ކުރިއަށް އޮތް ލޯކަލް ކައުންސިލް އިންތިޚާބާއި ދިމާކޮށް، މީގެ ކުރިން ވެވަޑައިގެންފައިވާ ވައުދުތައް ތަކުރާރުކޮށް، ރައްޔިތުން ސްކޭމެއްގައި ޖެއްސުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތް ކުރައްވާނެ ކަމަށް މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.

ރާއްޖެޓީވީގެ "ބޭކާރު 2 އަހަރު" ކަވަރޭޖްގެ ތެރެއިން ވާހަކަ ދައްކަވަމުން ދީދީ ވިދާޅުވީ، ވެރިކަމަށް ވަޑައިގެންނެވުމަށްޓަކައި ވައުދުތަކެއް ވެވަޑައިގެންނެވުމަށްފަހު، އަނެއްކާވެސް މަޖިލިސް އިންތިހާބާއި ދިމާކޮށް އެވައުދުތައް ތަކުރާރު ކުރައްވަމުން ގޮސް އަނެއްކާ ވެސް ކުރިއަށް އޮތް ލޯކަލް ކައުންސިލް އިންތިހާބާއި ދިމާކޮށް މީގެ ދެ އަހަރު ކުރިން ވެވަޑައިގެންނެވި ވައުދުތައް ތަކުރާރު ކުރައްވާނެ ކަމަށެވެ. އެހެންކަމުން ރައީސް މުއިއްޒު މަސައްކަތް ކުރައްވަމުން ގެންދަވަނީ ރައްޔިތުން ސްކޭމެއްގައި ޖެއްސުމަށް ކަމަށާއި މިކަމަށް ރައްޔިތުން ތިބެންވާނީ ސަމާލުވެ ކަމަށް ދީދީ ވިދާޅުވި އެވެ.

ވައުދު ފުއްދުމުގެ ނަމުގައި ރައީސް މުޢިއްޒު ގެންދަވަނީ ރައްޔިތުންނަށް ދޯކާ ދެމުން ކަމަށާއި ރައީސް މުޢިއްޒު ވެރިކަމާއި ހަވާލުވެވަޑައިގަތީ 2029 ވައުދެއް ވެގެން ދިވެހި ރައްޔިތުންނަށް ދޮގާއި މަކަރާ އޮޅުވާލުމުގެ ތެރެއިން ކަމަށެވެ. އަދި 120 ބިލިއަން ރުފިޔާ ހަވާލުކުރުމުން ވެސް ވޭތުވެދިޔަ ދެ އަހަރު ދުވަހުގެ ތެރޭގައި ދިވެހިރާއްޖޭގެ އެއްވެސް ރަށެއްގައި އެއްވެސް ކަމެއް ވީތަނެއް ނުފެންނަ ކަމަށް މެންބަރު އަހުމަދު ދީދީ ވިދާޅުވި އެވެ.

އަންނަ އަހަރަށް ލަފާކޮށް ދައުލަތުން ހުށަހަޅާފައި ވަނީ އެއްވެސް ރޭވުންތެރި ކަމެއް ނެތް، މިސްރާބެއް އަދި ސިޔާސަތެއް ނެތް ބަޖެޓެއް ކަމަށް ވިދާޅުވަމުން ޕީއެސްއައިޕީގެ އެއްވެސް ތަފްސީލެއް ހާމަކޮށްފައި ނުވާ ކަމަށް ވިދާޅުވި އެވެ.

މިދިޔަ އަހަރު އައްޑޫ ސިޓީގައި ހަވާ އެރުވުމަށް ފަހު ހަންކެޑެ މަޝްރުއޫ ވެސް ބަޔަކާ ހަވާލު ކުރި ކަމަށާއި އޭގެ ފަހުން މި އަހަރު އައްޑު އަށް ވަޑައިގެން އަނެއްކާ ވެސް އެ މަޝްރޫއު ބަޔަކާ ހަވާލު ކޮށްފައިވާ ކަން ރައީސް އިއުލާނު ކުރެއްވިއިރު މިއީ މިސަރުކާރުގެ ދޯހަޅި ސިޔާތުތައް ހާމަވާ އެއް މިސާލު ކަމަށްވެސް ދީދީ ވިދާޅުވި އެވެ.

މިއަދު ރައްޔިތުން ރައީސް މުއިއްޒާ މި ސަރުކާރަށް އިތުބާރު ނުކުރަނީ ދައްކާ ވާހަކައާ އަމަލާ ދިމާ ނުވާތީ ކަމަށްވެސް ދީދީ ވިދާޅުވި އެވެ.

ރައީސް މުއިއްޒު ވެރިކަމަށް ވަޑައިގަންނަވަން ވެވަޑައިގެންނެވި ބޮޑެތި މަޝްރޫއުތަކަށް ބަލާއިރު، ފުށިދިއްގަރުފަޅުގައި ހިއްކާ ރަސްމާލެ އާއި މާލެ ކަނޑު އަޑީގެ ޓަނަލަކުން ގުޅާލުމުގެ ބިޔަ މަޝްރޫއުގެ ފަންނީ އަދި އިނޮވޭޓިވް މަސައްކަތް ފެށިފައިވާ ކަމާއި ގާބިލް ކުންފުނިތަކާ އެކީގައި ފީސިބިލިޓީ ހެދުމުގެ މަސައްކަތް ވެސް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވިޔަސް، އެފަދަ މަސައްކަތްތަކެއް ކުންފުންޏަކާ ހަވާލުކޮށްގެން ކުރިޔަށް ނުދާކަން އިންފްރާސްޓަރަކްޗާ މިނިސްޓްރީން ބުނެފައިވަނީ 20 ޖޫން 2025 ގަ އެވެ.

މީގެ އިތުރުން ގަތަރުގެ ޝާހީ އާއިލާއަށް ނިސްބަތްވާ ޝެއިހު ނަޔެފް ބިން އީދް އަލް ތާނީގެ ކުންފުންޏެއް ކަމަށްވާ އެމްބީއެސް ގްލޯބަލް އިންވެސްޓްމަންޓްސްއިން ހުޅުމާލޭގައި އަޅަން ނިންމި ފައިނޭންޝަލް ސެންޓަރުގެ މަސައްކަތް ހުއްޓިފައިވާ ކަމުގެ މައުލޫމާތުވަނީ ލިބިފަ އެވެ.

މި ސަރުކާރުގެ އެންމެ ބޮޑު އެއް މަޝްރޫއު ކަމަށްވާ މާލެ އަތޮޅު ފުށިދިއްގަރުފަޅު ހިއްކައިގެން ރަސްމާލެ ތަރައްގީކުރުމުގެ މަޝްރޫއުގެ ބިން ހިއްކަން ފެށިތާ 22 މަސް ދުވަސް ފަހުން ރައީސް މުހައްމަދު މުއިއްޒު އެ ސަރަހައްދަށް ވަޑައިގެންފައިވަނީ 12 ނޮވެމްބަރގަ އެވެ. މިއީ އަށްމަސް ދުވަހުގެ ތެރޭގައި ހިއްކާ ނިންމާނެ ކަމަށް ބުނި މަޝްރޫއެއް ނަމަވެސް އަދި ނިމިފައިވަނީ އެމަސައްކަތުގެ 18 އިންސައްތަ އެވެ.

މީގެ އިތުރުން އައްޑޫ ސިޓީ ހަންކެޑެގައި އިންޓަގްރޭޑަށް ރިސޯޓެއް ތަރައްގީކުރަން ފައިސާ ހަމަޖެހި، ހުރިހާ ކަމެއް ނިމިފައި އޮތް ޕްރޮޖެކްޓު ކުރިއަށް ނުގެންދަން ނިންމުމަށް، އަނެއްކާ ވެސް އެ ރަށް މި މޮޑެލްއަށް ތަރައްގީކުރާނެ ބަޔަކު ހޯދަން ޓޫރިޒަމް މިނިސްޓްރީން ހުޅުވާލައިފާއިވާއިރު މިއީ އައްޑޫ ސިޓީއަށް ރައީސް މުއިއްޒު ވެވަޑައިގެންނެވި އެންމެ ބޮޑު އެއް ވައުދެ އެވެ. އަދިވެސް އެކަށީގެންވާ ގޮތުގައި މިމަސައްކަތް ފެށިފައިނުވާއިރު، އައްޑޫ ބްރިޖުގެ ވައުދު މުއިއްޒު ވަނީ ތަކުރާރު ކުރައްވާފަ އެވެ.

މިފަދަ ބޮޑެތި މަޝްރޫއުތަކުގެ މަސައްކަތް އެކަށީގެންވާ ގޮތުގައި ކުރިއަށް ނުދާތީ ރައްޔިތުން ދަނީ ރައީސް މުއިއްޒު އަށް ވަރަށް ބޮޑަށް ފާޑު ކިޔަމުންނެވެ.