ރާއްޖޭގައި ޝީޝާ މަނާކުރަނީ
ޝީޝާ މަނާކުރުމުގެ އިތުރުން، ހަކުރުން ނަގާ ޓެކްސް ބޮޑުކޮށް ހަކުރަށް ދޭ ސަބްސިޑީ ކަނޑާލުމަށް ސަރުކާރުން ދަނީ މަޝްވަރާ ކުރަމުން. މި ބަދަލުތައް ގެނައުމުގައި ރައްޔިތުންގެ ދިރިއުޅުމުގެ ވައްޓަފާޅިއަށް ރިއާޔަތްކޮށް، އާންމުން ހޭލުންތެރިކުރުވުމަށްފަހު މަރުހަލާތަކަކަށް ބަހާލައިގެން ފިޔަވަޅުތައް އެޅުމަށް ވަނީ ނިންމާފަ. މިއީ ދުންފަތާއި ވޭޕް މަނާކުރުމަށް އެޅި ފިޔަވަޅުތަކެކޭ އެއްފަދައިން، ގައިންގަޔަށް ނާރާ ބަލިތަކުން ރައްޔިތުން ސަލާމަތްކުރުމަށް ކުރެވޭ މުހިންމު މަސައްކަތެއް ކަމަށް ހެލްތު މިނިސްޓަރު ފާހަގަކުރެއްވި.
ރާއްޖޭގައި ޝީޝާ މަނާކުރުމުގެ މަޝްވަރާތައް ކުރިޔަށްދާކަމަށް ހެލްތެ މިނިސްޓަރ އަބްދުﷲ ނާޒިމް އިބްރާހިމް ވަނީ ވިދާޅުވެފަ | ރާއްޖެއެމްވީ
ރާއްޖޭގައި ޝީޝާ މަނާކުރުމާއެކު، ހަކުރުން ޓެކްސް ނެގުމުގެ އިތުރުން އެއަށް ދޭ ސަބްސިޑީ ކަނޑާލުމުގެ މަޝްވަރާ ކުރަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ހާމަކުރައްވައިފި އެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ނާޒިމް ވިދާޅުވީ ޝީޝާ މަނާކޮށް ހަކުރުން ސަބްސިޑީ ކަނޑާލުމަށްފަހު ޓެކްސް ނެގުމާ ގުޅޭގޮތުން ރައްޔިތުން ހޭލުންތެރިކޮށް އެކަމާ ގުޅިގެން އަޅަންޖެހޭ ފިޔަވަޅުތައް އަޅާނެ ކަމަށެވެ.
މިނިސްޓަރު ވިދާޅުވީ ކުރިއަށް އޮތް މުސްތަގުބަލުގައި ޝީޝާ މަނާކޮށް ހަކުރަށް ދޭ ސަބްސިޑީ ކަނޑާލައި، ހަކުރުން ޓެކްސް ނެގުމަކީ ކުރެވޭނެ ކަމެއް ކަމަށެވެ. އެގޮތުން އެންމެ މުހިންމު ދަނޑިވަޅުގައި އެކަން ކުރުން ވަރަށް މުހިންމު ކަމަށް މިނިސްޓަރު ފާހަގަކުރެއްވި އެވެ.
މިހާރު އަޅުގަނޑުމެން ވަރަށް ބޮޑަށް މަޝްވަރާ ކުރަމުންދާ ކަންތައްތަކުގެ ވާހަކަ ތި ވިދާޅުވީ. ޝީޝާ އާއި ހަކުރާއި އިނގޭތޯ. ދެން މިކަމުގައި އެންމެ މުހިންމު ކަމަކީ ޕަބްލިކް ހެލްތު ޕާސްޕެކްޓިވްއަކުން ދެން އާސިމާ ފާހަގަކުރެއްވި ފަދައިން ރައްޔިތުންގެ އެވެއާނަސް އިތުރުކޮށް، ހަރުފަތަކަށްފަހު ހަރުފަތެއް އެއަށް އަޅަންޖެހޭ ފިޔަވަޅުތައް އަޅަމުން ގެންދިޔުން.ހެލްތު މިނިސްޓަރު އަބްދުﷲ ނާޒިމް އިބްރާހިމް
މިނިސްޓަރު ނާޒިމް ވިދާޅުވީ މިފަދަ ކަންކަމަކީ ރައްޔިތުންގެ ދިރިއުޅުމުގެ ވައްޓަފާޅިއާ ވަރަށް ބޮޑަށް ގުޅި އޭގެ ތެރޭގައި ވަރަށް ބޮޑަށް ލާމެހިގެން އެއާއެކު އުޅެވިފައި ހުރި ކަމަކަށްވާތީ، ވަކި އުސޫލެއްގެ ތެރެއިން ކަންކަން ކުރިއަށް ގެންދިޔުމަކީ މުހިންމު ކަމެއް ކަމަށެވެ. އެހެންކަމުން ރައްޔިތުން ހޭލުންތެރިކޮށް އެކަމަށް ތައްޔާރުކުރުމަށްފަހު ފިޔަވަޅުތައް އަޅަން ނިންމާފައިވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ނާޒިމް ވިދާޅުވީ މިދިޔަ އަހަރު ސަރުކާރުން ކުރި އެންމެ މުހިންމު އެއް މަސައްކަތަކީ ދުންފަތުގެ މައްސަލައިގައި އަޅުއްވަންޖެހޭ މުހިންމު ފިޔަވަޅުތައް އަޅުއްވައި އެ ގާނޫނު ތަންފީޒު ކުރެއްވިކަން ކަމަށެވެ.
ސަރުކާރުން މިދިޔަ އަހަރު ރާއްޖެ އިން ވޭޕް މަނާކޮށް، ދުންފަތުން ޓެކްސް ބޮޑުކުރުމުގެ އިތުރުން ދުންފަތަށް ޖެނެރޭޝަނަލް ބޭން އެއް ވެސް ގެނެސްފައިވެ އެވެ.
ދުންފަތާއި ޝީޝާ އަށް އަޅާފައިވާ ފިޔަވަޅުތަކާ އެއްގޮތަށް ހަކުރަށް ވެސް މިފަދަ ފިޔަވަޅުތައް އެޅުމަކީ ރާއްޖޭގެ ރައްޔިތުންގެ ސިއްހަތު ރައްކާތެރިކޮށް ދުޅަހެޔޮ ޖީލެއް ބިނާކުރުމަށް ސަރުކާރުން ކުރާ މަސައްކަތުގެ ބައެއް ކަމަށް މިނިސްޓަރު ވިދާޅުވި އެވެ.
ހަކުރުން ޓެކްސް ނަގައި ސަބްސިޑީ ކަނޑާލުމުން ރައްޔިތުންގެ ދިރިއުޅުމަށް ބޮޑު އަސަރެއް ކުރާނެ ކަމަށް ބެލެވެ އެވެ.
