ބިމާ ގުޅޭ މައްސަލަތަކެއް ތާވަލު ކުރުމުން މާލެ ސިޓީ ކައުންސިލްގެ ޕީޕީއެމް ކައުންސިލަރުން ހާޒިރެއް ނުވި، މިއަދުގެ ޖަލްސާ ވެސް ކޯރަމް ހަމަ ނުވެގެން ކެންސަލް
މާލެ ސިޓީ ކައުންސިލުގެ ކޯރަމް އަކީ 10 ބޭފުޅުން
މާލެ ސިޓީ ކައުންސިލަރުންގެ ބައްދަލުވުމެއްގެ ތެރެއިން- ފައިލް ފޮޓޯ
ބިމާ ގުޅޭ މައްސަލަތަކެއް ތާވަލު ކުރުމުން މާލެ ސިޓީ ކައުންސިލްގެ ބުދަ ދުވަހުގެ ޖަލްސާ ވެސް ކޯރަމް ހަމަނުވެގެން ކެންސަލް ކުރަން ޖެހިއްޖެ އެވެ.
މާލެ ސިޓީ ކައުންސިލުގެ ބުދަ ދުވަހުގެ ޖަލްސާ ކެންސަލް ކުރީ އެ ޖަލްސާ ފަށަން އޮތް ވަގުތު ފާއިތުވެގެން ދިޔައިރު ވެސް ކައުންސިލުގެ ކޯރަމް ހަމަ ނުވުމުންނެވެ. މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން 19 ބޭފުޅުން ތިއްބަވަ އެވެ. މާލެ ސިޓީ ކައުންސިލުގެ ކޯރަމް އަކީ 10 ބޭފުޅުންނެވެ.
މި ޖަލްސާ ކޯރަމް ހަމަ ނުވެގެން ކެންސަލް ވުމާ ގުޅިގެން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވިދާޅުވީ، ޕީއެންސީ ކައުންސިލަރުން ހާޒިރު ނުވުމުން ކޯރަމް ނުލިބި ޖަލްސާ ކެންސަލް ކުރި މިއީ ދެވަނަ ހަފްތާ ކަމަށެވެ. އަދި ބިމަކާބެހޭ ކަމެެއް އެޖެންޑާ ގައި އޮތްނަމަ މި ނޫން ވަރެއް ނުވާ ކަމަށް އޭނާ ވިދާޅުވި އެވެ.
މާލެ ސިޓީ ކައުންސިލްގެ 04 ވަނަ ދައުރުގެ 221 ވަނަ ރަސްމީ އާއްމު ޖަލްސާ އަށް ބިމާ ގުޅޭ މައްސަލަތަކެއް އެޖެންޑާ ކޮށްފައިވެ އެވެ.
އެއީ ވިލިމާލޭގެ ކޮމާޝަލް ބިންތަކާ ގުޅޭގޮތުން ތައްޔާރު ކޮށްފައިވާ ރިޕޯޓު ހިއްސާ ކުރުމާއި، މާލޭގެ ލޮނު ޒިޔާރާތްކޮޅުން ސާރފިންގ ސްޓޭޑިއަމް ތަރައްގީ ކުރުމަށް ކަނޑައަޅާފައިވާ ބިމަށް 3975 އަކަފޫޓު ބިން އިތުރު ކޮށްދިނުމަށް އެދި މާލީ ކަންކަމާއި ތަރައްގީގެ ރޭވުންތެރިކަމާ ބެހޭ ވުޒާރާއިން ފޮނުވާފައިވާ ސިޓީއާ މެދު މަޝްވަރާ ކުރުމުގެ އިތުރުން މާލޭގެ މަގު ތަކުން ހަތަރު ފުރޮޅުލީ ވެހިކަލް ޕާކިންގ އަށް ދޫކޮށްފައިވާ ސަރަހައްދުތައް ފިޔަވައި، ޕާރކިންއަށް ދޫކޮށްފައިވާ ސްލޮޓްތަކުގެ އެއްބަސްވުމުގެ މުއްދަތު ހަމަވެފައިވާތީވެ މުއްދަތު އިތުރު ކުރުމާ ގުޅޭގޮތުން މަޝްވަރާކޮށް ގޮތެއް ނިންމުމަށެވެ.
މާލޭ ސިޓީ ކައުންސިލުގެ ސަރުކާރު ހިންގާ ޕީއެންސީއަށް ނިސްބަތްވާ ގިނަ ކައުންސިލަރުން ޖަލްސާ އަށް ހާޒިރުނުވުމުގެ ސަބަބުން ބުދަ ދުވަހުގެ ޖަލްސާ ކެންސަލް ކޮށްފައިވާއިރު، ރައީސް މުއިއްޒު މޭޔަރުކަމުގައި ހުންނެވި އިރު ހެއްދެވި މަސް މާރުކޭޓުގެ އެއްބަސްވުމާ ގުޅޭ މުހިންމު މައްސަލައެއް ވެސް ނުބެލި ދިގުލައިގެން ދާ މައްސަލަ ވަނީ ބޮޑު ވެފަ އެވެ.
މީގެ އިތުރުން މާލޭ މަގުމަތިން ޕާކިން ސްލޮޓްތައް ކުއްޔަށް ދޫކުރަން ފެށީ މިހާރުގެ ރައީސް މުއިއްޒު މާލޭ މޭޔަރަކަށް ހުންނެވި ދުވަސްވަރު، 2022ގަ އެވެ.
މައުލޫމާތު ލިބޭގޮތުގައި މިދިޔަ އަހަރު މެއި މަހުގެ ނިޔަލަށް މާލޭގެ ފަސް ސަރަހައްދަކުން ޕާކު ކުރުމަށް 1120 ސްލޮޓް ދޫކޮށްފައިވެއެވެ. އޭގެތެރެއިން 941 ސްލޮޓު ދޫކޮށްފައިވަނީ މަގުމަތިންނެވެ. މަގުމަތިން ދޫކުރި ސްލޮޓުތައް ދެ މީހަކަށް ދޫކުރުމުގެ މައްސަލަތައް ފެންމަތިވެފައިވާއިރު، މިތަންތަން ދޫކޮށްފައި ވަނީ ކައުންސިލްގެ ބައެއް މެންބަރުންނާއި، މަސައްކަތް ކުރަމުންދިޔަ ސިޔާސީ ބައެއް މުވައްޒަފުންނަށް ބޮޑެތި އަދަދުތަކުން ފައިސާ ދީގެންކަމަށް ތުހުމަތުކޮށްފައިވެ އެވެ.
