ރަޝިޔާ އާއެކު އެއްބަސްވުންތައް ދަމަހައްޓަން އަލް ޝަރާ އެއްބަސްވެއްޖެ

ރަޝިޔާ އާއެކު ވެފައިވާ އެއްބަސްވުންތައް ދަމަހައްޓައި، އެ އެއްބަސްވުން ތަކަށް އިޙުތިރާމް ކުރާނެ ކަމަށް ސީރިއާގެ ރައީސް އަޙުމަދު އަލް ޝަރާ ވިދާޅުވެއްޖެ އެވެ.

އަލް ޝަރާ މިފަދައިން ވިދާޅުވެފައި ވަނީ ރަޝިޔާ އަށް ކުރެއްވި ދަތުރުފުޅުގައި އެ ޤައުމުގެ ރައީސް ވްލަޑިމިއަރ ޕުޓިންއާ ބައްދަލު ކުރައްވަ އެވެ. މިއީ މިދިޔަ އަހަރުގެ ޑިސެމްބަރު މަހު ސީރިއާގެ ވެރިކަމާ ހަވާލުވެ ވަޑައިގެންނެވި ފަހުން، އަލް ޝަރާ ރަޝިޔާ އަށް ކުރެއްވި ފުރަތަމަ ދަތުރުފުޅެވެ.

ޕުުޓިންއާ ބައްދަލު ކުރައްވައި އަލް ޝަރާ ވަނީ، ރަޝިޔާ އާއި ސީރިއާ އިން ކުރިން ވެފައިވާ އެންމެހާ އެއްބަސްވުން ތަކަށް އިޙުތިރާމް ކުރައްވާނެ ކަމުގެ ޔަގީންކަން ދެއްވައިފަ އެވެ. އެ ޔަގީން ކަމާ އެކު، ސީރިއާގައި ހުރި ރަޝިޔާގެ މައި ދެ އަސްކަރީ މަރުކަޒު ރައްކާތެރިކަމާ އެކު ދެމި ހުންނާނެކަން ކަށަވަރު ވެގެން ދިޔަ ކަމަށް ރިޕޯޓު ކޮށްފައިވެ އެވެ.

އަލް ޝަރާ ވިދާޅުވެފައި ވަނީ ރަޝިޔާ އާއެކު ސީރިއާ އިން ގުޅިފައިވާ ދެ ފަރާރުގެ ގުޅުންތަކާއި، މަސްލަޙަތު ތަކެއް ހުރި ކަމަށެވެ. އަދި ރަޝިޔާ އެކު ވެފައިވާ އެންމެހާ އެއްބަސްވުން ތަކަށް އިޙުތިރާމް ކުރާނެ ކަމަށާއި، ސީރިއާ އިން މަސައްކަތް ކުރަމުން ދަނީ ރަޝިޔާ އާއެކު އޮންނަ ގުޅުން އިތުރަށް ވަރުގަދަކޮށް، އިތުރު ހަރުފަތަކަށް ގެންދަން ކަމަށް ވެސް އަލް ޝަރާ ވަނީ ވިދާޅުވެފަ އެވެ.

ރަޝިޔާގެ އަސްކަރީ މަރުކަޒުތަކާ ގުޅޭ ގޮތުން މަޝްވަރާތައް ކުރުމުގެ ކުރިން އެ ޤައުމުގެ ރިޔާސީ ގަނޑުވަރުން ބުނެފައި ވަނީ، ސީރިއާގެ ލަތަކިއާ ސަރަހައްދުގައި ހުންނަ ހުމައިމިން ވައިގެ އަސްކަރީ މަރުކަޒާއި، ތަރްތޫސްގައި ހުންނަ ކަނޑުގެ އަަސްކަރީ މަރުކަޒުގެ މުސްތަޤުބަލާ ގުޅޭ ގޮތުން ވެސް މަޝްވަރާތައް ކުރައްވާނެ ކަމަށެވެ.

ސީރިއާގެ ރައީސް އަލް ޝަރާ ރަޝިޔާ އަށް ވަޑައިގެންފައިވާއިރު، މިއީ ވަރަށް ޚާއްސަ ދަތުރެއްގެ ގޮތުގައި ފާހަގަވާ ދަތުރެކެވެ. ސީރިއާގެ ކުރީގެ ރައީސް ބައްޝާރު އަލް އައްސަދުގެ ވެރިކަމަށް ރަޝިޔާ އިން އަސްކަރީ ބާރުގެ އެހީތެރިކަން ފޯރުކޮށްދިން ނަމަވެސް، މިދިޔަ އަހަރުގެ ޑިސެމްބަރު މަހު އައްސަދުގެ ވެރިކަން ވަނީ ވައްޓާލައިފަ އެވެ.

އެއަށް ފަހު ސީރިއާގެ ވެރިކަމާ އަލް ޝަރާ ހަވާލުވެ ވަޑައިގެންނެވިއިރު، ވެރިކަން ވެއްޓުމާ އެކު އައްސަދު ވަނީ ޤައުމުން ދޫކުރައްވައި ވަޑައިގެންފަ އެވެ. އޭގެ ފަހުން އައްސަދާއި އޭނާގެ އާއިލާ ދިރި އުޅެމުން އަންނަނީ ރަޝިޔާގަ އެވެ. އެ ޤައުމުން ވަނީ އައްސަދަށް ހިމާޔަތް ދިނުމަށް ނިންމައިފަ އެވެ.

ސީރިއާގެ ރައީސް އަލް ޝަރާގެ އުންމީދަކީ ރަޝިޔާ އިން އިޤްތިޞާދީ ލުއި ތަކެއް ހޯދުމާއި، ހުނގުރާމައިގެ ސަބަބުން ލިބިފައިވާ ގެއްލުންތަކަށް ބަދަލު ހޯދުމެވެ.