ދުވާލަކު ދެތިން ކީވީ މޭވާ ކެއުމުން ބަނޑު ހިކުމުގެ މައްސަލަ ހައްލުވާނެ ކަމަށާއި، ފައިބަރު ގިނަ ކާނާ ކެއުމަށް ވިސްނުމަށް ވުރެ އެއީ ރަނގަޅު ގޮތެއް ކަމަށް މިކަމާ ގުޅޭގޮތުން އިނގިރޭސިވިލާތުގެ ޑޮކްޓަރުންނަށް ދީފައިވާ އިރުޝާދެއްގައި ބުނެފައިވެއެވެ.

މި އިރުޝާދުގައި ބުނެފައިވާ ގޮތުގައި އިސްކުރު ފެނަށް ވުރެ މިނަރަލްސް އެކުލެވޭ ފެން ބުއިން ބަނޑު ހިކުމުގެ މައްސަލަ އަށް މާ ރަނގަޅު ކަމުގައެވެ. އަދި މެގްނީޒިއަމް އޮކްސައިޑް ސަޕްލިމެންޓް ބޭނުން ކުރުމުން ވެސް މި ކަމުގައި ރަނގަޅު ނަތީޖާ ފެންނާނެއެވެ.

ލިބެން ހުރި ހުރިހާ ހެކިތަކެއްގެ މައްޗަށް މި އިރުޝާދު އެކުލަވާލުމުގައި ދިރާސާކުރި ކިންގްސް ކޮލެޖް ލަންޑަންގެ ދިރާސާވެރިން ބުނެފައިވާ ގޮތުގައި ބަނޑު ހިކުމުގެ މައްސަލައިގެ ހައްލެއްގެ ގޮތުން އާންމު ކޮށް ބުނާ "ހަމައެކަނި ފައިބަރު ގިނަ ކާނާ ކެއުން" މި އަށް ވުރެ ގިނަ ގޮތްތަކެއް ހުރިކަމަށް ފެނިފައިވާ ކަމަށެވެ.

އިނގިރޭސިވިލާތުގެ ނޭޝަނަލް ހެލްތް ސާވިސް އިން ބުނެފައިވާ ގޮތުގައި ހަފްތާއަކު މަދުވެގެން ތިން ފަހަރު ފާޚާނާ ނުކުރެވޭ ނަމަ، ނުވަތަ އާދަޔާ ޚިލާފަށް މަދުން ފާޚާނާ އަށް ދެވޭނަމަ، ބެލެވޭނީ ބަނޑު ހިކުމުގެ މައްސަލަ އުޅޭ ކަމުގައެވެ.

ފާޚާނާ އަށް ދިއުމުގައި ބާރުލާން ޖެހޭނަމަ ނުވަތަ ފާޚާނާ ކުރުމަށްފަހު ފުރިހަމަ އަށް ބަނޑު ހުސްނުވާކަމަށް އިހުސާސްވުން ވެސް ބެލެވެނީ ބަނޑުހިކުމުގެ މައްސަލަ ހުރި ކަމުގެ ނިޝާންތަކެއް ކަމުގައެވެ. ނަމަވެސް މިނޫން އެހެން ނިޝާންތައް ވެސް ހުރެދާނެއެވެ.

އާ އިރުޝާދުގައި ބުނެފައިވާ ގޮތުގައި ބަނޑުހިކުމުގެ މައްސަލައިގައި އެންމެ ރަނގަޅު ފަރުވާއަކީ ސުޕަރމާކެޓުން އެންމެ ފަހުގެ ޕްރޮބަޔޮޓިކްސް ބޭނުން ކުރުމަށް ވުރެ ނުވަތަ ތަފާތު ބާވަތްތަކުގެ ފައިބަރު ގިނަ ކާނާ ކެއުމަށް ބާރުއެޅުމަށް ވުރެ މޭވާ އާއި ބުއިންތަކަށް އިސްކަންދިނުމެވެ.

ތަޖުރިބާކާރުން ބުނާ ގޮތުގައި ދުވަހެއްގެ މައްޗަށް ދެތިން ކީވީ މޭވާ ނުވަތަ 8-10 ޕްރޫން (ހިކި ޕްލަމް) ކެއުމުން ބަނޑުހިކުމުގެ މައްސަލަ ހައްލުވާނެއެވެ.

ކިންގްސް ކޮލެޖް ލަންޑަންގެ ނިއުޓްރިޝަނަލް ސައިންސަސްގެ ތަޖުރިބާކާރު ޑރ. އިރިނީ ޑިމިޑީ ވިދާޅުވާ ގޮތުން ކީވީ މޭވާ ތޮށި މަށައިގެން ވެސް ރަނގަޅެވެ. އަދި އޭގައި ފައިބަރު އެކުލެވެއެވޭތީ ކަމަށް އޭނާ ވިދާޅުވިއެވެ. އަދި އިތުރަށް އޭނާ ވިދާޅުވީ ތޮއްޓާ އެކު ކެއުމުން ވެސް މައްސަލައެއް ނެތް ކަމަށެވެ.

ކީވީ މޭވާގައި އެކުލެވޭ ފައިބަރުން ގޮހޮރުގެ މަސައްކަތަށް ހެޔޮ އަސަރުކޮށް، ހަށިގަނޑުން ބޭރުވާ ނަޖިހުގެ މިންވަރު އިތުރުވެއެވެ.

"ކީވީ މޭވާ އިން ގޮހޮރަށް ލިބޭ ފެނުގެ މިންވަރު އިތުރުވޭ، އޭގެ ސަބަބުން ނަޖިސް މަޑުވޭ،" ޑރ. ޑިމިޑީ ވިދާޅުވިއެވެ.

ދުވާލަކު 8-10 ޕްރޫން ކެއުމުން ވެސް މިފަދަ ނަތީޖާ އެއް ފެނިދާނެއެވެ.

އޭނާ ވިދާޅުވީ ބަނޑު ހިކުމުގެ މައްސަލައިގައި އިސްކުރު ފެނަށް ވުރެ "މިނަރަލް ވޯޓަރ ރަނގަޅެވެ."

މުހިންމު މިނަރަލް އަކީ މެގްނީޒިއަމް އެވެ. އެއީ ހަޖަމު ކުރުމަށް އެހީވާ އެއްޗެކެވެ. އެހެން ކަމުން މެގްނީޒިއަމް އޮކްސައިޑް ސަޕްލިމެންޓް ބޭނުން ކުރުމުން ގިނަ ފައިދާތަކެއް ކުރާ ކަމަށް ދިރާސާ އިން ދައްކައެވެ.

ޕްރޮބަޔޮޓިކްސް އާ ގުޅޭގޮތުން އިރުޝާދުގައި ބުނެފައިވާ ގޮތުގައި ބައެއް ބާވަތްތަކުން ބަނޑު ހިކުމުގެ ބައެއް މައްސަލަތައް ރަނގަޅުވާކަން ފާހަގަކުރެވިފައިވެއެވެ. ނަމަވެސް ގިނަ ޕްރޮބަޔޮޓިކްސް ގެ ބާވަތްތަކުން ކުރާ އަސަރާ ގުޅޭގޮތުން ދިރާސާތައް މަދުކަން ވެސް ފާހަގަކޮށްފައިވެއެވެ.

މިހާތަނަށް ބަނޑުހިކުމުގެ މައްސަލަ ހުރި ބަލިމީހުންނަށް ފަރުވާދޭ ޑޮކްޓަރުންނަށް ދޭން ކަނޑައަޅާފައިވާ އިރުޝާދުތައް މަދުކަމަށާއި، އަދި އެ އިރުޝާދުތައް ޒަމާނާ ނުގުޅޭ ކަމަށް ދިރާސާވެރިން ފާހަގަ ކޮށްފައިވެއެވެ. އަދި އެ އިރުޝާދުތަކުގައި މައިގަނޑު ގޮތެއްގައި ބާރުއަޅާފައި ވަނީ ފައިބަރު ގިނަ ކާނާ ކެއުމަށާއި ފެން ބުއިން އިތުރު ކުރުމަށެވެ.

އާ އިރުޝާދު ބިނާކޮށްފައިވަނީ 75 ކްލިނިކަލް ޓްރަޔަލްގެ ހެކިތަކުގެ މައްޗަށެވެ. މިއީ މިކަމާ ގުޅޭގޮތުން ލިބެންހުރި ހުރިހާ ޓްރަޔަލްތަކެކެވެ. އަދި މި ހެކިތައް ދިރާސާކޮށްފައި ވަނީ މާހިރުންގެ ޕެނަލަކުންނެވެ.

ކިންގްސް ކޮލެޖް ލަންޑަންގެ ޑައިޓެޓިކްސް ޕްރޮފެސަރ އަދި މި ދިރާސާގެ އިސް މުސައްނިފު ޕްރޮފެސަރ ކެވިން ވީލަން ވިދާޅުވި ގޮތުގައި މި އާ އިރުޝާދަކީ "ޞިއްޙީ ދާއިރާގެ މާހިރުންނަށް މީހުންގެ ބަލިމީހުންނަށް ބަނޑު ހިކުމުގެ މައްސަލަ ހައްލު ކުރުމުގައި އިރުޝާދު ދިނުމުގައި އުންމީދީ ފިޔަވަޅެކެވެ."

މި އާ އިރުޝާދު އެކުލަވާލުމުގެ މަޝްރޫޢު އަށް ފަންޑު ދިން ބްރިޓިޝް ޑައިޓެޓިކް އެސޯސިއޭޝަނުން ބުނެފައިވާ ގޮތުގައި މިއީ ޑައިޓީޝަނުންނާއި، ޑޮކްޓަރުންނާއި، ނަރުހުންނަށް ވަރަށް ރަނގަޅު ވަސީލަތެކެވެ. އަދި މިއީ "ކާނާ އަށް އިސްކަންދޭ އަދި ހެކީގެ މައްޗަށް ބިނާކޮށްފައިވާ ދިގު މުއްދަތަކަށް ދެމިގެންދާ ބަނޑު ހިކުމުގެ މައްސަލަ ހައްލު ކުރުމަށް" އެހީތެރިވެދޭނެ އިރުޝާދެކެވެ.