ކީރިތި ގުރުއާނުގައި އަތްޕުޅު ބާއްވަވައިގެން ހުންނަވާ ޒޮހްރާން މަމްދާނީ ނިއުޔޯކް ސިޓީގެ މޭޔަރުކަމުގެ ހުވާ ކުރައްވައިފި

ޒޮހްރާން މަމްދާނީ ނިއުޔޯކް ސިޓީގެ މޭޔަރުކަމުގެ ހުވާ ކުރައްވައި، އެމެރިކާގެ އެންމެ ބޮޑު ސިޓީގެ މޭޔަރުކަން ކުރައްވާ ފުރަތަމަ މުސްލިމް އަދި އެތައް ޖީލެއްގެ ތެރޭގައި އެ މަގާމާ ހަވާލުވި އެންމެ ޒުވާން ބޭފުޅާގެ ޝަރަފު ހޯއްދަވައިފިއެވެ.

ޑިމޮކްރެޓިކް ޕާޓީއަށް ނިސްބަތްވެވަޑައިގަންނަވާ މަމްދާނީ ހުވާކުރެއްވީ ބުރާސްފަތި ދުވަހުގެ މެންދަމުގެ ވަގުތެއްގައި، މެންހަޓަންގެ ކުރީގެ ސަބްވޭ ސްޓޭޝަނެއްގައެވެ. ހުވާ ކުރެއްވުމުގެ ރަސްމިއްޔާތުގައި އެމަނިކުފާނު އަތްޕުޅު ބޭއްވެވީ ކީރިތި ގުރުއާނުގައެވެ.

މި މަގާމާ ހަވާލުވެވަޑައިގަތުމަށްފަހު މަމްދާނީ ވިދާޅުވީ، މިއީ އެމަނިކުފާނުގެ މުޅި ހަޔާތުގައިވެސް ލިބިވަޑައިގެންނެވި އެންމެ ބޮޑު ޝަރަފާއި އިއްޒަތް ކަމަށެވެ.

ނިއުޔޯކްގެ އެޓާނީ ޖެނެރަލް ލެޓީޝިއާ ޖޭމްސް އިސްވެ ހުންނަވައި ކުރިއަށް ގެންދިޔަ މި ރަސްމިއްޔާތު ބާއްވާފައިވަނީ، ސިޓީގެ އެންމެ ދުވަސްވީ އެއް ސަބްވޭ ސްޓޭޝަން ކަމަށްވާ "އޯލްޑް ސިޓީ ހޯލް" ސްޓޭޝަނުގައެވެ.

މަމްދާނީގެ ދެވަނަ ހުވާކުރެއްވުމުގެ ރަސްމިއްޔާތު މިއަދު މެންދުރުފަހު 1:00 ގައި ސިޓީ ހޯލްގައި ބޭއްވުމަށް ވަނީ ހަމަޖެހިފައެވެ. މި ރަސްމިއްޔާތުގައި ހުވާލައިދެއްވާނީ މަމްދާނީ ވަރަށް ބޮޑަށް އިހުތިރާމް ކުރައްވާ ސިޔާސީ ޝަހުސިއްޔަތެއް ކަމަށްވާ ޔޫއެސް ސެނެޓަރ ބާނީ ސޭންޑާސް އެވެ. މީގެ އިތުރުން، ބްރޯޑްވޭގެ "ކެންޔަން އޮފް ހީރޯސް" ސަރަހައްދުގައި އާންމުންނަށް ހުޅުވާލައިގެން ބާއްވާ ބޮޑު ހަރަކާތެއްވެސް ކުރިއަށްދާނެ އެވެ.

މަމްދާނީ މި ފެއްޓެވީ އެމެރިކާގެ ސިޔާސީ ދާއިރާގައި އެންމެ ގިނަ ބައެއްގެ ސަމާލުކަން ހުއްޓިފައިވާ އަދި އެހާމެ ބުރަ މަގާމެއްގެ މަސްއޫލިއްޔަތު އަދާ ކުރެއްވުމަށެވެ.

އޭނާ އަކީ ނިއުޔޯކްގެ ފުރަތަމަ މުސްލިމް މޭޔަރުގެ އިތުރުން، އެ ސިޓީގެ މޭޔަރުކަން ކުރައްވާ ދެކުނު އޭޝިއާ ދަރިކޮޅުގެ ފުރަތަމަ ފަރާތައް ވުމުގެ އިތުރުން އެފްރިކާ އަށް އުފަން ފުރަތަމަ ފަރާތް ވެސް މެއެވެ. އުމުރުފުޅުން 34 އަހަރުގައި މި މަގާމާ ހަވާލުވެވަޑައިގެންނެވިއިރު، މިއީ ފަހުގެ ތާރީޚެއްގައި އެ ސިޓީގެ މޭޔަރުކަން ކުރައްވާ އެންމެ ޒުވާން ބޭފުޅާއެވެ.

ދިރިއުޅުމުގެ ޚަރަދުތައް ކުޑަކުރުމުގެ ސިޔާސަތުތަކެއްގެ މައްޗަށް ބިނާކޮށް ކެމްޕޭން ކުރެއްވި މަމްދާނީ ވަނީ، ދުނިޔޭގެ އެންމެ އަގުބޮޑު އެއް ސިޓީގައި ދިރިއުޅޭ ރައްޔިތުންނަށް ލުއިފަސޭހަ ބަދަލުތަކެއް ގެނެސްދެއްވާނެ ކަމަށް ވައުދުވެވަޑައިގެންފައެވެ. އޭގެ ތެރޭގައި ހިލޭ ތުއްތު ކުދިން ބެލެހެއްޓުމާއި، ހިލޭ ބަހުގެ ޚިދުމަތް ދިނުމާއި، ގާތްގަނޑަކަށް އެއް މިލިއަން ގޭބިސީގެ ކުލި ބޮޑުނުކޮށް ހިފެހެއްޓުމުގެ އިތުރުން، ސިޓީގެ ބެލުމުގެ ދަށުން ހިންގާ ގްރޯސަރީ ފިހާރަތަކެއް ތައާރަފުކުރުން ހިމެނެއެވެ.

ނަމަވެސް، ކުނި މެނޭޖުކުރުމާއި، ސިޓީ ސާފުތާހިރުކޮށް ބެލެހެއްޓުމާއި، ސަބްވޭގެ ދަތުރުތައް ލަސްވުންތައް ފަދަ އާންމު ކަންކަމުގައި ދިމާވާ ދަތިތަކަށް ވެސް އޭނާ ހައްލު ހޯއްދަވަން ޖެހިވަޑައިގަންނަވާނެއެވެ.

ޔޫގެންޑާގެ ކަމްޕާލާ އަށް އުފަން މަމްދާނީ އަކީ މަޝްހޫރު ފިލްމު އުފެއްދުންތެރިޔާ މީރާ ނައިރު އަދި ތައުލީމީ ދާއިރާ ގެ ބޭފުޅެއް ކަމަށްވާ މަހްމޫދު މަމްދާނީގެ ދަރިކަލެކެވެ. އޭނާގެ އާއިލާ ނިއުޔޯކަށް ބަދަލުވީ އޭނާގެ އުމުރުން 7 އަހަރުގައެވެ. 9/11 ގެ ހާދިސާއަށްފަހު މުސްލިމުންނަށް ގިނަ ގޮންޖެހުންތަކެއް ކުރިމަތިވި މާހައުލެއްގައި ބޮޑުވި މަމްދާނީ އެމެރިކާގެ ރައްޔިތަކަށްވީ 2018 ވަނަ އަހަރުއެވެ.