އޮޔާދިޔަ ދެ ދަރިން ސަލާމަތް ކުރަން އުޅުނު ބައްޕައަކު ނިޔާވެއްޖެ

ވ. ފުލިދޫ ގައި މިއަދު މޫދަށް އެރި އުޅެނިކޮށް އޮޔާދިޔަ ދެ ދަރިން ސަލާމަތް ކުރަން އުޅުނު ބައްޕައަކު، ހާލު ދެރަވެގެން ފަރުވާ ދެމުން ދަނިކޮށް ނިޔާވެއްޖެ އެވެ.

މި ހާދިސާގައި ނިޔާވެފައި ވަނީ ސ. ހިތަދޫ، ދުންނިކަގެ (ހ. ގިނިރާހިގެ)، އުމުރުން 63 އަހަރުގެ ޙުސައިން ޙަބީބު އެވެ. 

ފުލުހުން ބުނި ގޮތުގައި މި ހާދިސާގެ ރިޕޯޓް ލިބިފައި ވަނީ ހުކުރު ދުވަހު ހަވީރު 3:10 ހާއިރު އެވެ. އޮޔާދިޔަ ދެ ކުދިން ސަލާމަތް ކުރުމަށް ކުރި މަސައްކަތުގެ ތެރޭގައި އެ މީހާގެ ހާލު ދެރަވުމުން، ވަގުތުން ފުލިދޫ ސިއްހީ މަރުކަޒަށް ގެންގޮސް ފަރުވާ ދޭން ފެށި ނަމަވެސް، ފަރުވާ ދެމުން ދަނިކޮށް އެ މީހާ ވަނީ ނިޔާވެފަ އެވެ. ނިޔާވި މީހާގެ ހަށިގަނޑު މިހާރު ވަނީ މާލެ ގެނެސްފަ އެވެ.

ފުލިދޫ ކައުންސިލްގެ ރައީސް މުހައްމަދު އިމްތިޔާޒް ވިދާޅުވި ގޮތުގައި، ނިޔާވި މީހާ އާއި އޭނާގެ އާއިލާ އަކީ ހުކުރު ދުވަހު މެންދުރު ހާއިރު މާލެއިން އެ ރަށަށް ޗުއްޓީ އަށް ދިޔަ ބައެކެވެ. މި ހާދިސާ ހިނގާފައިވަނީ އެ އާއިލާގެ މީހުން ރަށުގެ އިރުމަތީ ފަރާތަށް މޫދަށް އެރި އުޅެނިކޮށެވެ. އިމްތިޔާޒް ފާހަގަކުރެއްވި ގޮތުގައި އެ ސަރަހައްދަކީ އަބަދު ވެސް އޮއެގަދަ އަދި ފުން ސަރަހައްދެކެވެ.

ވ. ފުލިދޫ އިން ވާހަކަ ދެއްކި މީހަކު ބުނި ގޮތުގައި، އޮޔާދިޔައީ އެ އާއިލާ އާއެކު މޫދަށް އެރި އުޅުނު އުމުރުން 13 އަހަރާއި 15 އަހަރާ ދެމެދުގެ ދެ އަންހެން ކުދިންނެވެ. އެ ދެ ކުދިން އޮޔާދަނިކޮށް ފެނުމުން، އެ ކުދިން ސަލާމަތް ކުރުމަށް ބައްޕަ މޫދަށް ފުންމާލައި ގިނަ މަސައްކަތްތަކެއް ކުރި ކަމަށް މައުލޫމާތު ލިބެ އެވެ. މި ހާދިސާގައި އޮޔާދިޔަ ދެ ކުދިން ވަނީ ސަލާމަތް ކުރެވިފަ އެވެ. އަދި އެ ކުދިންގެ ހާލު މިހާރު ރަނގަޅު ކަމަށް މައުލޫމާތު ލިބެ އެވެ.

މި ހާދިސާއާ ގުޅިގެން ބަލަންޖެހޭ ކަންކަން ފުލުހުން ދަނީ އިތުރަށް ތަހުގީގު ކުރަމުންނެވެ.

ހަފްތާ ބަންދާ ދިމާކޮށް ގިނަ އަދަދެއްގެ ބަޔަކު ރަށްރަށަށް ދަތުރުކުރަމުންދާއިރު، މޫދަށް އެރުމުގައި ސަމާލުވުމަށް ކަމާބެހޭ އިދާރާތަކުން އަބަދުވެސް އިލްތިމާސް ކުރެ އެވެ.