ކެންޔާގެ ކުރީގެ ބޮޑު ވަޒީރު އޮޑިންގާ އަވަހާރަވެއްޖެ

ކެންޔާގެ ކުރީގެ ބޮޑު ވަޒީރު ރައިލާ އޮޑިންގާ އަވަހާރަ ވެއްޖެ އެވެ.

ކެންޔާގެ ކުރީގެ ބޮޑު ވަޒީރުކަން ކުރައްވާފައިވާ، އަދި އެ ޤައުމުގެ އިދިކޮޅު ލީޑަރުގެ ގޮތުގައި ހުންނެވި އޮޑިންގާ އަވާހަރަވެފައި ވަނީ އުމުރުފުޅުން 80 އަހަރުގަ އެވެ. އޮޑިންގާގެ އޮފީހުގެ މަސްދަރަކުން ވަނީ ރޮއިޓާސް އަށް އެ މައުލޫމާތު ދީފަ އެވެ.

އިންޑިއާގެ ނޫސް "މަތުރުބޫމީ" އިން ރިޕޯޓު ކޮށްފައިވާ ގޮތުގައި، ދެކުނު އިންޑިއާގެ ކޮޗީގައި ފަރުވާ ހޯއްދަވަމުން ގެންދެވި އޮޑިންގާ، ބުދަ ދުވަހު ހާޓް އެޓޭކެއް ޖެހުމާ ގުޅިގެން ހޮސްޕިޓަލަށް ގެންދެވުނު އިރު އަވަހާރަ ވެފައިވާ ކަމަށް ޑޮކްޓަރުން ވަނީ ބުނެފަ އެވެ.

އޮޑިންގާ އަކީ ކެންޔާގެ ޑިމޮކްރަސީ އަށް ގިނަ ގުނަ ޚިދުމަތް ތަކެއް ކުރެއްވި ބޭފުޅެކެވެ. އޭގެ ތެރޭގައި 1991 ވަނަ އަހަރު ގިނަ ޕާޓީތަކުގެ ޑިމޮކްރަސީ ގާއިމު ކުރުމާއި، 2010 ވަނަ އަހަރު އައު ޤާނޫނު އަސާސީއެއް އެކުލަވާލުމުގައި އިސް ދައުރެއް އޮޑިންގާ އަދާ ކުރެއްވި އެވެ.

އެހެން ނަމަވެސް، ރިޔާސީ އިންތިޚާބުގައި ވާދަކުރެއްވި ފަސް ފަހަރު ވެސް އޮޑިންގާ ވަނީ އިންތިޚާބުން ބަލިވެފަ އެވެ. އޭގެ ތެރޭގައި 2007 ވަނަ އަހަރުގެ އިންތިޚާބާ ގުޅިގެން ހިނގި އަރައިރުން ތަކުގައި 1،300 އަށްވުރެ ގިނަ މީހުން މަރުވެ، ސަތޭކަ ހާހުން މީހުން ގެދޮރު ދޫކޮށް ދާން މަޖުބޫރުވި އިންތިޚާބު ވެސް ހިމެނެ އެވެ.

އޮޑިންގާ ގެ ސިޔާސީ ދިރިއުޅުމުގައި ގިނަ ކާމިޔާބީތަކާއި ނާކާމިޔާބީތައް ހިމެނެ އެވެ. އެހެން ނަމަވެސް، ކެންޔާގެ ޑިމޮކްރަސީ ހަރުދަނާ ކުރުމަށް އޭނާ ކުރެއްވި މަސައްކަތްތައް އެ ޤައުމުގެ ތާރީޚު ގައި ފާހަގަ ކޮށްލެވޭނެ އެވެ.