ދިވެހި ޕްރިމިއާ ލީގު: މާޅޮސްގެ މައްޗަށް މާޒިޔާ ކުރިހޯދައިފި

އުރީދޫ ދިވެހި ޕްރިމިއާ ލީގުގައި މާޅޮސްގެ މައްޗަށް މާޒިޔާ ސްޕޯޓްސް އެންޑް ރެކްރިއޭޝަން ކުރިހޯދައިފި އެވެ.

ހޮނިހިރު ދުވަހު ހަވީރު ކުޅުނު މެޗު މާޅޮސްއާ ވާދަކޮށް މާޒިޔާ މެޗު ކާމިޔާބުކުރީ 0-3 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން މޮޅަށް ކުޅެފައި ވަނީ މާޒިޔާ އެވެ. އެގޮތުން އެޓީމުން ވަނީ މާޅޮސްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތަކެއް ހޯދާފައެވެ.

މާޒިޔާ އިން މެޗުގެ ލީޑު ނެގީ 33 ވަނަ މިނެޓުގައެވެ. މި ލަނޑަކީ މާޅޮސްގެ އަބްދުﷲ އިބްރާހިމް އަތުން ބައިކޮޅަށް ވަތް ލަނޑެކެވެ. މި ލަނޑަށް ފަހު ވެސް މާޒިޔާ އިން ވަނީ މާޅޮސްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން މާޅޮސްގެ މައްޗަށް މާޒިޔާ ކުރީގައި އޮވެގެންނެވެ.

ދެވަނަ ހާފް ފެށިގެން ވެސް ރަނގަޅަށް ކުޅެމުންދިޔައީ މާޒިޔާ އެވެ. އެގޮތުން 53 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބޮށްދިނީ ބިދޭސީ ފޯވާޑް ކެރިޗް އަންދްރެޖް އެވެ. މާޒިޔާ އިން މެޗުގައި ޖެހި ތިންވަނަ ލަނޑު އިތުރު ވަގުތުގައި އެޓީމަށް ލިބުނު ހިލޭ ޖެހުމަކުން ކާމިޔާބުކޮށްދިނީ މުހައްމަދު އުމެއިރު އެވެ.

މި ނަތީޖާއާއެކު މާޒިޔާ އޮތީ ކުޅުނު ހަތް މެޗުން ލިބުނު 16 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. ލީގުގެ އެއްވަނައިގައި އޮތީ 18 ޕޮއިންޓާއެކު ނިއުރޭޑިއަންޓް ސްޕޯޓްސް ކްލަބެވެ.