ޕްރިމިއާ ލީގު: މޮރާޓާގެ ހެޓްރިކާއެކު ޗެލްސީ މޮޅުވެއްޖެ

ޕްރިމިއަރ ލީގުގައި އާދިއްތަ ދުވަހުގެރޭ ސްޓޯކް ސިޓީއާ ބައްދަލު ކުރި މެޗު ޗެލްސީން ކާމިޔާބު ކޮށްފިއެވެ.

ސްޓޯކް ސިޓީގެ މައްޗަށް ޗެލްސީން ކުރި ހޯދާފައި ވަނީ 0-4 ގެ ނަތީޖާއަކުންނެވެ.

ސްޓޯކްގެ އަމިއްލަ ދަނޑުގައި ކުޅުނު މި މެޗުގައި ޗެލްސީގެ ފަރާތުން ރަނގަޅު ކުޅުމެއް ފެނިގެންދިޔައިރު، މެޗުގެ ވަރަށް ކުރީކޮޅު ޗެލްސީން ވަނީ ލަނޑެއް ޖަހާ ލީޑު ނަގާފައެވެ. އަޒްޕެލިކުއެޓާގެ އެހީތެރިކަމާއި އެކު މި ލަނޑު މެޗުގެ ދެވަނަ މިނެޓްގައި ކާމިޔާބު ކޮށްދިނީ އަލްވަރޯ މޮރާޓާއެވެ.

ޗެލްސީން އެޓީމުގެ ދެވަނަ ލަނޑު ކާމިޔާބުކޮށް ލީޑު ފުޅާ ކުރީ މެޗުގެ 30 ވަނަ މިނެޓްގައި ޕެޑްރޯ ކާމިޔާބު ކޮށްދިން ލަނޑުންނެވެ.

ދެ ލަނޑުގެ ލީޑެއްގައި އޮވެ މެޗުގެ ފުރަތަމަ ހާފު ޗެލްސީން ނިންމާލިއިރު، އެޓީމުން މެޗުގައި ޖެހި ތިންވަނަ ލަނޑު މެޗުގެ 77 ވަނަ މިނެޓްގައި ކާމިޔާބުކޮށް ލީޑު އިތުރަށް ފުޅާކޮށްދިނީ ފުރަތަމަ ގޯލު ވެސް ކާމިޔާބުކޮށްދިން އަލްވާރޯ މޮރާޓާއެވެ.

އޭގެ ފަސްމިނެޓު ފަހުން މެޗުގެ 82 ވަނަ މިނެޓްގައި މޮރާޓާ ވަނީ ޗެލްސީގެ ހަތަރުވަނަ ގޯލު ކާމިޔާބުކޮށްދީ އޭނާގެ ހެޓްރިކް މި މެޗުގައި ފުރިހަމަ ކޮށްފައެވެ. މިއީ ޗެލްސީއަށް ބަދަލު ވިފަހުން މޮރާޓާ ހެދި ފުރަތަމަ ހެޓްރިކެވެ. އަދި އޭނާ ޗެލްސީއަށް ކާމިޔާބު ކޮށްދިން 6 ވަނަ ލަނޑެވެ.

މި މޮޅާއެކު ޗެލްސީ އޮތީ 13 ޕޮއިންޓާއެކު ލީގުގެ ތިންވަނައިގައެވެ. އެއްވަނައިގައި އޮތް މެންޗެސްޓަރ ސިޓީއަށް އަދި ދެވަނައިގައި އޮތް މެންޗެސްޓަރ ޔުނައިޓެޑަށް ވެސް 16 ޕޮއިންޓް ލިބިފައިވާއިރު ލީގުގެ އެއްވަނަ ސިޓީއަށް ލިބެނީ ގޯލުގެ ތަފާތުންނެވެ. އެޓީމު ދެން ބައްދަލުކުރާނީ މެންޗެސްޓަރ ސިޓީއާއެވެ.