ވެބް ޚިދުމަތްދޭ ކްލަޑްފްލެއަރ ޑައުންވެ ރާއްޖޭގެ ގިނަ އަދަދެއްގެ އިންޓަނެޓް ހިދުމަތް މެދުކެނޑިއްޖެ

ވެބް އިންފްރާސްޓްރަކްޗަރ ކުންފުނި ކްލައުޑްފްލެއަރ އަށް ދިމާވި މައްސަލަ އަކާ ގުޅިގެން ދުނިޔޭގެ ފެންވަރުގައި ގިނަ އަދަދެއްގެ އިންޓަރނެޓް ހިދުމަތްތަކެއް ހުއްޓުމުގެ މައްސަލަ ކުރިމަތިވެއްޖެ އެވެ.

ކުންފުނިން ބުނީ، އަންގާރަ ދުވަހު ދިމާވި މައްސަލަ ހައްލުވާން ފަށާފައިވާ ކަމަށެވެ. މި މައްސަލައިގެ ސަބަބުން އެކްސް އަދި ޗެޓްޖީޕީޓީ ފަދަ މުހިންމު އިންޓަނެޓް ޕްލެޓްފޯމްތަކަށް ވަނުމުން އެތައް ހާސް މީހުން މަހުރޫމްވެފައިވެއެވެ.

ރާއްޖޭގެ މުހިންމު އެތައް އޮންލައިން ޚިދުމަތްތަކަކަށް މިކަމުގެ އަސަރު ކޮށްފައިވެއެވެ. އޭގެ ތެރޭގައި ބޭންކް އޮފް މޯލްޑިވްސް އާއި ދިރާގު އަދި އުރީދޫ ފަދަ ކުންފުނިތައް ހިމެނެ އެވެ.

ދުނިޔޭގެ ވެބް ޓްރެފިކްގެ ފަސްބައިކުޅަ އެއްބައި އެ ކުންފުނީގެ ނެޓްވޯކުން ހިންގާ ކްލައުޑްފްލެއަރ އިން ބުނީ މައްސަލައަށް ހައްލު ހޯދަމުންދާ ކަމަށާއި އެހެން ނަމަވެސް އަދިވެސް ބައެއް ކަސްޓަމަރުންނަށް މައްސަލަތައް ކުރިމަތިވަމުންދާ ކަމަށެވެ.

މި ހާދިސާއަކީ މުހިންމު އޮންލައިން ހިދުމަތްތަކަށް ނިސްބަތުން ވަރަށް ގާތްގާތުގައި ދިމާވި ދެވަނަ މައްސަލަ އެވެ. ފާއިތުވި މަހު އެމެޒޯންގެ ކްލައުޑް ހިދުމަތް ހުއްޓުމުގެ ސަބަބުން ސްނެޕްޗެޓް އަދި ރެޑިޓް ފަދަ އެތައް ހާސް މަޝްހޫރު ވެބްސައިޓްތަކާއި އެޕްތައް ބޭނުން ކުރުމަށް ހުރަސްތައް ކުރިމަތިވިއެވެ.

ޙާދިސާ އާ ގުޅިގެން ކްލައުޑްފްލެއަރ ގެ ހިއްސާގެ އަގު ގާތްގަނޑަކަށް 5 ޕަސެންޓް ދަށަށް ދިޔައެވެ. ދުނިޔޭގެ އެންމެ ބޮޑު ނެޓްވޯކްތަކުގެ ތެރެއިން އެއް ނެޓްވޯކެއް ހިންގާ ކްލައުޑްފްލެއަރ އިން ވެބްސައިޓްތަކާއި އެޕްތައް އަވަސްކޮށް ލޯޑުވެވޭނެ ގޮތް ހެދުމުގެ ޚިދުމަތާއި އޮންލައިން ޓްރެފިކް އިތުރުވުމުން ދިމާވާ މައްސަލަތައް ހައްލު ކޮށްދިނުމާއި ސައިބަރ އެޓޭކްތަކުން ރައްކާތެރިކޮށްދިނުން ފަދަ ޚިދުމަތްތައް ފޯރުކޮށްދެއެވެ.