އޮޕަރޭޝަން ކާމިޔާބު، އެކަކަމު ބަލިމީހާ ވީ މަރު

ރައްޔިތުންގެ މަޖިލީހުގެ ހުސްވެފައިވާ ހިތަދޫ އުތުރު ދާއިރާގެ ބައި އިލެކްޝަންގެ ދާއިމީ ނަތީޖާ ވެސް އިލެކްޝަންސް ކޮމިޝަން (އީސީ) އިން އެ ވަނީ އިއުލާނު ކޮށްފަ އެވެ. އެ އިންތިޚާބު ކާމިޔާބު ކުރީ އެމްޑީޕީގެ ކެންޑިޑޭޓް އަބްދުﷲ ސޯދިގު (ސޯބެ) އެވެ. ނަމަވެސް މިކަން ގަބޫލުނުކުރެވިގެން، ހަޖަމު ނުކުރެވިގެން، އިންތިޚާބުން ބަލިވި ސަރުކާރު ހިންގާ ޕީއެންސީ އިން އުޅޭ މަންޒަރު ފެންނަ އިރު ހޭންވީ ކަމެއް ނުވަތަ ކަންބޮޑުވާންވީ ކަމެއް ނޭނގެ އެވެ.

މިހާ ސާފު ކޮށް އިންތިޚާބަކުން ބަލީވީމާ ވެސް، އިންތިޚާބުން މޮޅުވީ ކަމަށް ބުނެ އެ ދައްކާ ވާހަކައިން މީހަކު ހައިރާންވެ އަންތަރީސް ވެދާނެ އެވެ. ޚާއްސަކޮށް މިނިސްޓަރ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސް، އަބްދުﷲ ރާފިއު ގެ ވާހަކަތައް އަޑު އަހާލުމުން ހަމަ ހަގީގަތުގައި ވެސް މި ސަރުކާރަކީ "ޑެލޫލޫ" ސަރުކާރެއްކަން ހާމަ ވެ އެވެ. 

އިންތިޚާބުގެ ވަގުތީ ނަތީޖާއާއެކު، އިންތިޚާބުން ބަލިވިކަން ޔަގީންވި ހިސާބުން ވެސް މިނިސްޓަރު ރާފިއު ވަނީ ކެމްޕެއިން މެނޭޖަރުގެ ހައިސިއްޔަތުން ކުރެވުނު މަސައްކަތްތަކާ މެދު ހިތްހަމަޖެހިވަޑައިގަންނަވާ ކަމަށް ވިދާޅުވެފަ އެވެ. އަދި ލިބުނީ ބޮޑު ކާމިޔާބީއެއް ކަމަށް ވިދާޅުވެފަ އެވެ. އޭގެ ފަހުން ދާއިމީ ނަތީޖާ އިއުލާނު ކޮށް، ހިތަދޫ އުތުރު ދާއިރާގެ ގޮނޑީގައި ދެން އިންނަވާނީ ސޯބެ ކަމަށް ކަނޑައަޅައި އެއަށް ބަދަލެއް ނާންނާނެ ކަމަށް ނިމުނު ފަހުން އަންގާރަ ދުވަހުގެ ރޭ ބޭއްވި ޖަލްސާގައި ވެސް މިނިސްޓަރު އެ ވިދާޅުވީ ހަމަ އެހެންނެވެ. އިންތިޚާބު ކާމިޔާބު ނުވި ނަމަވެސް ކާމިޔާބު ލިބުނީ ޕީއެންސީ އަށް ކަމަށް މިނިސްޓަރު އެ ވިދާޅުވީ ނުހަނު އުފަލާއެކު އެވެ. ނުހަނު ޔަގީން ކަމާއެކު އެވެ. މިއީ ޑޮކްޓަރަކު އޮޕަރޭޝަނެއް ކުރުމަށްފަހު އޮޕަރޭޝަން ވީ ކާމިޔާބޭ، ނަމަވެސް ބަލިމީހާ ވީ މަރޭ ބުނުން ކަހަލަ ކަމެކެވެ. 

ޑިމޮކްރެސީއެއްގައި ބަލިވުމުން އެކަން ގަބޫލުކޮށް، ރައްޔިތުންގެ ނިންމުމަށް އިޙްތިރާމް ކުރުމަކީ ސިޔާސީ ގޮތުން ދައްކަންޖެހޭ ރިވެތި ނަމޫނާ އެވެ. ނަމަވެސް، ނާކާމިޔާބީ ފޮރުވަން ބަސްމަގު އަނބުރާލައި، ބަލިވީމާ ވެސް މޮޅުވީއޭ ބުނުމަކީ ރައްޔިތުންނަށް ކުރާ މަލާމާތެކެވެ. ބަލިވީ ކޮން ސަބަބަކާ ހުރެތޯ ދެނެގަނެ، ކަންކަން އިސްލާހު ކުރުމުގެ ބަދަލުގައި، މިކަލަ ސަޅިބައިސާ ކަނޑަން އުޅެގެން މިފަހަރު އެ ލިބުނީ ރައްޔިތުންގެ ފަރާތުން އިތުރު ނުރުހުމާ ރުޅިވެރި ކަމެވެ. 

މިނިސްޓަރު ރާފިއުގެ ސިޔާސީ ބަސްމަގަށްވުރެ ހިތާމަވެރި، އަދި އެއަށްވުރެ ލަދުވެތި ކަމަކީ، ގައުމުގެ ކުޅިވަރުގެ އެންމެ މަތީ ވެރިޔާގެ ހައިސިއްޔަތުން ގައުމީ ފުޓްބޯޅަ ޓީމުގެ އަދާހަމަ މަޢުލޫމާތު އެނގިވަޑައިނުގަތުމެވެ. ދިވެހިންގެ ވިންދާ، ގައުމީ ރޫހާ ގުޅިފައިވާ ފުޓްބޯޅަ ޓީމުގެ ހާލަތާއި، ޓީމަށް ދިމާވެފައިވާ އެއްވެސް ކަމެއް އެނގިވަޑައިނުގަންނަވާއިރު މިފަހުން ގައުމީ ޓީމު ކުޅުނު ތިން މެޗުން ވެސް ކުރިމަތިލާން ޖެހުނު ނާކާމިޔާބީ އެނގިވަޑައިނުގަންނަވާއިރު މިއީ ކީއްކުރާ މިނިސްޓަރެއްތޯ ހަގީގަތުގައި ވެސް ސުވާލު އުފެދެ އެވެ. 

ދުނިޔޭގެ އެހެން ގައުމުތަކުގައި ކުޅިވަރު ވަޒީރުންނަކީ ގައުމީ ޓީމުތަކުގެ ކޮންމެ މެޗެއްގެ ނަތީޖާއާއި، ކުޅުންތެރިންގެ ހާލަތާއި، އެސޯސިއޭޝަންތަކުގެ ހިންގުން ދުވަހުން ދުވަހަށް މޮނިޓަރ ކުރާ ބޭފުޅުންނެވެ. ނަމަވެސް، ރާއްޖޭގެ ކުޅިވަރު ވަޒީރު މި އުޅުއްވަނީ އަސްލު މަސްއޫލިއްޔަތަށްވުރެ ބޮޑަށް، ސިޔާސީ މަގާމު ދެމެހެއްޓުމާއި ސަރުކާރުގެ ޕްރޮޕެގެންޑާ ފެތުރުމުގަ އެވެ. ކެމްޕެއިން މެނޭޖްކުރުމުގަ އެވެ. އިންތިޚާބުން ބަލީމާ ވެސް މޮޅުވީ ކަމަށް ދެއްކުމަށް މަސައްކަތް ކުރުމުގަ އެވެ. 

ހަގީގަތުގައި ވެސް މިއަދު މިނިސްޓަރު ރާފިއުގެ މަގާމާ، މަސްއޫލިއްޔަތު އޮޅިއްޖެ އެވެ. މިވަރުވީމާ ދެން މިނިސްޓްރީގެ ނަން ޔޫތު އެމްޕަވަރމަންޓް، ސްޕޯޓްސް ފިޓްނަސް އެންޑް ކެމްޕެއިން މެނޭޖިންގ އަށް ބަދަލު ކުރަން ވެސް ރަނގަޅެވެ. އެހެން ނޫނަސް، މިއީ މިނިސްޓަރުންނާ، މިނިސްޓްރީގެ ނަންތަކާ، މިނިސްޓްރީތަކުގެ މެންޑޭޓު ބަދަލުކޮށް، އެކްސްޕެރިމެންޓު ކުރުމުގައި މޮޅު ސަރުކާރެކެވެ. އެހެންވީމާ މި ސަރުކާރުން އެ މިނިސްޓްރީގެ ނަން ބަދަލު ކުރިޔަސް ހައިރާން ވާނެ މީހަކު އުޅޭނެ ހެނެއް ހިޔެއް ނުވެ އެވެ.

މިނިސްޓަރަށް ފަހުމުވެވަޑައިނުގެންނެވިއަސް މިއަދު ރައްޔިތުން ބޭނުންވަނީ ބަލިވީމާ މޮޅުވެއްޖެ ކަމަށް ބުނާ ކެމްޕެއިން މެނޭޖަރެއް ނޫނެވެ. ރައްޔިތުން ބޭނުންވަނީ ގައުމީ ޓީމުތަކާއި ޒުވާނުންގެ ހާލަތު ދަންނަ، މަސްއޫލިއްޔަތު އަދާކުރާނެ ވަޒީރެކެވެ.