ރާއްޖޭގައި މަނާ ކޮށްފައި އޮތް ކަށި މިޔަރު ގެ މަސްވެރިކަން އަލުން ފަށަން ހުއްދަ ދޭން ރައީސް މުހައްމަދު މުއިއްޒު ނިންމެވުމާ ދެކޮޅަށް ޗޭންޖް.އޯގް ގައި ބައިނަލް އަގްވާމީ ޕެޓިޝަނެއް ފަށައިފިއެވެ.

އޮންލައިން ޕެޓިޝަން ފެށީ އޮސްޓްރޭލިޔާގެ އޮޝަން ޖިއޮގްރަފިކް މަޖައްލާގެ އެޑިޓަރުން އިސްނަގައިގެންނެވެ.

އޮންލައިންކޮށް ހިންގާ މި ޕެޓިޝަންގައި މިހާތަނަށް ތިމާވެށީގެ ދާއިރާގައި އަދި ކަނޑުގެ ދިރުންތައް ރައްކައުތެރި ކުރުމަށް މަސައްކަތް ކުރުމުގައި ދުނިޔޭގެ ނަން މަޝްހޫރު އެތައް ފަރާތަކުން ވަނީ ސޮއި ކޮށްފައެވެ. އޭގެ ތެރޭގައި ޑރ. ސިލްވިޔާ އާރލް، ޑރ. އެލެކްސް މަސްޓާޑް، ޑޭވިޑް ޑޫބިލެޓް، ޖެނިފަރ ހޭސް އަދި ހަވާޑް އާއި މިޝެލް ހޯލް ފަދަ ފަރާތްތައް ހިމެނެއެވެ.

ދިވެހިރާއްޖޭގެ ކުރީގެ ރައީސް މުޙައްމަދު ނަޝީދު ވެސް ވަނީ މި ޕެޓިޝަނަށް ތާއީދުކުރާ ފަރާތްތަކުގެ ލިސްޓުގައި ސޮއިކުރައްވާފައެވެ.

"ދިވެހިރާއްޖެ އަކީ ކަނޑުތަކުގެ ތިމާވެށި ރައްކާތެރިކުރުމުގައި އަބަދުވެސް އިސްނަގާ ޤައުމެއްގެ ގޮތުގައި ބަލައިގަނެވިފައިވާ ޤައުމެކެވެ،" އޮޝަން ޖިއޮގްރަފިކްގެ އެޑިޓަރ މައިކަލް އޭ ޑަބްލިއު ލިޔުއްވާފައިވެއެވެ. "މިޔަރުގެ މަސްވެރިކަން މަނާކުރުން ދެމެހެއްޓުމަކީ މި ނަން ދެމެހެއްޓުމަށާއި، މޫސުމަށް އަންނަ ބަދަލުތަކާއި ތިމާވެށި ރައްކާތެރިކުރުމާ ގުޅޭ ބައިނަލްއަޤްވާމީ މަޝްވަރާތަކުގައި ރާއްޖޭގެ އަޑު އިތުރަށް ބާރުގަދަކުރުމަށް މަގުފަހިވާނެ ކަމެކެވެ."

އޭގެ އިތުރުން، މިޔަރުގެ މަސްވެރިކަމަށް އަލުން ހުޅުވާލުމަކީ ހަމައެކަނި ތިމާވެށްޓަށް ގެއްލުން ލިބުމުގެ ނުރައްކާ އޮތް ކަމަކަށް ވުމުގެ އިތުރުން، އިޤްތިޞާދީ ގޮތުން ވެސް ގެއްލުން ލިބިދާނެ ކަމެއް ކަމަށާއި. އެހެނީ ޤުދުރަތީ ވަސީލަތްތަކަށް ބިނާކޮށްފައިވާ ފަތުރުވެރިކަމަކީ މިހާރުވެސް ޤައުމުގެ އެންމެ ބޮޑު އަދި އެންމެ ދެމެހެއްޓެނިވި އާމްދަނީ ލިބޭ ދާއިރާ ކަމުގައިވާތީ ކަމަށް ޕެޓިޝަންގައި ވެއެވެ.

ޕެޓިޝަން ގައި އިތުރަށް ބުނެފައިވަނީ، ވަރަށް އިހުތިރާމާ އެކު އެހެން ނަމަވެސް ސާބިތު ކަމާ އެކު، ހުރިހާ ބާވަތެއްގެ މިޔަރުގެ މަސްވެރިކަން މަނާކޮށްފައި އޮތް އޮތުން ދަމަހައްޓައި ދިނުމަށް ދިވެހި ސަރުކާރަށް ގޮވާލާ ކަމުގައެވެ.

އެ ގޮތައް ނިންމުން ވެގެން ދާނީ ދިރޭތަކެތީގެ ނަސްލުތައް ރައްކާތެރިކުރުމަށާއި، މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލުކަން އިތުރުކުރުމަށާއި، ތިމާވެށި ރައްކާތެރިކުރުމާއި ކަނޑުގެ ފަތުރުވެރިކަމުގެ ދާއިރާގައި ނަމޫނާ ޤައުމެއްގެ ގޮތުގައި ދިވެހިރާއްޖެ ދެމިއޮތުމަށް މަގުފަހިވާނެ ނިންމުމެއް ކަމަށް ވެސް ޕެޓިޝަން ގައި ވެއެވެ.

ކަށި މިޔަރު (ގަލްޕަރ ޝާކް) އަކީ ޑޯގްފިޝްގެ ބާވަތުގައި ހިމެނޭ މަހެކެވެ. މި މަހުގެ އެވްރެޖް ދިގުމިނަކީ 90 ސެންޓިމީޓަރު (3 ފޫޓު) އެވެ. މި މަސް އާންމުކޮށް ފެންނަނީ ދުނިޔޭގެ ހޫނު އަދި މެދުމިނުގެ ހޫނު ސަރަޙައްދުތަކުގެ ކަނޑުތަކުގެ 100-1500 މީޓަރުގެ ފުންމިނުގައެވެ.

މިއީ ކޮންމެވެސް ވަރަކަށް އާންމު ބާވަތެއްގެ މަހެއް ނަމަވެސް، އައި.ޔޫ.ސީ.އެން ރެޑް ލިސްޓް އޮފް ތްރެޓެންޑް ސްޕީޝީޒްގައި މި މަސް ލިސްޓުކޮށްފައި ވަނީ ނެތިދިއުމުގެ ބިރު ހީވެފައިވާ ބާވަތެއްގެ ގޮތުގައެވެ. މިގޮތަށް ލިސްޓުކޮށްފައި ވަނީ މައިގަނޑު ގޮތެއްގައި މާ ގިނައިން މިބާވަތުގެ މިޔަރުގެ މަސްވެރިކަން ކުރުމުގެ ސަބަބުންނެވެ.

ގިނަ މިޔަރުގެ ބާވަތްތަކެކޭ އެއްފަދައިން، ކަށި މިޔަރަކީ ވަރަށް ލަހުން ބޮޑުވާ އަދި ލަހުން އާލާވާ މަހެކެވެ. މި މަހަކީ މިޔަރުގެ ހުރިހާ ބާވަތްތަކުގެ ތެރެއިން ވެސް އެންމެ ލަހުން އާލާވާ ބާވަތްތަކުގެ ތެރޭގައި ހިމެނޭ މަހެއް ކަމަށް ވެސް ބެލެވެއެވެ.

ކަށި މިޔަރަކީ ފުން ކަނޑުގެ މަހެއް ކަމަށް ވުމާއެކު މި މަސް އާންމުކޮށް ހިފަނީ ލޭނު އަޅައިގެންނެވެ.

ކަށި މިޔަރު ބޭނުމަށް ހުއްދަ ދޭން ސަރުކާރުން ނިންމި ކަން ރައީސް މުއިއްޒު އިއުލާނު ކުރެއްވީ އެންމެ ފަހުން ކުޅުދުއްފުއްޓަށް ކުރެއްވި ދަތުރުގައެވެ.