ސަރުކާރު ބަދަލުވިފަހުން ނޮޅިވަރަމް ފުޓްބޯޅަ ދަނޑުގެ މަސައްކަތް މަޑުޖެހިފައިވާކަން ކައުންސިލުން ހާމަކޮށްފި
8 ޖެނުއަރީ 2026 | ބުރާސްފަތި 16:31ރައީސް މުއިއްޒުގެ ސަރުކާރަށް ދެ އަހަރު ވެގެން ގޮސްފައިވާއިރު ދަނޑުގެ މަސައްކަތް އެކަށީގެންވާ ގޮތެއްގައި ކުރިޔަށް ނުދާކަމަށް ކައުންސިލްގެ އޮފިސަރު ނާއިމް އަލީ ވިދާޅުވި. ރައްޔިތުން ބުނަނީ ނޮޅިވަރަމުގައި ތަރައްގީގެ އެއްވެސް މަޝްރޫޢެއް އެކަށީގެންވާ ގޮތަށް ނުހިނގާ ކަމަށް.
ހދ. ނޮޅިވަރަމް ފުޓްބޯޅަ ދަނޑު: އެމްޑީޕީ ސަރުކާރުން ބާރު ސްޕީޑް ގައި ކުރިޔަށް ގެންދިޔަ މި ދަނޑުގެ މަސައްކަތް އެކަށީގެންވާ ގޮތަކަށް ކުރިޔަށް ނުދާ ކަމުގެ ޝަކުވާ އެރަށު ރައްޔިތުން ކުރޭ | ރާއްޖެ އެމްވީ
ހދ. ނޮޅިވަރަމް ފުޓްބޯޅަ ދަނޑުގެ މަސައްކަތް މިހާރު މަޑުޖެހިފައިވާކަން އެރަށު ކައުންސިލުން ހާމަކޮށްފި އެވެ.
ނިމިދިޔަ އެމްޑީޕީ ސަރުކާރުން ބާރު ސްޕީޑް ގައި ކުރިޔަށް ގެންދިޔަ މި މަޝްރޫޢު މިހާރު އޮތީ ގާތްގަނޑަކަށް ހުއްޓިފައި ކަމަށާއި، މި ސަރުކާރުން އެ މަސައްކަތް އެކަށީގެންވާ ގޮތެއްގައި ކުރިޔަށް ނުގެންދާކަން ރައްޔިތުން ފާހަގަކުރެ އެވެ.
ނޮޅިވަރަމް ކައުންސިލް އޮފީހުގެ އެސޯސިއޭޓް ކައުންސިލް އޮފިސަރު ނާއިމް އަލީ ވިދާޅުވީ، ފުޓްބޯޅަ ދަނޑަކީ އެރަށު ޒުވާނުންގެ ވަރަށް ބޮޑު އުއްމީދެއް ކަމަށެވެ. އެ ސަރަހައްދުގައި ކުރިން ހުރި ދަނޑު މީގެ ދިހަ އަހަރެއްހާ ދުވަސް ކުރިން ޒަމާނީ ފެންވަރަށް ހަދަން ވެގެން ހަލާކުކޮށްލި ކަމަށާއި، އެހެން ނަމަވެސް ދަނޑުގެ މަސައްކަތް ފަށާފައިވަނީ ނިމިދިޔަ އެމްޑީޕީ ސަރުކާރުން ކަމަށް ނާއިމް ފާހަގަކުރެއްވި އެވެ.
ނާއިމް ވިދާޅުވީ، އެމްޑީޕީ ސަރުކާރުން ދަނޑުގައި އަޅަން ބޭނުންވާ ޓާފް އާއި ދަނޑު ތަރައްގީކުރުމަށް ބޭނުންވާ އިތުރު ސާމާނު ރަށަށް ގެނެސް ވަރަށް ބާރު ސްޕީޑް ގައި މަސައްކަތް ކުރިޔަށް ގެންދިޔަ ކަމަށެވެ. އެހެން ނަމަވެސް، ވަކި ހިސާބަކުން އެ ދަނޑުގައި އަލިފާން ރޯކޮށްލާ ބަޔަކު ދިން ގެއްލުންތަކެއްގެ ސަބަބުން މަސައްކަތް ހުއްޓުނު ކަމަށާއި، ސަރުކާރު ބަދަލުވީ ވެސް މަސައްކަތް ހުއްޓުނު ދުވަސްވަރު ކަމަށް އޭނާ ވިދާޅުވި އެވެ.
މިއީ މިރަށު ޒުވާނުން އަބަދުވެސް އާދޭސް ކުރަމުން ދިޔަ މަސައްކަތެއް. މި ދަނޑު ރަނގަޅު ފެންވަރަކަށް ހަދަން ވެގެން މީގެ 10 ވަރަކަށް އަހަރު ކުރިން ހަލާކު ކޮށްލީ. އެހެން ނަމަވެސް ޓާފް އެޅުމުގެ މިކަހަލަ އެއްވެސް މަސައްކަތެއް ނުހިނގާ. މިހިން އޮއްވާ ނިމިދިޔަ އެމްޑީޕީ ސަރުކާރުން މި ދަނޑުގެ މަސައްކަތް ފަށައިދިނީ. ވަރަށް އުފާވި މަންޒަރެއް އެއީ. ޓާފް އެއްޗިހި މިރަށަށް ގެނެސް ދަނޑުގެ މަސައްކަތް ވަރަށް ބާރަށް އޭރު ކުރިޔަށް ދިޔަ. އެހެން ނަމަވެސް ވަކި ހިސާބަކުން މިތަނަށް ބަޔަކު ދިން ގެއްލުން ތަކެއްގެ ސަބަބުން މަސައްކަތް ހުއްޓުނީ. އެހެން މަސައްކަތް ހުއްޓިފަ އޮއްވަ ސަރުކާރު ބަދަލުވީ. އޭގެ ފަހުން މަސައްކަތް ކުރިޔަސް ދަނީ ވަރަށް މަޑުން.ހދ. ނޮޅިވަރަމް ކައުންސިިލުގެ އެސޯސިއޭޓް ކައުންސިލް އޮފިސަރ ނާއިމް އަލީ
ރައީސް ޑރ. މުހައްމަދު މުއިއްޒުގެ ސަރުކާރަށް ދެ އަހަރު ވެގެން ގޮސްފައިވާއިރު، ދަނޑުގެ މަސައްކަތް އެކަށީގެންވާ ގޮތެއްގައި ކުރިޔަށް ނުދާކަން ނާއިމް ފާހަގަކުރެއްވި އެވެ. ދަނޑުގެ ލައިޓްތަކަށް ކަރަންޓް އެޅުމުގެ ހުރިހާ މަސައްކަތެއް ވެސް ކުރީ ކައުންސިލުން ހަރަދުކޮށްގެން ކަމަށް އޭނާ ވިދާޅުވި އެވެ.
ނޮޅިވަރަމް ފުޓްބޯޅަ ދަނޑުގެ މަސައްކަތް ހިމެނޭހެން އެރަށުގެ ތަރައްގީގެ ގިނަ ކަންކަމުގައި ސަރުކާރުން މަސައްކަތް ނުކުރާ ކަމަށާއި، ބައެއް މަސައްކަތްތައް ކައުންސިލުން ކުރަމުން ގެންދާކަން ނާއިމް ފާހަގަކުރެއްވި އެވެ. އެގޮތުން ނޮޅިވަރަމް ކައުންސިލް ބަޖެޓުން ހަރަދުކޮށްގެން ރަށުގައި ކުޑަކުދިންގެ ޕާކަކާއި، ރެސްޓޯރެންޓެއް ހުޅުވާ، ބަނދަރު ސަރަހައްދުގައި މިހާރުވެސް ހިތްފަސޭހަ މައިޒާނެއް ހަދަމުން ދާކަމަށް އޭނާ ވިދާޅުވި އެވެ.
ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ނޮޅިވަރަމުގައި ތަރައްގީގެ އެއްވެސް މަޝްރޫޢެއް އެކަށީގެންވާ ގޮތަށް ނުހިނގާކަން އެރަށު ރައްޔިތުން ފާހަގަކުރެ އެވެ. ނިމިދިޔަ އެމްޑީޕީ ސަރުކާރުން އެރަށުގައި ފަށާފައިވާ މަޝްރޫޢުތައްވެސް މިހާރު މަޑުޖެހިފައިވާކަމަށް ރައްޔިތުން ވަނީ ފާހަގަކޮށްފަ އެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ. އެހެން ނަމަވެސް، މި ސަރުކާރުން އެ މަޝްރޫޢުތައް ކުރިޔަށް ގެންދިއުމުގައި ލަސްވެފައިވާކަން ރައްޔިތުން ފާހަގަކުރެ އެވެ.
