައިދިނެވެ.

އޮސްކާ އެވޯޑް ހާސިލުކޮށްފައިވާ ބުލޮކް ހާމަކުރި ގޮތުގައި، ރެންޑަލްގެ ބަލީގެ ހަގީގަތް ދުވަސްތަކެއް ވަންދެން އެނގެނީ ހަމައެކަނި އޭނާގެ ކޮއްކޮ ޖެސީން ބުލޮކް-ޕްރާޑޯއަށް އެކަންޏެވެ. ނަމަވެސް ފަހުން އޭނާގެ ގާތް އެކުވެރިން ކަމަށްވާ ޖެނިފާ އެނިސްޓަންއާއި، ބޭޓްމަންގެ އަންހެނުން އެމަންޑާ އަންކާއަށް އެކަން ހިއްސާކުރި ކަމަށް އޭނާ ބުންޏެވެ.

ބްރަޔަން ރެންޑަލް މަރުވުމުގެ ހަތަރު އަހަރު ކުރިންވެސް އޭނާ ވަކިވެދިޔުމުގެ ހިތާމަ ކުރަން ފަށާފައިވާ ކަމަށް ބުލޮކް ބުންޏެވެ. އަދި އެ ދެމީހުންގެ ގުޅުމުގެ ދެބައިކުޅަ އެއްބައި ދުވަސް ހޭދަވީ ރެންޑަލް ބަލި އެނދުގައި އޮއްވައި ކަމަށްވެސް އޭނާ ފާހަގަކުރި އެވެ.

މޮޑެލްއަކުން ފޮޓޯގްރާފަރަކަށް ބަދަލުވި ރެންޑަލްއާއެކު އޮތް ގުޅުން ބުލޮކް އާންމުކުރީ 2015 ވަނަ އަހަރު އެވެ. މި ދެމީހުން އެކުގައި ބުލޮކްގެ ދަރިފުޅު ލޫއީއާއި ލައިލާގެ އިތުރުން، ރެންޑަލްގެ ކުރީގެ ގުޅުމަށް ލިބިފައިވާ އަންހެން ދަރިފުޅު ސްކައިލާ ސްޓޭޓަން ރެންޑަލް ބަލައިބޮޑުކުރި އެވެ.

"އޭނާގެ ހަށިގަނޑު ވަކިވެދިޔުމުގެ މާ ކުރިން، އަހަރެންގެ ލޯބިވެރިޔާ އަހަރެންނާ ވަކިވެއްޖެ،" ބުލޮކް ބުންޏެވެ. އަދި އޭނާ މަރުވުމުގެ ކުރިން އެ ހިތާމައާ ކުރިމަތިލާނެ ވަގުތެއް ނުލިބުނީ، މެދުކެނޑުމެއް ނެތި އޭނާގެ ކަންކަމުގައި މަސްއޫލުވެ އުޅެން ޖެހުމުން ކަމަށްވެސް ބުލޮކް ބުންޏެވެ.

މި ބަލި ޖެހެން މެދުވެރިވާ ސަބަބާ ބެހޭގޮތުން އެނގެނީ ވަރަށް މަދު މައުލޫމާތެކެވެ. އަދި މި ބައްޔަށް މިހާތަނަށް ފަރުވާއެއް ހޯދިފައެއް ނުވެ އެވެ. އަންހެނުންނަށްވުރެ ފިރިހެނުންގެ މެދުގައި މި ބަލި ޖެހޭ މިންވަރު ކުޑަކޮށް އިތުރެވެ.

އެ ދަތި ދުވަސްވަރު ރެންޑަލްއާއި އާއިލާގެ ކަންކަން ބެލެހެއްޓުމުގައި ކުރެވުނު ތަޖުރިބާ ބުލޮކް ހިއްސާކުރި އެވެ.

ބަލިމީހުން ބެލެހެއްޓުމުގެ ކަންކަން ރޭވުމަކީ އޭނާއަށް ކުރަން އެނގޭ ކަމެއް ކަމަށާއި، އެއީ އޭނާގެ ބައްޕައަށް ދިމާވި ނުރައްކާތެރި ހާދިސާތަކާއި މަންމައަށް ޖެހުނު ކެންސަރު ބަލީގެ ސަބަބުން ދަސްވި ކަމެއް ކަމަށް ބުލޮކް ބުންޏެވެ.

"ބަލިމަޑުކަމަކީ އަހަރެން ބިރުގަންނަ ކަމެއް ނޫން. ކޮންމެ ފަދަ ހާލަތެއްގައިވެސް ބަލިމީހެއްގެ ގާތުގައި ހުންނަން އަހަރެންނަށް ކެރޭ،" ބުލޮކް ބުންޏެވެ. ނަމަވެސް، ރެންޑަލްއަކީ ބައްޕައެއްގެ ގޮތުގައި ދެކެމުން އައި ދެ ކުޑަކުދިންނަށް، ހާއްސަކޮށް އޭނާގެ އަންހެން ދަރިފުޅަށް މި ހާލަތާ ކުރިމަތިލާން ޖެހުމަކީ އުނދަގޫ ކަމެއް ކަމަށް އޭނާ ފާހަގަކުރި އެވެ.

އޭނާގެ ދަރިންނަށް ތައުރީފު ކުރަމުން ބުލޮކް ވަނީ، ރެންޑަލް ބެލެހެއްޓުމުގައި އެހީތެރިވި ހަތަރު ނަރުހުން ކޮށްދިން "އަގުނުކުރެވޭ ފަދަ" މަސައްކަތަށް ޝުކުރު އަދާކޮށްފަ އެވެ.

މި އަހަރުގެ ކުރީކޮޅު "ޕީޕަލް" މެގަޒިންއަށް ދިން އިންޓަވިއުއެއްގައި ބުލޮކް ބުނީ، ރެންޑަލް މަރުވުމަށްފަހު އޭނާ އެންމެ ބޮޑު އިސްކަމެއް ދިނީ ހިތާމަތަކުން އަރައިގަނެ، ދަރިންނަށް ހިތްވަރުދީ، އަލުން މަސައްކަތަށް ނުކުތުމުގެ ކުރިން އާއިލާގެ ހާލަތު ރަނގަޅު ކުރުމަށް ކަމަށެވެ.

މި އަހަރުގެ ހޫނު މޫސުމުގައި ބުލޮކް ބޮޑަށް މަސްއޫލުވެ އުޅުނީ، އަންނަ މަހު ސިނަމާތަކަށް އަންނަ "ޕްރެކްޓިކަލް މެޖިކް 2" އިޝްތިހާރު ކުރުމުގަ އެވެ. މިއީ 1998 ވަނަ އަހަރު ނެރުނު ފިލްމުގެ ސީކުއަލްއެކެވެ. ރޮމޭންޓިކް ފެންޓަސީ މި ފިލްމުގައި ބުލޮކް އަދާކުރަނީ ސެލީ އޯވެންސްގެ ރޯލެވެ.

ސަންޑްރާ ބުލޮކް ބައިވެރިވި "ސްމާޓްލެސް" ގެ މި އެޕިސޯޑް އޮގަސްޓް 24 އިން ފެށިގެން ހުރިހާ ޕޮޑްކާސްޓް ޕްލެޓްފޯމްތަކުން ލިބެން ހުންނާނެ ކަމަށް ރިޕޯޓުތައް ބުނެ އެވެ.