ޖުލައި މަހު ބަލާލަން ރަނގަޅު 5 ފިލްމް

މިނިއަންސް އެންޑް މޮންސްޓަރސް އިން ފެށިގެން ސްޕައިޑަރ-މޭން އާ ހަމައަށް: މި ޖުލައި މަހު ބަލާލަން ރަނގަޅު 5 ފިލްމުގެ ކުރު ޚުލާސާ އެއް ތިރީގައި އެވަނީ އެވެ.

1. މިނިއަންސް އެންޑް މޮންސްޓަރސް

މިނިއަންސް ސީރީޒްގެ ތިންވަނަ ފިލްމު، އަދި "ޑެސްޕިކަބަލް މީ" ފްރެންޗައިޒްގެ ހަތްވަނަ ފިލްމުގައި، ރީނދޫ ކުލައިގެ މި ކުދި މަޚްލޫގުން ފެނިގެންދާނީ އާދަޔާ ހިލާފު ބަދަލަކާއެކުގައެވެ. މިފަހަރު އެ ތަކެތި އުޅެނީ ނުލަފާ މީހުންނާއެކުގައެއް ނޫނެވެ. އޭގެ ބަދަލުގައި އެ ސޮރުމެން އުޅެނީ 1920 ގެ އަހަރުތަކުގެ ހޮލީވުޑްގެ އެކްޓަރުންނާއި ޑައިރެކްޓަރުންނާއެކުގައެވެ. މި ފިލްމު އެ ދުވަސްވަރަށް ބިނާކުރުމުގައި ހަމަޖެހޭ ސަބަބުތަކެއް އެބަހުއްޓެވެ. އެއީ މި ފިލްމުތަކުގައި ފެންނަ ހަރަކާތްތަކުން މަޖާކޮށްދޭ "ސްލެޕްސްޓިކް" ކޮމެޑީ އާއި ބަސް ނުބުނެ ހެއްވާ މަޖާ ކަންކަން ފެންނަ ސައިލެންޓް ކޮމެޑީ ނުވަތަ އަޑުނެތް ފިލްމުތަކުގެ ދުނިޔެއާ ވަރަށް ބޮޑަށް ގުޅޭ ކަމަކަށް ވާތީއެވެ. ފިލްމުގެ ޑައިރެކްޓަރު ޕިއެރޭ ކޮފިން "އެމްޕަޔަރ" މެގަޒިންއަށް ދިން އިންޓަވިއުއެއްގައި ބުނެފައިވަނީ، މިނިއަންސްގެ ހުރިހާ ކަމަކީވެސް ސައިލެންޓް ފިލްމުތަކުގެ ތަރިންގެ ކިބައިން އިންސްޕިރޭޝަން ހޯދައިގެން ތައްޔާރުކޮށްފައިވާ ކަންކަން ކަމަށެވެ. އަދި އެ ތަކެތި ދައްކާ ވާހަކަ ސާފުކޮށް ފަހުމް ނުވި ނަމަވެސް، އެ ބުނާ އެއްޗެއް ބެލުންތެރިންނަށް އޮޅުންފިލުމަކީ މި ފިލްމުގެ އެންމެ ހާއްސަ ސިފަ ކަމަށް އޭނާ ފާހަގަކުރިއެވެ. މި ފިލްމުގައި ފެނިގެންދާ އަނެއް ބަދަލަކީ، މިނިއަންސް އަމިއްލައަށް ބިރުވެރި "މޮންސްޓަރ" ފިލްމެއް އުފައްދަން ނިންމުމެވެ. އަދި އެކަމަށްޓަކައި އަސްލު ދިރިހުރި މޮންސްޓަރެއް ހޯދުމަށް އެސޮރުމެން އެކަހެރި ރަށަކަށް ދަތުރުކުރެއެވެ.

މި ފިލްމު ބައިނަލްއަގުވާމީ ގޮތުން ސިނަމާތަކަށް ނެރުމަށް ހަމަޖެހިފައިވަނީ ޖުލައި 1 އިން 3 އަށެވެ.

2. އެނޯލާ ހޯމްސް 3

ޝާލޮކް ހޯމްސްގެ ކޮއްކޮ އެނޯލާ ހޯމްސް (މިލީ ބޮބީ ބްރައުން) އަނެއްކާވެސް ހަލުވި އަދި ފޯރިގަދަ އެޑްވެންޗަރަކަށް މިވަނީ ތައްޔާރުވެފައެވެ. ޖެކް ތޯން ސްކްރީންޕްލޭ ލިޔެ، "އެޑޮލެސެންސް" ގެ ޑައިރެކްޓަރު ފިލިޕް ބަރަންޓީނީ ޑައިރެކްޓްކުރާ މި ފިލްމުގައި އެނޯލާ މިހާރު ފެންނާނީ ފުރާވަރުގެ ކުއްޖެއްގެ ގޮތުގައެއް ނޫނެވެ. އޭނާއަކީ މިހާރު އޭނާގެ ލޯބިވެރިޔާ ލޯޑް ޓިއުކްސްބަރީ (ލޫއީ ޕާޓްރިޖް) އާ ކައިވެނިކުރަން ތައްޔާރުވަމުންދާ ޒުވާން އަންހެނެކެވެ. ނަމަވެސް މި ދަނޑިވަޅުގައި ކުރިމަތިވާ އެންމެ ބޮޑު ހުރަހަކީ، މަޝްހޫރު ތަހުގީގީ މާހިރު ޝާލޮކް ހޯމްސް (ހެންރީ ކެވިލް) ރަހީނުކުރުމެވެ. އެހެންކަމުން، ޝާލޮކްގެ އެހީތެރިޔާ ވޮޓްސަން (ހިމޭޝް ޕަޓޭލް) އާއި އެނޯލާގެ މަންމަ (ހެލީނާ ބޮންހަމް ކާޓަރ) އާ ގުޅިގެން، ބޭބެ ސަލާމަތްކުރުމުގެ މަސައްކަތް އެނޯލާ ފަށައެވެ. ލިޔުންތެރިޔާ ތޯން "ރޭޑިއޯ ޓައިމްސް" އަށް ބުނިގޮތުގައި، މިލީ ބޮބީ ބްރައުންއާ ފުރަތަމަ ބައްދަލުވިއިރު ހުރި ސިފަ އާ މިހާރު އޭނާގެ ހުރި ސިފަތައް މުޅިން ތަފާތެވެ. އެހެންކަމުން އާ ސްކްރީންޕްލޭ ބިނާކޮށްފައިވަނީ ބޮޑުވެފައިވާ އެނޯލާ ހޯމްސްއެއްގެ ދިރިއުޅުން ދައްކުވައިދޭ ގޮތަށެވެ. މީގެ އިތުރުން، މި ފިލްމުތަކަކީ ވިކްޓޯރިއަން ޒަމާނުގެ ތާރީޚީ ފިލާވަޅުތަކެއް ކަމަށްވެސް ތޯން ފާހަގަކުރިއެވެ. އެގޮތުން ފުރަތަމަ ފިލްމުގައި ވޯޓުލުމުގެ ހައްގާ ބެހޭގޮތުން ދެއްކިއިރު، ދެވަނަ ފިލްމުގައި ދެއްކީ މަސައްކަތްތެރިންގެ ޔޫނިއަންތައް އުފެދުނު ގޮތެވެ. އަދި މި ތިންވަނަ ފިލްމުގައި ބަލާލާނީ އިސްތިއުމާރީ ތާރީޚަށެވެ.

މި ފިލްމު ޖުލައި 1 ވަނަ ދުވަހު ނެޓްފްލިކްސް މެދުވެރިކޮށް ރިލީޒްކުރާނެއެވެ.

3. މޯނާ

ޑިޒްނީން މީގެ ކުރިންވެސް އެ ކުންފުނީގެ މަޝްހޫރު ކާޓޫންތައް އަސްލު އިންސާނުން ބޭނުންކޮށްގެން "ލައިވް-އެކްޝަން" ފިލްމުތަކުގެ ގޮތުގައި އުފައްދާފައިވެއެވެ. ނަމަވެސް "މޯނާ" މި ފިލްމު ތަފާތެވެ. މީގެ އަސްލު ކާޓޫން ފިލްމު ނެރުނުތާ އަދި މިވީ އެންމެ 10 އަހަރެވެ. އަދި މީގެ ދެވަނަ ބައި "މޯނާ 2" ނެރުނީ މީގެ ދެ އަހަރު ކުރިން 2024 ގައެވެ. އަނެއްކޮޅުން، ކާޓޫނުގައި ޑްވޭން ޖޯންސަން އަޑު އަޅައިދިން ކެރެކްޓަރު، މި ލައިވް-އެކްޝަން ފިލްމުގައި ކުޅެނީވެސް ހުދު އޭނާއެވެ. އަދި ފިލްމުގައި ފެންނަ އެކި ކަހަލަ މޮންސްޓަރުތަކަކީ ބޮޑެތި ބުދުތަކެއްގެ ބަދަލުގައި ސީޖީއައި ބޭނުންކޮށްގެން އުފައްދާފައިވާ ތަކެއްޗެވެ. އެހެންކަމުން އުފެދޭ ސުވާލަކީ، މި ފިލްމަކީ ކާޓޫނާ މާ ބޮޑަށް އެއްގޮތްވެ، ބަލާލަން ވަގުތު ބޭކާރުވާނެ ފިލްމަކަށް ނުވާނެބާވައެވެ؟ ނަމަވެސް ޑައިރެކްޓަރު ތޯމަސް ކައިލް ބުނަނީ އެހެންނެއް ނޫނެވެ. "ޕޮލިގަން" އަށް ދިން އިންޓަވިއުއެއްގައި އޭނާ ބުނީ، އޭނާއަކީ ތިއޭޓަރުގެ ދާއިރާއިން އައި މީހެއް ކަމަށާއި، ބާޒާރުގައި ހުރި އެއްޗެއް އާކޮށްގެން ނެރުމަކީ އާންމު ކަމެއް ކަމަށެވެ. އަދި ކުރިން އޮތް ވާހަކައެއް އާ ފެންވަރަކަށް ތަރައްގީކުރުމަކީ ހާއްސަ ކަމެއް ކަމަށާއި، މި ފިލްމުގައި ގިނަ އާ ޑައިލޮގްތަކާއި މަޖާ ކަންތައްތަކެއް ހިމެނޭނެ ކަމަށް އޭނާ ވައުދުވިއެވެ.

މި ފިލްމު ބައިނަލްއަގުވާމީ ގޮތުން ރިލީޒްކުރާނީ ޖުލައި 8 އިން 10 އަށެވެ.

4. ރީޑިންގ ލޮލީޓާ އިން ތެހެރާން

ލިޔުންތެރިޔާ އަދި އެކަޑެމިކް އާޒާރު ނަފީސީ 2003 ވަނަ އަހަރު ނެރުނު މަޝްހޫރު ހަނދާނީ ފޮތުގެ މައްޗަށް ބިނާކޮށް އުފައްދާފައިވާ މި ފިލްމުގެ ތަރިއަކީ ގުލްޝިފްތޭ ފަރަހާނީއެވެ. މި ޑްރާމާގައި ދައްކުވައިދެނީ 1980 އާއި 90 ގެ އަހަރުތަކުގައި، އީރާނުގެ އިންގިލާބަށްފަހު އައި ސަރުކާރުން ގައުމުގެ ކަންކަން ހަރުކަށި ކުރަމުންދިޔަ ދުވަސްވަރު ނަފީސީގެ ދިރިއުޅުން ހުރި ގޮތެވެ. ފުރަތަމަ އޭނާ ތެހެރާން ޔުނިވަރސިޓީގައި އަދަބިއްޔާތު ކިޔަވައިދިން ނަމަވެސް، ފަހުން އޭނާއަށް މަޖުބޫރުވަނީ ސިއްރިއްޔާތުގައި އޭނާގެ ގޭގައި ފޮތް ކިޔާ ކްލަބެއް ހިންގުމަށެވެ. ބަންދުކޮށްފައިވާ ދޮރުތަކެއްގެ ފަހަތުގައި ތިބެ، އަންހެނުންގެ ކުޑަ ގްރޫޕަކުން "ލޮލީޓާ" ގެ އިތުރުން "ދަ ގްރޭޓް ގެޓްސްބީ" އާއި "ޕްރައިޑް އެންޑް ޕްރެޖުޑިސް" ފަދަ ފޮތްތައް ދިރާސާކުރެއެވެ. އަދި އެ ފޮތްތަކުގައިވާ ވާހަކަތަކާއި، ދުވަހުން ދުވަހަށް ނުރައްކާވަމުންދާ އެމީހުންގެ އަމިއްލަ ދިރިއުޅުމާ ހުރި ގުޅުންތަކާ ބެހޭގޮތުން މަޝްވަރާކުރެއެވެ. "ސްކްރީން އިންޓަނޭޝަނަލް" ގެ ވެންޑީ އައިޑް ބުނާގޮތުގައި، މިއީ އަނިޔާވެރިކަމާ ކުރިމަތިލާއިރު ހިތްވަރާއި އުނގެނުމަށް އޮންނަ ޝައުގުވެރިކަން ދައްކުވައިދޭ އަސަރުގަދަ ވާހަކައެކެވެ. އަދި ފަރަހާނީގެ އެކްޓިން ވަރަށް ވަރުގަދަ ކަމަށާއި، އޭނާ ހަނުހުންނަ ވަގުތުތަކުގައިވެސް އޭނާގެ މޫނުމަތިން އެތައް ވާހަކައެއް ބުނެދޭ ކަމަށް އައިޑް ފާހަގަކުރިއެވެ.

މި ފިލްމު އެމެރިކާގައި ރިލީޒްކުރުމަށް ހަމަޖެހިފައިވަނީ ޖުލައި 10 ވަނަ ދުވަހުއެވެ.

5. ސްޕައިޑަރ-މޭން: ބްރޭންޑް ނިއު ޑޭ

މިއީ ޓޮމް ހޮލަންޑް ސްޕައިޑަރ-މޭންގެ ރަތާއި ނޫކުލައިގެ ހެދުމުގައި ފެންނަ ހަތަރުވަނަ ފިލްމެވެ. ނަމަވެސް ފިލްމުގެ ނަމުން ދޭހަވާ ފަދައިން، މިއީ މުޅިން އާ ފެށުމެކެވެ. މިއީ އަލަށް ފަށާ ތިން ފިލްމުގެ ސީރީޒް ނުވަތަ ޓްރިލޮޖީގެ ފުރަތަމަ ފިލްމެވެ. މި ފިލްމުގެ ޑައިރެކްޓަރަކީ ކުރިން "ޝޭންގް-ޗީ" ޑައިރެކްޓްކުރި ޑެސްޓިން ޑެނިއަލް ކްރެޓަންއެވެ. އޭނާ މި މަގާމާ ހަވާލުވީ ކުރީގެ ޑައިރެކްޓަރު ޖޯން ވަޓްސްގެ ބަދަލުގައެވެ. މި ފިލްމުގައި ޕީޓަރ ޕާކަރަށް ކުރިމަތިވެފައިވަނީ މުޅިން އާ ހާލަތެކެވެ. އެންމެ ފަހުން ނެރުނު ފިލްމުގައި ޑޮކްޓަރ ސްޓްރޭންޖް ހެދި ސިހުރެއްގެ ސަބަބުން، ޕީޓަރ ޕާކަރަކީ ދުނިޔޭގައި އުޅޭ މީހެއްކަން އޭނާގެ އެއްވެސް ރަހުމަތްތެރިއަކަށް މިހާރު ހަނދާނެއް ނެތެވެ. "ސްކްރީންރަންޓް" އަށް ދިން އިންޓަވިއުއެއްގައި ކްރެޓަން ބުނީ، މިއީ އުމުރުން 20 ގެ އަހަރުތަކުގެ މެދުތެރޭގައި ދިރިއުޅުމުގެ ހިތްދަތި ހަގީގަތްތަކާ ކުރިމަތިލާންޖެހޭ ދުވަސްވަރު ކަމަށެވެ. ޕީޓަރ މިހާރު ކުރިމަތިލަމުންދަނީ އަމިއްލަ ދިރިއުޅުމުގައާއި ވަޒީފާގެ މައިދާނުގައި ދިމާވާ ބޮޑެތި މީހުންގެ މައްސަލަތަކާ ކަމަށާއި، ފުރަތަމަ ފަހަރަށް އޭނާ މިކަންކަމާ ކުރިމަތިލާން މިޖެހެނީ މުޅިން އެކަނި ކަމަށް ޑައިރެކްޓަރު ބުންޏެވެ. މި މައްސަލަތަކުގެ އިތުރުން، އޭނާއަށް ވަނީ ހަލްކް (މާކް ރަފަލޯ) އާއި، ދަ ޕަނިޝަރ (ޖޯން ބާންތަލް) އަދި ނިންޖާ ގާތިލުންގެ ގްރޫޕަކާވެސް ކުރިމަތިލާން ޖެހިފައެވެ.

މި ފިލްމު ބައިނަލްއަގުވާމީ ގޮތުން ރިލީޒްކުރާނީ ޖުލައި 29 އިން 31 އަށެވެ.