ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާ ބެހޭ ގާނޫނަށް ގިނަ އިސްލާހުތަކެއް ގެންނަނީ
9 އޯގަސްޓު 2026 | އާދީއްތަ 11:16ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމުގެ ގާނޫނު 2010 ވަނަ އަހަރު ވުޖޫދުވި ފަހުން ފުރަތަމަ ފަހަރަށް އިސްލާހުކުރުމުގެ މަސައްކަތް ސަރުކާރުން ފަށައިފި. މި އިސްލާހުތަކާއެކު ތައުލީމީ، ސިއްހީ އަދި މާލީ އެހީތެރިކަން ފޯރުކޮށްދިނުމުގައި ދައުލަތުގެ އިދާރާތަކުން އަދާކުރަންޖެހޭ ޒިންމާތައް މިހާރަށްވުރެ ބޮޑަށް ސާފުވެ، ހިދުމަތްތަކުގެ ދުވެލި އަވަސްވެގެންދާނެ ކަމަށް ހެލްތު މިނިސްޓްރީން ބުނޭ
ހެލަތު މިނިސްޓްރީގެ ސްޓޭޓް މިނިސްޓަރު އަހުމަދު އާތިފް | ޕީއެސްއެމް
ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާ ބެހޭ ގާނޫނަށް ގިނަ އިސްލާހުތަކެއް ގެނައުމުގެ މަސައްކަތް ހާއްސަ އިސްކަމެއް ދީގެން ކުރަމުންދާ ކަމަށް ހެލްތު މިނިސްޓްރީގެ ސްޓޭޓް މިނިސްޓަރު އަހުމަދު އާތިފް ވިދާޅުވެއްޖެ އެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން އާތިފް ވިދާޅުވީ 2010 ވަނަ އަހަރު ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާ ބެހޭ ގާނޫނު ވުޖޫދުވެގެން އައިފަހުން އަދި މިހާތަނަށް އެ ގާނޫނަށް އިސްލާހެއް ގެނެވިފައި ނުވާ ކަމަށެވެ. މިހަރު ކުރިއަށް ދަނީ ކުރީގެ ގާނޫނު މުރާޖާ ކުރުމުގެ މަސައްކަތް ކަމަށް އާތިފް ވިދާޅުވި އެވެ.
މިހާރު ހުރީ 2007، 2008 ގައި ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ބިލު ފަރުމާ ކުރެވިގެން އައިއިރު ހުރި ގޮންޖެންތަކެއް ނޫން ކަމަށް އާތިފް ވިދާޅުވި އެވެ. އެގޮތުން އޭރުގައި ތައްޔާރު ކުރެވުނު ބިލު އޮތްގޮތުން ހިދުމަތް ދިނުމުގައި ދަތިތަކެއް ހުރި ކަމަށާއި ބިލުގައި ބައެއް ކަންކަން ލިޔެފައި ވަނީ ވަރަށް ތިލަކޮށް ކަމަށް އާތިފް ވިދާޅުވި އެވެ.
ތައުލީމީ، ސިއްހީ ހައްގުތައް ފަދަ ކަންކަން ލިޔެފައިހުރި ވަރަށް ތިލަކޮށް، އަލަށް އެކުލަވާލާ ޤާނޫނުގައި ވަކިވަކި ދާއިރާތަކާއި އިދާރާތަކުގެ ޒިންމާތައް ވަރަށް ސާފުކޮށް ލިޔެވޭނެ. އެފަދަ މީހުން ބާރުވެރިކުރުމުގައި ގެންގުޅޭނެ މޮޑެލްތަކަކީ ކޮބައިތޯ އާއި ވަޒީފާ ނުވަތަ މަލީ ފުދުންތެރިކަން އިތުރުކުރުމާ ގުޅޭ ކަންކަން ކަޑައެޅޭނެއަހުމަދު އާތިފް
މީގެއިތުރުން މިހާރު އިސްލާހު ކުރެވެމުންދާ ގާނޫނުގައި ސިއްހީ އަދި އިޖުތިމާއީ ދާއިރާތަކުން އަދާކުރަން ޖެހޭ ޒިންމާތައް ވަރަށް ތަފްސީލްކޮށް ހުންނާނެ ކަމަށް އާތިފް ވިދާޅުވި އެވެ. އަދި ވަޒީފާއަށް ނުދެވޭ ކަމުގައިވާނަމަ މާލީ ގޮތުން އެހީތެރިކަމެއް ދިނުމާއި ކުރީގެ ގާނޫނުގައި އިސްކަން ދެވިފައި ނެތް ކަންކަން ހުންނާނެ ކަމަށް ވެސް އޭނާ ވިދާޅުވި އެވެ.
އާތިފް އިތުރަށް ވިދާޅުވީ، މި ގާނޫނުގެ ސަބަބުން ނުކުޅެދުންތެރިކަން ހުންނަ ފަރާތްތަކަށް ދެމުން ގެންދާ ހިދުމަތްތަކުގެ ދުވެލި ބާާރުވެގެން ދާނެ ކަމަށެވެ.
ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ބިލަކީ 2010 ވަނަ އަހަރު ޖޫން 22 ގައި އޭރުގެ ރައީސް މުހައްމަދު ނަޝީދު ތަސްދީގު ކުރެއްވި ގާނޫނެކެވެ.
މި ޤާނޫނަކީ، ނުކުޅެދުންތެރިކަން ހުންނަ މީހުންނާ ބެހޭގޮތުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 17 ވަނަ މާއްދާއާއި 35 ވަނަ މާއްދާގެ (ށ)ގައިވާ ގޮތުގެމަތިން އެންމެހައި އަސާސީ ހައްޤުތަކާއި މިނިވަންކަން އެއްވެސް ތަފާތުކުރުމެއްނެތި ލިއްބައިދިނުމާއި އެ ހައްގުތަކާއި މިނިވަންކަން ރައްކާތެރިކޮށް ޙިމާޔަތް ކުރުމާއި ސަރުކާރުގެ ސިޔާސަތުތައް ކަނޑައެޅުމާއި، އެހެން މީހުންނާ ހަމަހަމަ ފުރުސަތުތައް ހޯދައިދިނުމާއި އެފަދަ މީހުންނަށް ލިބިދޭންޖެހޭ ހާއްސަ ރައްކާތެރިކަމާއި މާލީ އެހީތެރިކަން ފޯރުކޮށްދިނުމުގައި ގެންގުޅެންޖެހޭ އުސޫލުތަކާއި ހަމަތައް ކަނޑައަޅައި ބަޔާންކުރުމުގެ ޤާނޫނެކެވެ.
