ރާއްޖޭގެ ކަނޑުތަކުން މައުދަނާއި ތެޔޮ ހޯދަން މަސައްކަތް ކުރަން އުޅުމީ މުއިއްޒު ހައްދަވާ ބޮޑު ގޯހެއް: ކުރީގެ އެންވަޔަރަންމަންޓް މިނިސްޓަރ ޝައުނާ
ރައީސް މުއިއްޒު ސްޕެޝަލް އިކޮނޮމިކް ޒޯންތަކުގައި އިންވެސްޓްކުރެވޭނެ ދާއިރާތަކުގެ ތެރޭގައި ތެލާއި މިނެރަލް ހޯދުމުގެ މަސައްކަތް ހިމަނައި ޖެނުއަރީ 27 ގައި އެ ލިސްޓަށް ބަދަލު ގެންނަވައިފި. ކުރީގެ އެންވަޔަރަންމަންޓް މިނިސްޓަރު ޝައުނާ ވިދާޅުވީ މިއީ ދުރުވިސްނުމެއް ނެތް ބޮޑު ގޯހެއް ކަމަށާއި މީގެ ސަބަބުން ކަނޑުގެ ދިރުންތަކަށް ނުރައްކާ ކުރިމަތިވެ މަސްވެރިކަމުގެ ސަރަހައްދުތައް ހަލާކުވެ ފަތުރުވެރިކަމުގެ އަގު ވެސް ވެއްޓިގެންދާނެ ކަމަށް.
އެންވަޔރަންމަންޓަލް ޕްރޮޓެކްޝަން އޭޖެންސީ އިން ފަޅު ފުންކުރުމާއި ބިން ހިއްކުމުގެ މަސައްކަތްތަކާ ގުޅިގެން ކަނޑައަޅާފައިވާ އުސޫލުތަކާ ޚިލާފަށް ހިންގާ ހަރަކާތްތަކާ ބެހޭގޮތުން ލިބެމުންދާ ރިޕޯޓުތައް ބަލައި، އެކަންކަމަށް ފިޔަވަޅު އެޅުމުގެ މަސައްކަތް ކުރަނީ - މެއި 21، 2024. (ފައިލް) | އެކްސް
ދިވެހިރާއްޖޭގެ ކަނޑުގެ ސަރަހައްދުތަކުން މައުދަން ހޯދުމަށާއި ތެޔޮ ހޯދުމުގެ ހުއްދަ ލިބިދޭ ގޮތަށް ރައީސް މުއިއްޒު ހަމަޖެއްސެވުމަކީ ހެދޭ ވަރަށް ބޮޑު ގޯހެއް ކަމަށް ކުރީގެ އެންވަޔަރަންމަންޓް މިނިސްޓަރ އައިމިނަތު ޝައުނާ ވިދާޅުވެއްޖެ އެވެ.
ރައީސް މުހައްމަދު މުއިއްޒު ވަނީ ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި އިންވެސްޓްކުރެވޭނެ އިގުތިސޯދީ ހަރަކާތްތަކުގެ ދާއިރާތަކުގެ ތެރޭގައި ތެލާއި މިނެރަލް ހޯދުމުގެ މަސައްކަތް ހިމަނައި، ޖެނުއަރީ މަހުގެ 27 ވަނަ ދުވަހު އެ ލިސްޓަށް ބަދަލު ގެންނަވާފަ އެވެ.
ސްޕެޝަލް އިކޮނޮމިކް ޒޯނެއްގައި ހިންގިދާނެ އިގުތިސޯދީ މަސައްކަތްތައް ކޮންމެ އަހަރެއްގެ ފެބްރުއަރީ މަހުގެ ކުރިން މުރާޖައާ ކޮށް ރައީސްގެ ގަރާރަކުން އަލުން ކަނޑައަޅަންޖެހޭ ގޮތަށް އޮންނަ އިރު، ކުރިން ގޭސް އެކްސްޕްލޮރޭޝަންގެ މަސައްކަތްތައް ހިމަނާފައި އޮތް އޮތުމަށް ބަދަލު ގެނެސް ނެރުނު ލިސްޓްގައި ތެލާއި ގޭހާއި މިނެރަލް އެކްސްޕްލޮރޭޝަންގެ މަސައްކަތްތައް މިހާރު ވަނީ ހިމަނާފަ އެވެ.
ރައީސް ސޯލިހްގެ ސަރުކާރުގައި އެންވަޔަރަންމަންޓް އެންޑް ކްލައިމެޓް ޗޭންޖް މިނިސްޓަރ ކަން ކުރެއްވި ޝައުނާ އެކްސް ގައި ބުދަ ދުވަހު ކުރެއްވި ޕޯސްޓެއް ގައި ވިދާޅުވީ އެ ނިންމެވުމަކީ "ނުހަނު ކަންބޮޑުވާ ކަމެއް" ކަމަށެވެ.
ޝައުނާ ވިދާޅުވީ، މިއީ ހެދޭ ވަރަށް ބޮޑު ގޯހެއް ކަމަށާއި މީގެ ސަބަބުން ކަނޑުގެ ދިރުންތަކަށް ބޮޑެތި ނުރައްކާތަކެއް ކުރިމަތިވެ، މަސްވެރިކަން ކުރާ ސަރަހައްދުތައް ހަލާކުވެ، ރާއްޖޭގެ ފަތުރުވެރިކަމުގެ އަގުވެސް ވެއްޓިގެންދާނެ ކަމަށެވެ.
"މިއީ ދުރުވިސްނުމެއް ނެތް، ހަނި ނަޒަރަކުން ނިންމާފައިވާ ނިންމުމެއް؛" ކަމަށް ވެސް ޝައުނާ ވިދާޅުވި އެވެ.
މުއިއްޒުގެ ނިންމެވުމަށް ޝައުނާ ފާޑު ވިދާޅުވީ، ތިމާވެއްޓަށް އެއްވެސް މިންވަރަކަށް ބެލުމެއް ނެތި ރާއްޖޭގެ އެކި ސަރަހައްދުތައް ހިއްކަމުން ދިއުމާއި ގުޅިގެން ކިސަޑު ފެތުރުމާއި މުހިންމު މާހައުލުތައް ހަލާކުވަމުންދާތީ އެކަމުގެ ކަންބޮޑުވުން ގިނަ ބަޔަކު ފާޅު ކުރަމުން ގެންދާ ދަނޑިވަޅެއްގަ އެވެ.
ދިވެހިރާއްޖޭގައި ޤާއިމުކުރާ ސްޕެޝަލް އިކޮނޮމިކް ޒޯނެއް ގައި ހިންގިދާނެ އިޤްތިޞާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމުލަ އިންވެސްޓްމަންޓުގެ އެންމެ ކުޑަ މިންގަނޑު، ޤާނޫނު ނަންބަރު 2014/24 (ސްޕެޝަލް އިކޮނޮމިކް ޒޯނުގެ ޤާނޫނު)ގެ ދަށުން ރައީސް މުޢިއްޒު އަންގާރަ ދުވަހު އަލުން ކަނޑައެޅުއްވުމާ ގުޅިގެން ރައީސް އޮފީހުން ނެރުނު ބަޔާނެއްގައި ބުނެފައި ވަނީ އެސްއީޒެޑް ގައި ހިންގިދާނޭ އިޤްތިޞާދީ މަސައްކަތްތައް ކަމުގައި ކަނޑައަޅާފައި ވަނީ، ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަ ނޫން އަދަދުގެ އިންވެސްޓްމަންޓްތަކާއި، ޖުމުލަ 500 މިލިޔަން އެމެރިކާ ޑޮލަރަށް ވުރެ ކުޑަ ނޫން އަދަދެއްގެ އިންވެސްޓްމަންޓް ހިމެނޭ ގޮތަށް ތަރައްޤީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތައް ކަމަށެވެ.
ސްޓްރެޓީޖިކް އިންވެސްޓްމަންޓުތަކުގެ ތެރެއިން، އިންވެސްޓްމަންޓެއް ހިމެނޭގޮތުން ޤާއިމުކުރުމަށް ހުށަހަޅާ ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓްގެ ތެރޭގައި ނުވަ ބާވަތެއްގެ އިންވެސްޓްމަންޓް ވަނީ ހިމަނާފަ އެވެ. އެއީ:
(ހ) އެކްސްޕޯޓަށް އިސްކަންދީގެން ހިންގާ މެނުފެކްޗަރިންގގެ އެކި ބާވަތުގެ މަސައްކަތްތައް؛
(ށ) ޓްރާންސްޝިޕްމަންޓް ޕޯޓް، އިންޓަރނޭޝަނަލް ލޮޖިސްޓިކްސް، ޕޯޓް، އެއަރޕޯޓް؛
ބަލްކް ބްރޭކިންގ، ބަންކަރިންގ، ޑޮކިންގ ސަރވިސަސް.
(ނ) ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސަރޗް އެންޑް ޑިވެލޮޕްމަންޓް ފެސިލިޓީތައް؛
(ރ) ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކް، އައި.ސީ.ޓީއާ ގުޅޭ ފެސިލިޓީތައް؛
(ބ) އިންޓަރނޭޝަނަލް ފައިނޭންޝަލް ސަރވިސަސް، އިންޓަނޭޝަނަލް ޓްރޭޑް ސެންޓަރުތައް؛
(ޅ) އިޢާދަކުރަނިވި ހަކަތައިގެ ދާއިރާ؛
(ކ) ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް؛
(އ) ފުޑް ސެކިއުރިޓީގެ ދާއިރާ؛ އަދި
(ވ) ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތަކެވެ.
ޖުމުލަ 500 މިލިޔަން އެމެރިކާ ޑޮލަރަށްވުރެ ކުޑަ ނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްޤީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތަކުގައި އެންމެ ދަށް އިންވެސްޓްމަންޓުގެ ގޮތުގައި ކަނޑައަޅައިފައިވާ 500 މިލިޔަން އެމެރިކާ ޑޮލަރު ޚާއްޞަ ކުރަން ވާނީ ސަސްޓެއިނަބަލް ޓައުންޝިޕް ޑިވެލޮޕްމަންޓުގެ ކޮމްޕޯނަންޓް ތަކަށް ކަމަށް ވެސް މިކަމާ ގުޅިގެން ނެރުނު ރައީސް ގެ ޤަރާރުގައި ކަނޑައަޅާފައިވެ އެވެ.
